SIRACH 19

19    Zuri rianṭuan cu a rum bal lai lo, cun thil hmete kha zei a rel lo mi cu a tla zau lai. 2Zu le nu nih mithluak ṭha kha a hrawh hna, hlawhhlangnu sin a kal mi nih cun ningzahnak a ngei ti lo. 3Pelep le rungrul hna rawl a si lai i ningzahnak a hngal lo mi cu a nunnak a sung lai.

Holhtam ralchanh in

4Mizumhfawinak nih thluaktlawmnak a langhter, cun sualnak nih misual a fahter.  5Ṭhatlonak tuah ah a nuam mi nih sualphawt aa huah, 6mi kong ceih lo harnak tong lo. 7 An in chimh mi kha nolh ṭhan hlah, harnak na tong lai lo.  8Na chim lo ah na sual ding dah ti lo, na hawi siseh, na ral sin siseh va chim hlah, va phuang hlah,  9mi nih an theih lai i an in zum ti lai lo, cun tlawmpal ah an in huat cang lai. 10Na theih mi a um maw? Na chung ah thihter ko; ṭih hlah! an khuai lai lo! 11Mihrut cu thawngpang pakhat ruang ah nau ngei lai nu bang nganfahnak a in lai. 12Tai ah aa thlaimi fei bang mihrut chung biathli cu a si ve.

Na theih mi poh zum hlah

13Na hawipa cu hal hmanh, zei hmanh a rak tuah lo a si kho men; cun a rak tuah hmanh ah a tuah ti lai lo. 14Na innpa cu hal hmanh, zei hmanh a rak chim lo a si kho men; cun a rak chim hmanh ah a chim ti lai lo. 15Thangchiatnak cu a um zungzal caah na hawi cu hal hmanh, na theih mi vialte zum hlah. 16Minung cu chim an i timh lo hmanh ah a caan ah cun ruah lo pi  in an chim sual tawn; cun kannih lak ah aho dah biachimnak in a palh bal lo  mi a um? 17Na innpa cu na tlerh hlan ah hal hmasa, cun Cungnung Bik Phungbia ah chan.

A hman le a hman lo mi fimnak

 20Fimnak cu Bawipa ṭihnak lawng ah a um, a taktak tiah Phungbia tlinter khi fimnak a si.  22Chiatnak tuah thiam cu fimnak a si lo, misual hna pek mi ruahnak ah ralrinnak aa tel lo. 23Fihnung fimthiamnak a um; fimnak a ngei lo mi poh cu mihrut a si. 24 Zer ngai in Pathian Phungbia buar nakin thluak tlawmte in ṭihnak he khah a ṭha deuh. 25Nihchuak a si nain a ding lo mi ṭhat lonak a um; cun an bia tei awkah dawtnak kha a lettalam in a hmang mi an um. 26Ngaihchia lukhun in a vak mi cheukhat an um, nain a chung taktak ah cun hlennak lawngte a si, 27a hmai kha a thuh i hnachet bang aa umter, sihmanhsehlaw a hmai an hawh ahcun nangmah kha caan ṭha laknak ah an hman lai. 28Thazaang a ngeih lo caah sualnak a tuah lo mi an um, nain caan ṭha a ngeih cangka ṭhat lonak a tuah ko lai.  29Mi pakhat cu a umtu ning zoh in na chim khawh, khua a ruah mi cu a hmai zoh in na chim khawh. 30Aho a si ti cu a fenh-aih, a nih ning, a kal ning in na chim khawh.