VAILAMTAH LAM

                   VAILAMTAH LAM

        (THE WAY OF CROSS STATION)

         ṬHENG HRAM THLACAMNAK

 Z.   Biak awktlakbik mi maw Jesuh Bawipa, na kehram ah khukbil in zangfah an haltu kanmah hna le athi cia mi Khrih vialte hna kha run kan zangfah ko. Atu kan zoh, kan ruah hnga mi na temhinnak thawngin na vel bawmhnak run kan pe law, na hnu zulh in na temhinnak kan hmuh tikah, sualngaihchihnak he kan nun chung pel loin kan ton hnga mi sifah harnak le soinak le nautatnak hna kha toidornak lungthin he kan in khawhnak lai thazang run kan pe ko tuah.

H. Maw Bawipa, ka hmurka kha ka hun piak ko.

Z. Ka hmurka in na thangṭhatnak cu kan thanh lai.

H. Maw Bawipa, keimah bawmh awkah run ka hoih ko.

Z.  Maw Bawipa, rianrang in run ka bawmh ko.

H. Thangṭhatnak cu Pa, le Fapa, le Thiang Thlarau cungah um ko seh.

Z. Hramthawk lio can bantukin a tu le a zungzal um ko seh, dong hin loin. Amen.

*** A lianngan mi Fa aa thlai lio ah, Lungthin fahnak he a nu nih, Vailam tangin a dir hnawh.

                 HMUNKHATNAK

THI SEH TIAH BIA AN CEIHNAK HMUN

H. Maw Khrih nangmah kha kan in biak i kan in thangṭhat.

Z.  Zeicahtiah na vailam huham thawngin mi vialte na kan khamh cang.

    A liannganbik Bawipa Jesuh cu Judah tlangbawi ngan Kaifas inn ah serhsat zawmhtaih in an kalpi. Cu hnu ah Pailat zung ah chuih  pah, hnuh pah in an kalpi fawn. A takpum pem lakin an tuk an velh chih. Hling in ser mi luchin kha a lu ah an chinhter rih. Can a dongh tikah mi vialte bia a ceihtu ding Bawipa cu misualbik bantuk in vailamtahnak ing seh tiah bia an khiah piak.

               H. Thlacam u sih.

Z.  Maw a lianngan mi Bawipa Jesuh, kan caah sifah temhnak kha na in. kanmah khamh awkah vailamtahnak kha ing seh tiah biakhiahnak zong kha na huah. Maw dawt awktlakbik mi Bawipa kan sualnak vialte kha kan lungthin, kan ruahnak le kan thazang dihlak in kan hlawt khawhnak lai ngaihthiamnak le zangfah bawmhnak kha run kan pe ko tiah kan in hal.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian zangfahnak thawngin daihnak chung ah i din ko hna seh.

Z. Amen.

 ***Lungretheih ngai in a um mi, 

       Kan Nu Maria lungthin kha, 

  Nam chunh bangin a chunh cang.***

            HMUNHNIHNAK

 BAWI JESUH VAILAM A PUTNAK HMUN

 H. Maw Khrih, nangmah kha kan in biak i kanin thangṭhat;

 Z. Zeicahtiah na vailam huham thawngin mi vialte na kan khamh cang.

H. A pum thiang a dihlak a lawnnak um loin hma he a khat mi Bawipa liang cungah a rit ngai mi vailamtung kha an chuan. Bawipa nih lungnemnak le toidornak lungthin he cu a rit ngai mi vailam kha a lak i, vailam cung thihnak thawngin mi vialte ka khamh hna lai ti lungthin he lungpang tein a put.

H. Thlacam u sih.

 Z.    Maw Bawipa Jesuh, zangfah kanin hal. Kan nun chungah pel loin kan ton hnga mi sifah retheihnak vialte kha lungnem le thinsaunak he tuar in lungdonghlo tein na hnu kanin zulh khawhnak hnga na in mi sifah temhnak thawngin lungthawnnak run kan pe ko.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian zangfahnak thawngin daihnak chungah i din ko hna seh. 

