Judit 8

III. JUDITH 

Judith kong

8 Judith cu kha thil si ning kha cu lio ah cun an chimh. Amah cu Israel fapa Sarasadai, cu i fapa Salamiel, cu i fapa Nathanael, cu i fapa Eliab, cu i fapa Hilkiah, cu i fapa Elijah, cu i fapa Ahitup, cu i fapa Rafem, cu i fapa Kideon, cu i fapa Anania, cu i fapa Elkiah, cu i fapa Oziel, cu i fapa Josef, cu i fapa Oksi, cu i fapa Merari i fanu a si. 2Amah phun le chungkhar chungmi a vapa Manasseh cu barli ṭuan lio ah a rak thi. Cucu lo i barli faphal a ṭem mi hna kha a zoh hna lio ah nika nih a tlak i ihkhun ah an tlikpi. 3Amah cu a khuate Bethulia ah khan a thi i Dothan le Balamon karlak i lo chung ah khan a pupa hna sin ah an vui ve. 4Nuhmei a si tikah, Judith cu innchung ah kumthum le thlali khengte aa erh. 5A inn thlungkhuh ah khan amah lawngte ca innte pakhat a sakter hna. Buri puan kha a taksa tong tiang in aa aih i nuhmei mithi ngaih hnipuan kha aa hruk hna. 6 Sabath lai zaanlei, Sabath ni hrimhrim, Thla Thar lai zanlei, Thla Thar puai le Israel Chung hna nuamhnak puai hna ah dah ti lo nifate rawl a ul i a nuhmei sinak kha a ṭah.  7Amah cu aa dawh ngai i duh a nung ko. A pasal Manasseh nih khan sui le ngun, salnu le salpa, saṭil run le ram hna kha a roh hna; 8 a chawva kha a toh hna i sualphawt ding zei hmanh um lo in khua a sa i Pathian kha a ṭih ngai.

Judith le upa hna

9Tiharnak nih mi kha zei tluk in dah an zia a hrawh cang hna i khuami hna nih lungfak ngai in khuapi upa hna sin ah zei tin dah an zai cang ti kha a theih, cun Uzziah nih zei tin dah a chimh hna ti le ninga a tlin tikah khuapi cu Assiria mi hna sin ah ka ap lai ti in chiatserh in bia a kamh hna ning zong kha an chimh tikah,10Judith nih a inn a zohkhenhtu salnu kha a thlah hna i khua upa pahnih Khabri le Kharmi hna kha a auhter hna. 11 Hi hna pahnih an rat tikah amah nih:

“Bethulia khua hruaitu hna ka bia hi ngai tuah u, nihin ah nan tuah bang in, mipi sin ah bia nan chim mi le rikhiah ni ah Bawipa cu bawmh awkah a rat lo ahcun ti in, Pathian nawl ngai lo in, khuapi kha ral hna kut ah chanh ding in bia nan i kam mi cu nan palh. 12Nihin ah Pathian a hneksak mi, Pathian cung ah aa chia mi, nannih vialte cu aho dah nan si? 13Lianngan bik Bawipa maw nan hneksak! Zei hmanh nan hngal lo i a hngalh zong nan hngal ti lai lo. Minung lungthin a thuhnak hna kha nan hngal kho lo i 14 minung bia alnak hna kha nan leh khawh lo ahcun zei tin dah zeizong vialte a sertu Pathian lungthin cu nan hngalh i a lungthin le aa tinhnak cu nan theih khawh lai? Ka ṭale hna, a si lo, Bawipa kan Pathian thin cu phawk hlah u. 15A ra lai mi ninga chung ah a kan bawmh duh lo zong ah kan ral hna kut in a duh mi ni zat in kanmah kha khamh khawhnak nawl a ngei, cun kan ral hna hmai zong ah kannih kha hrawhnak nawl a ngei. 16Sihmanselaw Bawipa kan Pathian khuakhannak kong ah nannih nih aamahkhan halnak nawl nan ngei lo. Cun Pathian cu minung bantuk in ṭhihphaih ding a si lo bang in amah cu minung men bantuk in hlorh men ding zong a si lo. 17Cu nakcun a kan khamh nakhnga lungsau tein kan hngah lai, cun a kan bawmh ding ah kan nawl lai. Cucu a duh mi thil a si ahcun kan aw cu a theih ko lai.

