SIRACH 47

Nathan

47 Amah khawh in David min in profet ṭuan awkah Nathan a chuak.  

David

2Mipi thawinak sa chung in a thau cu adang tein thlei a si bang in David cu Israel chung in adang tein thim a si. 3Amah cu a hmet lio tein chiandeih kha ngakchia bang le vom kha tuufa bang lente aa celhpi.  4 Minote a si lio hmanh ah minganpi kha a thah i a mi hna ningzahnak kha a lakpiak hna, 5lungtakep in a chaih i Goliath puarthaunak cu a rak daihter a si lo maw? Zei cah tiah Cungnung Bik Bawipa kha a auh i amah nih a bantha kha ṭhawnnak a pek, ralbawi ṭhawngpi kha a thah i a mi hna tha kha a ṭhawnter chin hna. 6Cucaah mi thonghra reng lo a thah hna kha an theihpi, Bawipa kha an lawmh i amah zong kha an thangṭhat chih; amah kha sunparnak luchin an pek. 8 A kenkip i ral kha a tei dih hna, a ral filistine pawl cu a hloh dih hna i an ṭhawnnak cu zungzal ca in a cil dih.  8A tuah mi poh ah bia sunglawi hna in Cungnung Bik Bawipa cu a lawmh; Amah a sertu Bawipa kha a dawt tuk caah a lungthin dihlak in amah thangṭhatnak hla a phan.9 Ngaihnuam ngai in hla sak awkah hlasatu hna cu biakṭheng hmai ah a chiah hna; 10Puai hna kha sunglawi ngai le rem tein a sersiam ṭhan caah Bawipa min thiang cu an thangṭhat i hmunthiang cu deika in awdawh in a khat. 11Bawipa nih a sualnak cu a lakpiak dih hna i a lianngannak cu a ṭhawnter chinchin; amah he siangpahrang hna ca ah thisen biakamnak a pek i Israel ah a sunglawi tuk mi bawi ṭhutdan a pek.

Solomon

12 Fapa fim nih amah cu a chaan, lawmh a um mi cu, a lung a tluang. 13 Solomon cu ram a daih caan ah a uk i Pathian nih a kenkip in daihnak a pek, cucaah a min ca ah inn a dirhpiak khawh i a hmun mi hmunthiang kha a remhpiak khawh. 14 hNa ngakchia tuk nain zei tluk in dah na fim, tiva bang in hngalhthiamnak in na khat. 15 Na thluak in vawlei kha na cul i vawlei cu na biathuk hna in na khahter.16 Na min cu lamhlapi tikulh tiang a phan i daihnak na duh ruang ah mi nih an in tlaihchan.17Na hla hna, na phungthluk bia hna, na biafim hna le na bialehnak hna cu leicung ah khuaruahhar hna an si. 18Bawipa Pathian, Israel Pathian ti auh mi min in, sui cu dar bantuk in tampi nan pon i ngun cu suan bantuk in na tamter. 19Na takpum cu nu hna sin ah na chanh i na diriamnak sal ah na cang, 20 Upatnak na ngeih mi cu na thurter i na ciruang cu na buar, cucaah na hruhnak ruang ah na fale hna cung ah dantatnak le ngaihchiatnak na tlunter; 21na pennak cu cheuhnih ah aa cheu i Efraim chung in ralhrang pennak a chuak. 22Sihmanhsehlaw Bawipa cu a zaangfahnak a let bal lai lo i a bia kaakhat hmanh a tlolh bal lo, a rak thim mi cu tefa pek lo in a um bal lai lo i a rak dawt mi pa i ciruang cu a hlo bal lai lo. 25Cucaah Jacob tefa kha a nganh bang hna i David cu a chungchuak hrinsor kha a pek.

Rehoboam

26 Solomon cu a pupa hna he aa din, 27amah a changtu ah a hrinsor hna lak in pakhat a rohtak, 28rammi lak i a hrut bik mi, mi kha ral a thawhtertu, thluak ngei lo a si.

Jeroboam

29 A changtu ah Nebat fapa; amah nih Israel kha a sualter i Efraim cu ṭhat lonak lam ah a hruai; cu thawk cun an sualnak cu a karh tuk caah an ram tiang in ṭhawl an tong; zei cah tiah dantat an huah hlan lo ṭhat lonak phunzakip kha tuah an i zuam.