Z. Amen.

*** Fapa pakhat lawng ngai mi nu,

 Ngaihchiatnak le lungkuainak kha,

   Zeitlukindah a ngan hnga.***

             HMUNTHUMNAK

      VOIKHATNAK A TLUKNAK HMUN

H. Maw Khrih, nangmah kha kanin biak i kanin thangṭhat;

Z. Zeicahtiah na vailam huham thawngin mi vialte na kan khamh cang.

 H.  Bawipa cu a rit ngai mi vialam kha temhfahnak nganpi he put in Kalvari tlang a kai lio ah mi ṭhalo hna nih an kut an ke he an zawmtaih, an serhsatnak vialte kha a ngaihthiam hna. Gesmani dum chung i a in mi lungretheih chungvanghnak ruangah a tha a dih hlei ah, a pumpaluk cu hma he a khah dih caah a celh ti lo i vailam tang vawlei ah a tlu.

     H. Thlacam u sih.

 Z.      Kan sualnak ruangah a rit ngai mi vailam put buin vawlei ah a tlumi maw Bawipa Jesuh, na kan inpiak mi retheihnak le temhinnak thawngin dinnak le zuamnak he kan pum le kan lungthin kha i sum in, a ṭhalo mi vialte kha kan hrial khawhnak hnga thaṭhawnnak run kan pe ko.

 H. Bawipa, run kan zangfah ko tuah.

 Z. Run kan zangfah ko tuah.

H. Zumtu hna i thlarau hna cu Pathian zangfahnak thawngin daihnak chung ah i din ko hna seh. 

Z. Amen.

*** A Fapa in mi temhnak kha,

   A dawt nu nih a hmuh tikah,

    Ngaihchiat lungfak in a ṭap.***

            HMUN LINAK

 A NU HE LAM AH AN I TON NAK HMUN

 H. Maw Khrih, nangmah kha kanin biak i Kanin thangthat;

 Z. Zeicahtiah na vailam huham thawng in mi vialte na kan khamh cang.

 H.   Bawi Jesuh cu vailam put buin a tluk caah a hma kha aa khawngdeng chap i a fahnak a zual chinchin. Hmailei a kal lio ahkhan a nu he lam ah an i tong. Mah tonnak cu zeibantuk tonnak dah a si hnga? Nam chunh he aa lo mi a nu lungthin fahnak kha zei he dah kan tahchunh hnga? A Fapa zong a nu a vun hmuh tikah zeitluk in dah a lung a fah ve hnga ti kha ahodah a chim kho hnga.

    H. Thlacam u sih.

 Z. Maw Bawipa Jesuh, na nu na zangfah bangkhan kannih zong kan zangfah ve ko. Ngaihchia lungkuai mi kan Nu Mary, na Fapa nih a in mi temhinnak kha ruat in kanmah caah thla rak kan campiak law, hmanungbik ni ah Pathian thinhunnak in kan luat khawhnak lai run kan bawm ko tiah kanin nawl.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian zangfahnak thawngin daihnak chung ah i din ko hna seh.

 Z. Amen.

  *** Ngaihchiatnak fakpi a ing mi,

   Jesuh nu kha kan hmuh ahcun,

       Ṭap lo kan um kho hnga maw?

                  HMUN NGANAK

             SIMON VAILAM AN PUTTERNAK

   H. Maw Khrih, nangmah kha kanin biak i kanin thangṭhat;

   Z. Zeicahtiah na vailam huham thawngin mi vialte kha na kan khamh cang.

   H.   Bawipa cu a tha a dih tuk cang i hmailei ah a kal khawh ti lo caah Sairin khua mi Simon kha hramhram in Bawipa Jesuh can ah vailam kha an putter. Simon nih a ter ah put a rak duh lo nain vailam huham thawngin a lung aa thleng i a hnu ahcun lungpanh tein vailam kha a rak putpiak.

