Embedded Files
First Sunday of Lent
First Sunday of Lent
Lectionary: 22 (February 22, 2026)
Cun Bawipa Pathian nih vawlei khan tlak tlawmpal a lak i mipa ah a ser; nunnak petu thaw kha a hnar chungah a chuahhnawh i mipa cu a hung nung.Cun Bawipa Pathian nih nichuahlei ah Eden dum pakhat a ser i cuka ah cun a sermi mipa kha a chiah.Vawlei chung cun aa dawhmi thingkung le rawl ca i a ṭhami kung a phunphun kha a khohter hna, dum laifang ah cun nunnak thingkung, chia le ṭha hngalh khawhnak thingkung zong a khohter.
3:1-7Bawipa Pathian nih a sermi saram hna lakah rul hi a zer bik. Rul nih cun minu kha a thawh i, "Dum chung i a ummi thingthei hi a zeihmanh nan ei lai lo tiah Pathian nih an ti taktak hna maw?" tiah a hal.Nu nih cun, "Dum laifang i a ummi thingthei khi dah ti lo cu,dum chung i a ummi thingthei vialte hi azeipaoh kan ei khawh ko hna," tiah a leh. "Pathian nih khi thing khi cu a tlai nan ei lai lo, a tongh zong nan tawng lai lo, nan tongh ahcun nan thi lai, a kan ti," tiah a ti.Rul nih cun, "Cucu ahmaan lo; nan thi lai lo.Pathian nih cu bantukin a ti cu, kha thingthei nan ei ahcun nan ei cangka in amah bantukin hngalhnak nan ngei ve lai i a ṭha le a ṭhalo kha nan hngal ve lai ti a hngalh caah a si," a ti.Nu nih cun thingkung cu mithlang ngai a si le a thei cu mitthi ngai a si kha a hmuh tikah a fimmi si cu zeitluk in dah a nuamh hnga ti kha a ruat. Cucaah a thei cu a lawh i a ei. Cun a va zong kha tlawmpal a pek ve i a ei ve.An ei dih cangka in hngalhnak kha an vun hmu i taklawng an si kha an i hngal; cucaah theipi hnah kha an i ṭhit i an i hruk.
R. Maw Bawipa, kan nih vialte cu sualnak ngeimi kan si caah, run kan zaangfah ko !
3 Zeicahtiah ka palhnak cu tha tein ka hngalh ko hna i ka sualnak cu ka lung ah an tang peng ko hna. 4 nangmah cung le nangmah cung lawng ah ka sual cang, a tha lo tiin na hmuh mi kha ka tuah cang hna, biachahnak na tuah tik ah na khamh-dinnak na langhter nakhnga le biaceihnak na tuah tik ah na teinak a langh nakhnga,
5 sualthur in ka chuak i kaa semka in misual ka rak si cang cu philh hlah. 6 Sihmanhsehlaw milungthiang hna cung ah naa lawm, a thli tein fimnak cu na ka cawnpiak.
12 Na khamh lawmhnak cu ka pe `han ko law ka chung i na dawtnak thlarau cu hmunter hram ko. 13 Mi`halo cu na lam kha ka chimh hna lai i misual cu na sin ah an rak kir`han lai.
