SIRACH 11

Hlen hmang lenglei langhnak

11 1Fimnak nih misifak cu thazaang a pek, cun milianngan hna lak ah ṭhutnak a pek. 2Aho hmanh a mui aa dawh caah thangṭhatnak hlah law aho hmanh a muisam men in nautat hlah. 3Thla a ngei mi lak ah khuai cu a hme bik a si nain a thlum bik mi khuaihliti a chuahter. 4Mi nih an in upat caah i porhlaw hlah, zei cah tiah Bawipa tuah mi thil cu khuaruahhar an si, nain minung nih an hmu kho lo.  5 Ramuk bawi tampi cu vawlei ah ṭhumh an si, cun aho hmanh nih zei ah an rel lo mi hna nih bawi luchin an i chinh. 6Milianngan tampi cu ṭha lo in mual an pho i minthang tampi cu midang hna kut ah an tla cang hna.  

Tawkzawn hngalh le tuaktannnak

 7Ṭha tein hlathlai hlan ah sual phaw hlah; tuaktan hnuh ah chimhhring. 8Na leh hlan ah ngai hmasa, bia an chim lio ah an bia tan hlah. 9Na rian a si lo mi ah vaa thlak hlah, misual hna bia alnak ah vaa tel hlah.

10Ka fa, rian tampi i lak hlah; na duh a fah ahcun harnak na tong hrimhrim lai; A ran khawh chung in na tlik zong ah na phan bal lai lo, cun na zam zong ah na luat bal lai lo. 11Micheu cu an ran khawh chung in an tli nain hnu ah an i thlai zungzal ko.

Pathian lawng kha i bochan

12Cun, bawmh a herh mi, mikhulnuar an um, ngeihchiah ah a si a fak i sifahnak ah a rum; cun Bawipa nih mithmai ṭha a pek, a sifah harsatnak in a cawisan, 13cun mithmai ṭha a pek i mi vialte an khuaruah a har. 14 Ṭhatnak le chiatnak, nunnak le thihnak, sifahnak le rumnak, hi vialte cu Bawipa sin in an ra. 17Pathian a ṭih mi hna cung ah Bawipa laksawng cu a hmun i anmah kha hruai awkah a mihmai ṭha cu anmah he zungzal a um lai. 18Midang nih kheh le khuainak in an rum, cun hihi Bawipa sin in an co mi laksawng a si:  19 annih nih, “Atu cu ṭhu in ka ngeih mi kaa nuamhnak kho cang,’ an ti nain zei caan tiang a nguh hna lai ti le chawva cu midang sin ah kaltak in an thi te lai ti kha an hngal lo. 20 Na rian cu i tlaihchih, fak pi in ṭuan law na rian ah tar ko. 21Misual hna hlawhtlinnak cu khuaruah har in zoh hlah, Bawipa kha i bochan law na rian te lawng kha ṭuan ko, zei tin tiah Bawipa hmai ah misifak kha ruah lo pi in hmakhat ah rumter cu thil hmete a si. 22Bawipa thluachuah cu pathian a duh mi hna i lawmh man a si, hmakhatte ah Pathian nih a thluachuahnak cu a theipar a tlaiter.  23 “Ka herh mi cu zei dah a si, hmailei ah zeizat dah ka ngeih lai?’ ti hlah. 24 Cun, ‘Atu cu kaa za cang, zei vanchiatnak ni nih dah a ka tlunh khawh lai?’ ti fawn hlah.  25Ṭhat caan ah chiat caan cu philh a si i chiat caan ah ṭhat caan cu philh a si ve. 26Nain mi pakhat a thih tikah a tuah ning in cham ṭhan ding cu Bawipa ca ah thil hmete a si. 27Nganfah tlawmpal a tlun ah cun nuamhnak cu philh a si colh, a thih laite ah a tuahsernak cu phuan a si te lai. 28 A thih hlan ah aho hmanh mi vanṭha va ti hlah; a ni hmanung bik zoh in mi cu hngalh a si.

Mi ṭha lo cu va zum hlah

 29Mikip kha na inn ah rak ṭinpi hna hlah, zei ca ah tiah mi tampi cu mizer hna i rap an si.  30Mi porhlaw lungthin cu bawm i khumh mi sal bantuk a si: ngiatthlaitu bang na tlak ding kha a ngiat ko, 31thil ṭha kha thil chia ah thlen ding le thangṭhat a tlak mi kha sual puh awkah a ngiat peng ko. 32Meihol phu cu meiṭil hmete in aa thawk bang in misual cu thisen thlet ding lawng a kawl. 33Mihrokhrol le le a nunzia ṭha lo cu vaa ralring, zungzal ca thangchiatnak an pek sual lai. 34Khual kha tlun inn pe law hnahnawhnak an pekcolh lai i na chungkhar hna in an hlatter lai.