       H. Thlacam u sih.

 Z.   Bawipa Jesuh, kannih zong nangmah he hmunkhat ah vailam kan put cio khawhnak lai, vailam putnak lawnglawng ah thangṭhatnak kan kawl khawhnak lai, vailam huham thawngin vawlei pumsa duhnak kan hlawt khawhnak lai, run kan bawm ko. Bawipa na min ruangah sifah temhnak a tlun fate na vel laksawng a si tiah kan ruah thiamnak hnga le phunzai lo le lungpanh tein kan in khawhnak hnga thazang run kan pe ko.

  H. Bawipa, run kan zangfah ko tuah.

  Z. Run kan zangfah ko tuah.

 H. Zumtu hna i thlarau hna cu Pathian zangfahnak thawngin daihnak chungah i din ko hna seh. 

Z. Amen.

*** A Fa le a nu hmunkhat ah,

  An intermhnak kan hmuh ahcun,

Ṭap loin kan um khawh hnga maw?

                  HMUN RUKNAK

VERONICA NIH BAWIPA HMAI A HNAWH PIAKNAK HMUN

  H. Maw Khrih , nangmah kha kan in biak i kan in thangṭhat;

  Z. Zeicahtiah na vailam huham thawng in mi vialte na kan khamh cang.

  H.  Bawipa Jesuh cu a thlan hripi paih thluahmah in hmailei ah a kal lio ah Veronika an ti mi minu pakhat nih zangfahnak lungthin he a ral mipuar hna lakah a lut i Bawipa hmai kha pavuah in a hnawhpiak. Khi nu nih a tuah mi velngaihnak kha rulh than a duh caah amah mui kha pavuah cungah a cuanter.

    H. Thlacam u sih.

  Z. Bawipa Jesuh, na temhinnak kong kan ruah tikah kan ngaih a chia tuk hringhran. Kan lung chungah upatnak, zangfahnak, sualngaihchihnak le dawtnak kan ngeih zungzal khawhnak hnga run kan zangfah ko tuah. Bawipa, nangmah he kani lawh khawhnak hnga Kan thlarau chungah nangmah muithlam kha kan khenhpiak ko, tiah kanin nawl.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian zangfahnak thawngin daihnak chungah i din ko hna seh. 

Z. Amen.

*** A dawt mi hna an sualnak ca,

     Sifah temhnak kha a ing mi,

   A Fa Jesuh kha a hmuh.

              HMUN SARIHNAK

      VOIHNIHNAK A TLUKNAK HMUN

   H. Maw Khrih, nangmah kha kanin biak i kanin thangṭhat;

   Z. Zeicahtiah na vailam huham thawng in mi vialte na kan khamh cang.

   H.   Bawipa Jesuh cu tuknak velhnak le a dang rel cawklo fahnak a phunphun a innak vialte le a thisen tamtuk a luan ruangah vawlei ah  veihnihnak a tlu ṭhan.

    H. Thlacam u sih.

  Z.    Bawipa Jesuh, na temhninnak tang le kan sualnak tangah na tlu ṭhan. Na nawlbia buarnak in atu le atu na lungthin thiang kha kan fahter tawn. Bawipa, hmailei ah kan sual tinak hnga lo, na temhinnak thawngin bawmhnak vel run kan zangfah hram ko.

   H. Bawipa, run kan zangfah ko tuah.

   Z. Run kan zangfah ko tuah.

   H. Zumtu hna i thlarau hna cu Pathian zangfahnak thawngin daihnak chung ah i din ko hna seh.

   Z. Amen.

  *** A hrin mi Fapa a chungchuak

        Lungfah awkin a thih lio kha,

         A nu nih mit in a hmuh.

