SALM 36:1-12

Misual hna zertiannak le Pathian lungthin `hatnak

36. 1 Sualnak cu mi`halo nih a lungthin chung in a phuan mi bia a si; a mithmai ah Pathian `ihnak a um lo. 2 A sualnak a hmuh khawh lo cu amah le amah kha sang tuk in aa zoh caah a si; 3 A chim mi bia vialte cu chiatnak le hlennak lawngte an si, fimnak kha hnu a rak chit cang. 4 A lam tluan awk ah a ihkhun cung hmanh in rawiphiarnak lawng kha a ruat; voikhat `hatlonak lam a vung lamh hnu cun zei thilchia hmanh a ca ah a za ti a um ti lo.

5 Bawipa, a fek mi na dawtnak cu van hna ah a um, zumhtlak na sinak cu khuadawm tiang an phan, 6 na khamh-dinnak cu tlang sangpi bantuk a si, na biaceih lairelnak cu ti thukpi bantuk a si. Bawipa, nangmah nih cun minung he saram he na zohkhenh hna. 7 Pathian, a fek mi na dawtnak cu zei tluk in dah a sun lawi. Cucaah Adam fale cu na thladem tang ah an i dor.

8 Na inn chung i rumnak hna cu nuam tein an ei, na cerhti thlum in ti na dinh hna; 9 Nangmah chung ah hin nunnak hrampi a um, na khuaceu in ceunak kan hmuh. 10 Nangmah an cohlang mi hna cung ah a fek mi na dawtnak le milungthiang hna cung ah na khamh-dinnak cu hmunhter hram ko. 11 Miruamkai nih ka chawhkanh bal hlah seh law mi`halo kut nih ka `hawl bal hlah seh. 12 Khaka ah khan, `hatlonak- tuahtu hna cu an tlu; a tengh hna i an tho bal ti lo.