         18 A taktak ti ah atu nai hrawng le nihin zong ah kanmah lak i miphun phunkhat, chungkhar asilole khua pakhat le khuapi pakhat hmanh nih voikhat ah an rak tuah bantuk in minung kut in tuah mi pathian a bia mi kan um rih lo, 19 cucu kan pupa hna vainam ah an rak tlaknak le ral kut ah an rak rawhnak ruangpi a si. 20 Kannih tu cu kan Pathian dah ti lo aho hmanh kan bia lo; cucaah zei rel lo in a kan zoh ding le kan ram a hnon ding cu i ruahchan hlah u sih.

21Nan i ruahchan bang in a kan tlaih a si ahcun Judaeami vialte zong an tlaih dih ve ko hna lai i kan hmunthiang zong cu an hrawh dih ko hna lai, cun cu buarnak an tuah mi vialte ca ah kan thisen in kan cham a hau ko lai. 22 Kan unau hna thahnawnnak, kan ram saltannak,  roram mi an thianhnak hna, sal kan cannak miphun hna lak ah kan lu cung an tla ko lai, cun kan saya thar hna zong nih kannih cu thinhun le zawmhtaih in an kan tuahto ko lai;

23zei tin tiah kan i apnak nih a mithmai ṭha a kan hmuhpiak lai lo; a si lo, Bawipa kan Pathian nih cu thil cu ningzah awkah a canter lai.  24 Cucaah atu ka ṭale hna, kan unau hna ca ah zohchunh awktlak in um u sih; zei cah tiah an nunnak cu kanmah cung ah aa hngat, hmun thiang- Biakinnpi le biakṭheng hna himnak zong cu kanmah cung ah aa hngat. 

25 Hi thil vialte hiti hin an can cang caah kan pupa hna a rak hneksak hna bang in atu a kan hneksak caah Bawipa kan Pathian cu lawmh hna usih. 26 Abraham cung ah zei dah a rak tuah, Isak hartuarnak vialte; Jakob zong nih a nu ṭapa Laban tuu kha a khalhpiak lio ah Siria ram Mesopitamia ah a cung ah a tlung mi thil vialte hna kha philh hlah usih.

27 Hi ṭihnung hneksaknak vialte hi an lungthin zohnak ca ah a tlunter bang in atu zong ah hihi Pathian nih dan a kan tatnak si lo in a lungthin he aa naihniam mi kannih kha ralrinnak a kan peknak a si,” tiah a ti hna.

28 Uzziah nih, “Na chim mi vialte cu a thiang mi na lung in a rung chuak mi an si i aho hmanh nih kaakhat hmanh an in al lai lo. Nihin lawng ah hin na fimnak cu a langh a si lo; na no lio tein zei tluk in dah na fim i na lungthin a ṭhat ti cu kan hngalh dih cang.  30Sihmanselaw tihal in kan car i mi nih kan chimcia bang an kan fialchih tikah a poih kho lo mi biakamnak in chiat kan i serh cang. 31Nangmah cu Pathian a ṭihzah mi na si; cucaah kan tikuang ah a ruahti a burh i kan buhritnak a loh khawh naklai Bawipa sin ah thla kan campiak ko,” tiah a ti.

32 Judith nih, “Ka bia hi ngai hmanh u; thil pakhat tuah ka timh i cucu kan fale hna sin ah chankhat hnu chankhat philh lonak ah chanhchin ding mi a si lai. 33Tuzaan cu khuapi kutka ah nan um lai. Keimah cu ka sinum he leng ah kan chuak lai. Kan ral hna sin ah khuapi kha chanh awkah nan khiah mi caan a dih hlan ah Israel khamh awkah Bawipa nih keimah cu a ka hman ko lai. 34Zei dah tuah ka timh ti cu nan ka hal lai lo; ka tuah hlan ah cun kan chim ve hna lai lo,” tiah a ti hna. 35 Uzziah le khuabawi hna nih khan, “Daihnak he va kal ko; Bawipa nih kan ral hna teirul chamnak ding lam cu in hmuhsak hram ko seh,’ tiah an ti. 36 Cun cungdot khaan khan an chuak i an umnak cio ah an kir.