                  HMUN RIATNAK

  JERUSLEM NUU HNA AN ṬAHNAK HMUN

  H. Maw Khrih, nangmah kha kan in biak i kanin thangṭhat;

  Z. Zeicahtiah na vailam huham thawngin mi vialte na kan khamh cang.

   H.  Jeruslem khua chung i nuu ṭha a cheukhat cu vailam a put lio ah tukvelhnak a ing chih mi Jesuh kha an hmuh tikah, an zang a fak tuk i an ṭap. A rauh hlan ah khualipi cung i a tlung hnga mi Pathian dantatnak kha a hmuh chung cia caah Bawipa Jesuh cu mah Nuu ṭha hna lei ah hoih in, "Ka fanu le hna keimah caah ṭap hlah u; nanmah le nan fale hna zawnruah in ṭap ko u," tiah a ti hna.

                 H. Thlacam u sih.

   Z.    Kannih cu misual kan si. Na temhfah innak zong kan sualnak ruangah a si ti kan ruah tikah, maw Bawipa, kan ngaih a chia tuk hringhran. Atu hi vawlei cung mithmuh i an rawitu hna le an hlawtu hna nih an in hngami dantatnak khan luat in, a hnu ah zungzal nunnuamnak cotlak mi kan sinak hnga le kan sualnak caah ngaihchihnak mithli luan in kan um khawhnak lai run kan zangfah ko tuah.

  H. Bawipa, run kan zangfah ko tuah.

  Z. Run kan zangfah ko tuah.

 H. Zumtu hna i thlarau hna cu Pathian zangfahnak thawngin daihnak chung ah i din ko hna seh. 

Z. Amen.

 *** Dawt awktlak mi maw kan Bawinu, Na ngaihchiat lungfahnak thawngin, Ngaihthiamnak kan halpiak ko.

                HMUN KUANAK

   VOITHUMNAK A TLUKNAK HMUN

  H. Maw Khrih, nangmah kha kanin biak i kanin thangṭhat;

  Z. Zeicahtiah na vailam huham thawngin mi vialte na kan khamh cang.

  H.     Bawipa Jesuh cu Kalvari tlangpar a phan dengmang cang. Vailam cung thahnak a in lainak hmun zawn a phak hlan deuh ah, a tha a dih tuk i vawlei ah a voithumnak a tlu than. Hi bantuk in zangfah awk ngai in a tluk zongah a ral mipuar hna nih cun serhsatnak lungthin lawng keng in Bawipa kha an nam chih, an hnuh chih i fakpi in an tuk an velh chih rih.

          H. THLACAM U SIH.

Z.  Maw Jesuh kan Bawipa, fakpi in voithum tiang na tluknak sullam le na ṭhatnak kong kan ruah tikah, kan sualnak le kan hruhnak  vialte chungah can saupi tiang kan um caah kan i ngaihchih tuk cang i run kan ngaithiam ko. Tahchunh khawhlo na temhinnak thawngin kan sualnak kha nikhat hnu nikhat kan hlawt chinchin khawhnak hnga run kan bawm ko.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian zangfahnak thawngin daihnak chung ah i din ko hna seh.

 Z. Amen.

 *** Jesuh hmai hmuh kaa tlaknak hnga, Upat tlak mi a nawlbia kha, Ka lung chung ka duhter ko.

                    HMUN HRANAK

 BAWIPA PUAN AN PHAWIHNAK HMUN

H. Maw Khrih, nangmah kha kanin biak i kan In thangṭhat;

Z. Zeicahtiah na vailam huham thawngin mi vialte na kan khamh cang.

H.   A pum thiang kha a Pa sinah dotla in a pekchanhnak le a thihnak hmun a phak tikah, a ral hna nih Bawipa kha vailam cung khenh chih awkah an i tim cang. An tuk an velhnak hma in a luang mi thi khan a tak cungah aa benh chih mi puan kha an vun hnawh, an  vun phawih tikah Bawipa nih a in mi fahnak cu chim khawhlo a si. Cu liote ah a cuanhtu hna i nehsawhnak kha a in fawn rih.