17 Sual i ngaihchih hi Pathian kha thawinak pekchanh a si; lungkuai in sual aa ngaihchih mi lungthin cu na hlaw bal lo.
.Sualnak cu mipa pakhat thawngin vawlei cungah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.Nawlbia a um hlanah khan vawlei cungah hin sualnak a rak um ko, sihmanhsehlaw nawlbia a rak um lonak hmun ah khan cun sualnak cu sual ah relpiak an si lo.Asinain Adam caan in Moses caan tiang thihnak nih mi vialte kha a uk dih hna; Adam nih Pathian nawlbia a buarnak thawngin a tuahmi sualnak bantuk a tuah lomi zong kha a uk ko hna. Adam cu a ra lai dingmi hmanthlak a rak si.Sihmanhsehlaw cu hna pahnih cu an i khat lo, zeicahtiah Pathian laksawng cu Adam sualnak bantuk kha a si lo. Kha mipa pakhat sualnak ruangah khan mi tampi an thi taktak ko. Sihmanhsehlaw kha pa ṭhat lonak nakkhan Pathian vel cu tam piin a ngan deuh i cu bantuk ṭhiamṭhiam cun mipa pakhat Jesuh Khrih vel thawngin mi tampi cungah a tlungmi Pathian laksawng cu a ngan deuh.Cun Pathian laksawng le mipa pakhat sualnak kha an i lo lo. Kha sualnak a hun zultu kha cu, "Na sual," ti biakhiahnak a si; sihmanhsehlaw sualnak hi zat riamruam a hun zultu cu, kan phu kan tawk lopi a simi laksawng, "Na sual lo," ti biakhiahnak hi a si.Mipa pakhat sualnak thawngin, cu mipa ruangah cun, thihnak nih khan minung cu uk hram a hun thawk hna. Sihmanhsehlaw mipa pakhat, Jesuh Khrih tuahmi chungin a chuakmi cu zeitluk in dah a ngan deuh! Mipa pakhat thawngin thihnak cu a um a si ahcun, Pathian velngeihnak duhdim le dinnak a laksawng a hmumi vialte hna cu, mipa pakhat Jesuh Khrih thawngin thlarau nunnak a ṭhawng chinchinmi an ngei lai.Cucaah cun sualnak pakhat tuahmi nih mi vialte kha sual a phawt hna bantukin dinnak pakhat tuahmi nih mi vialte kha a luatter hna i nunnak a pek hna.Mipa pakhat nawlngaih lo ruangah mi tampi kha misual i ser an si bantukin mipa pakhat nawlngaih ruangah mi tampi cu miding ah ser an si lai.
Thawngtha Aupinak:
Praise to you ,Lord Jesus Christ, King of endless glory!
Bawipa, Jesuh Khrih nangmah cu a zungzal in thangthat si ko seh.dongh kho lo, sunparnak siangpahrang.
Bawipa Jesuh Khrih,Sunparnak Siangpahrang nangmah cu a zungzal donghin loin kan in thangthat !
“Cathiang nih pei: Minung phun hi changreu lawng in a nung lo, Pathian hmurka in a chuak mi bia vialte cu a nunnak a si,’ tiah a ti
Thetse ram ah hneksaknak
4 1Cun khuachia nih rak tukforh awk ah Thlarau nih Jesuh cu thetse ram ah a kalpi. 2 Ni sawmli le zan sawmli chung rawl a ulh, cucaah a rawl a ṭam ngaingai, 3 cun hneksaktu cu a sin ah a ra i amah kha, “Pathian Fapa na si ahcun hi lung hi changreu i can awk ah nawl pe hna,” tiah a ti. 4 Sihmanhsehlaw amah nih, “Cathiang nih pei: Minung phun hi changreu lawng in a nung lo, Pathian hmurka in a chuak mi bia vialte cu a nunnak a si,’ tiah a ti kha,” ti in a leh. 5 Cu hnu ah khuachia nih khua thiang ah a kalpi i Biakinn parpahlek ah a toh. 6 Cun a thawh i, “Pathian Fapa na si ahcun, tang ah khin vung zuang tuah; zei cah tiah Cathiang nih:
‘Pathian nih nangmah kong ah a vancungmi kha nawl a pek cang hna,
lung ah naa khawn nakhnga lo an kut in an in cawi lai.’ a ti kha,” tiah a ti.7 Jesuh nih amah cu, “Cathiang nih:
‘Bawipa na Pathian cu va hneksak hlah,’ tiah a ti kha,” ti in a leh.
8 Cun, tlang sangpi pakhat ah a kalpi, khuachia nih vawleicung ram vialte le an sunparnak vialte kha a hmuhsak hna, 9 cun “Ka ke tang ah bawk in na ka biak ahcun hi vialte hi kan pek dih lai,” tiah a ti. 10 Cun Jesuh nih a leh i, “I kalpi dih hna, Satan! Zei cah tiah Cathiang nih: ‘Bawipa na Pathian lawng kha na biak lai, amah lawng kha na rianh lai,’ tiah a ti khah,” ti in a leh. 11 Cu hnu ah khuachia nih a kaltak; cun vancungmi cu an rung lang colh i amah cu an zohkhenh.
Page updated
Google Sites
Report abuse