SIRACH 35

Phungbia le raithawinak

35 1Phungbia a zul mi nih pekchannak tampi a tuah; 2-3nawlbia a zul mi nih khuapi thawinak a pekchanh.  2-4Lawmhnak pek cu changvut ṭha pekchanhnak he, Pekṭhenhnak cu thangṭhat thawinak he aa khat. 3-5Ṭhat lonak ngol cu Bawipa lungtluanh a si, din lonak hrial cu sual thawinak a si. 4-6Bawipa hmai ah na kut-lawng in chuak hlah; 7zei ca ah tiah hi vialte cu nawlbia chung ah a um dih mi a si.

5-8Miding pekchanhnak nih biakṭheng iang a ngeihter, cun a hmui mi a rim cu Cungnung Bik sin ah a kai. 6Miding raithawinak cu dotla a si, philh a si bal lai lo. 7-10 Bawipa cu siannak he upatnak pe, na thlaithar cu siang ngai in pe. 8Na laksawng cu hmaipanh tein pe, cun na cheuhra cheukhat cu lawmhnak he va pe. 9Cungnung Bik nih an pek cang bang in na ngeih mi chung in siannak he va pe, 10zei cah tiah Bawipa cu laksawng petu ṭha a si, a let sarih in laksawng an pek lai.

A Thiang mi dinnak

11Amah kha laksawng in ziknawh i tim hlah, a cohlang lai lo; a ding lo mi pekchanhnak cu i bochan hlah; 12zei cah tiah amah cu biaceihtu a si i duhdanhnak a ngei hrimhrim lo. 13Sifak hna harnak petu a si bal lo, nganfahnak a ing mi phu i nawlpatnak cu a ngaih.  14Ngakṭah hna thlacamnak le nuhmei hna ngaihchia in nawlnak cu ngai lo in a um bal lo. 15Nuhmei biang i a luang mi mitthli cu amah fahnak a petu a chalh tik i a luang mi a si ko lo maw? 16Pathian kha lungthin tak in a rian mi cu cohlan a si lai, a nawlnak cu khuadawm tiang a kai lai. 17Mi toidor i thlacamnak cu khuadawm kha a pemh; a pemh hlan lo cu hnemh a tong lo, 18cun Cungnung Bik nih a zoh hlan lo le miding ca ah dinnak a tuahpiak hlan lo cu a ngol lai lo.

19Cun Bawipa cu amah ca ah a khul a nuar lai lo a daithlang lai lo; 20 cucu zaangfah thiam lo hna kengruh a khiah hlan lo le miphun hna cung lehrulh chamnak a tuah hlan lo, 21mipuarthau hna phu a hrawh cikcek hna hlan lo le mi ṭha lo hna pennak kha a hrawh dih hlan lo, 22 cun mi vialte kha an tuah ning cio in a cham hna hlan lo le minung cawlcanghnak kha an i tlak ning cio in a cham hna hlan lo tiang, 23a mi hna bia a ceihpiak hna i a zaangfahnak ah an i nuamh hlan lo a si lai.  24 Khuakhen caan i khuadawm bantuk in harnak ton caan i zaangfahnak cu a si ve.