                   H.  Thlacam u sih.

Z.   Maw Jesuh, nang cu zeihmanh a ngei lo mi, mi sifahbik bantuk in thih na duh. Zeitluk a fak mi ningzahnak kha na huah! Kannih zong vawlei thilri duh tuknak le hakkauhnak lungthin in kan khamh ko tuah. Vawlei thilri hi a hmun lo mi an si ti kha kan hngalhter law vancung i a zungzal a hmun hnga mi nunnak thil ṭha lawng kha kan kawlter ko tuah.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian zangfahnak thawngin daihnak chung ah i din ko hna seh.

 Z. Amen.

 *** A thiang mi nu, Khrih hma hna kha, Ka lungthin chungah thirkhenh bang, Fek tein ka khenhpiak ko.

          HMUN HLEIKHATNAK

  VAILAM CUNG AN KHENHNAK HMUN

H. Maw Khrih, nangmah kha kanin biak i kanin thangṭhat;

Z.  Zeicahtiah na vailam huham thawngin mi vialte na kan khamh cang.

H.  Kalvari tlangpar vawlei ah vailam kha an chiah i, Jesuh kha an hnuh i a cungah an ihter. Jesuh nih mi vialte khamhnak caah hma he a khat mi a pum thiang kha a Pa sinah a pek i, a kut le a ke kha vailam cung khenh chih awkah a chanh hna. Mithattu hna nih a kutphah le a kephah hna kha a ngan mi thirkhenh in vailam cungah an khenh chih. Bawipa thisen cu vawlei ah a luan i a luang.

H. Thlacam u sih.

Z.  Vailam cungah khenh chih mi maw Jesuh, a kan Khamhtu, na vailam he ṭhen ti loin um duhnak lungthin kha run kan pe ko. A ṭhalo mi pumsa duhnak vialte tei khawhnak thazang run kan pe ko. Kan pumsa duhnak vialte kha vailam cungah kan khenhpiak dih ko. Hi vawlei ah nangmah he pumkhat ah kan i komh hnu ah, na vancung ram ah kan thlarau kha kanin pek khawhnak lai, run kan bawm ko.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian zangfahnak thawngin daihnak chung ah i din ko hna seh.

 Z. Amen.

 *** Keimah cah sifah temhinnak,

   Na Fapa huah mi vialte kha,

   Nangmah he ingti ko ning!

               HMUN HLEIHNIHNAK

          VAILAM CUNG A THIHNAK HMUN

H.  Maw Khrih, nangmah kha kanin biak i kanin thangṭhat;

Z. Zeicahtiah na vailam huham thawngin mi vialte na kan khamh cang.

  H.  Bawipa Jesuh cu vailam cungah a kut le a ke thirkhenh fahnak relcawklo tuar in suimilam pathum chung a um. Vailam cung aa thlai lio ah a ral hna i serhsat zawmtaih cawhdehnak kha a in dih. Sihmanhsehlaw a thattu a ral hna caah thla a campiak hna; a lung aa thleng mi mi firpa pakhat kha zungzal nunnuamnak pek awkah bia a kamh; a nu dawt kha a dawt mi lamkaltu Johan sinah a pek tak i, a donghnak ah atu cu zeizong vialte a tling dih cang, tiah a ti i, a lu a kun i a thi.

(Daitein Chikhat um ding)

      H.  Thlacam u sih.

Z. Vailam cung thihnak tiangin a kan dawtu maw dawt awktlakbik mi kan Bawipa Jesuh, na vailam tung kha upatnak he kan pom cio ko cang. Hi bantuk na thihnak i thathnemnak man kha rak kan coter law khamhnak kha run kan zangfah ko tuah. Nun zongah, thih zongah kanmah cu nangmah ta kan siter zungzal ko cang.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian Zangfahnak thawngin daihnak chung ah i din ko hna seh. 

Z. Amen

  *** Ka thih hlantiang mitthli tla in, Na Fa sung sin zangfah hmuh awk,Nangmah he ṭap ve ko ning.

             HMUN HLEITHUMNAK

     BAWIPA RUAK ANTHUMNAK HMUN

H.  Maw Khrih,nangmah kha kanin biak I kanin thangṭhat;

Z.  Zeicahtiah na vailam huham thawngin mi vialte na kan khamh cang.

H.   Mizapi cu Kalvari tlang in an tum dih tikah chim khawhlo ngaihchiat lungfahnak a ing mi Nu Mary hnemh awkah lamkaltu Johan le nu a cheukhat lawng an tang cang. Arimathia khua mi Joseph le Nikodimus nih an ra i Bawipa Jesuh ruak kha vailam cungin an thumh i, Nu Mary taang cungah an pomter.

              H.  Thlacam u sih.

Z.   Tahchunh khawhlo ngaichiat lungfahnak a ing mi, maw a sungbik mi kan Nu Mary, chim cawklo ngaihchiatnak na in kha kan ruah tikah kanin zangfah tuk hringhran. Asinain nang cu kan Nu na si bantuk in kanmah caah na in. cu na lungfahnak in misual mi kanmah caah ngaihthiamnak kan halpiak ko. Kanmah zong kha lamkaltu Johan bantuk in na fale ah kan ruat ve ko. Kan nu run si ko law na Fapa Bawi Jesuh nih kan thlacamnak aw kha a kan ngaihpiaknak hnga zangfah kan halpiak ko, tiah kanin nawl.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian Zangfahnak thawngin daihnak chung ah i din ko hna seh. 

Z. Amen.

*** Vailamtung kehram ah dir in, Bawinu he ngaihchiatnak ing in, Ṭah ve awk kha ka duhbik.

                   HMUN HLEILINAK

        BAWIPA RUAK AN VUINAK HMUN

H. Maw Khrih, nangmah kha kanin biak i kanin thangṭhat;

Z. Zeicahtiah na vailam huham thawngin mi vialte na kan khamh cang.

H.  Lamkaltu le a hawile hna nih Bawi Jesuh ruak kha thlan thar lung kua chungah an vui i lung nganpi in thlanka kha an khartak. Bawipa ruak cu a thawhthan hlantiang thlanchungah a um.

          H. Thlacam u sih.

Z. Maw a liannganbik Bawipa Pathian, kanmah vialte cu na timh cia mi can le hmun ah pel loin kan thi te lai. Nangmah nawl bangin rak tling ko seh. Sual ngeimi kan pumsa cu a nu a si mi vawlei ah kir ṭhan ko seh. Asinain, maw zangfah thiammi Bawipa Pathian, a thi kho lomi kan thlarau kha run la law, nangmah sinah a zungzal in umter ko. Vawlei caan a dongh tikah kan pumsa kha rak thawhter ṭhan law a zungzal dong hin loin kanin thangṭhat khawhnak lai, run kan zangfah ko tuah.

H. Bawipa, run kan zangfah ko tuah.

Z. Run kan zangfah ko tuah.

H. Zumtu hna i thlarau hna cu Pathian zangfahnak thawngin daihnak chung ah i din ko hna seh.

 Z. Amen.

 *** Ka pum thih can a phak tika, Paradais sunpar nunnuam ah, Ka thlarau in thangṭhat seh. 

           Z. Amen.

H. Khrih cu kanmah caah thihnak in tiangin Pa nawlngai in a um.

Z. Vailam cung a thihnak tiangin.

           H. Thlacam u sih.

Z.      Maw Bawipa Pathian, kannih na fale kha run kan zoh law, kanmah caah kan Bawipa Jesuh Khrih nih miṭhalo a ral hna kut chungah a pum kha a pek i, vailam cungah fakpi in a temhinnak kha kan ruahnak le mah vailam upatnak kan tuah nak thawngin, Bawipa he thawhthan khawhnak vel kha run kan zangfah ko, tiah kan Bawipa Jesuh Khrih min in kanin hal. Amen.