2 Maccabaeus 9

Antiochus Epifenis i hmanung bik ni hna

9 Kha lio hrawng ah khan Antiochus cu Persia in ningcang lo ngai in a rak kir. 2 Amah cu biakinn kha ramh in khuapi kha lak awkah Persepolis ti mi khua ah a lut; sihmanhsehlaw khuami hna cu hmakhatte ah hriamnam an i lak i an i dironh. Antiochus kha an dawi i ningzahnak he an kirter.  3 Ecbatana a phak tikah Nikanor le Timotheus ralkap hna cung thil a cang mi kha a theih. 4A thin cu mei bang a alh i amah a ṭhio mi hna nih an pek mi ningzahnak kha Jew hna chamter awkah a lung aa thlek, cucaah a rang khaltu cu a rang kha a khualtlawnnak a dih hlan lo i din lo in khalh awkah a chimh. Sihmanhsehlaw Vancung lairelnak cu a cung ah aa thlai cang. Puarthau in amah nih, “Jerusalem ka phak tikah Jerusalem cu Jew hna thlanhmun ah ka ser lai,” a rak ti. 5Sihmanhsehlaw zeizong vialte a hmutu Bawipa, Israel Pathian nih a cung ah a dam kho lo mi le hmuh khawh lo mi fahnak a tlunter. 6 A bia a ka in a chuak maw chuak lo ti ah khin a paw ah fahnak nganpi le chunglei hremnak a in; 7 Hihi cu a si ding hrimhrim a si ko, zei cah tiah midang paw chung ah khan tuar khawh lo mi hremnak a rak tuah; cu hmanh ah a ruamkainak cu a zor lo i porhlawtnak in a khat rih. Jew hna cung ah a thin cu a linh in a lin i rang kha rang deuh khalh ding in a chimh. Cucaah rang cu ruah lo tuk in a per caah rang cung in a tla i a ruh le a keng vialte a kiak dih. 8Aa zumh tuk ruang ah khuatuan deuh te ah rili tilet hmanh nawl a pe kho mi ah aa ruah i tlangpar hmanh cuai a thlai kho mi ah aa hmuh mi cu vawlei ah zakpathal in a tla i laangphir in an zonh cang, cucu mi vialte hmuh khawh ding in Pathian ṭhawnnak aa phuan a si, 9 khaka ah khan hi pathian hngal lo mi mit cu rungrul in an khat i vawlei ah nganfak in a lawnnak ah a taksa cu a maan dih, cun a thuhaw nih ralkap vialte cu a zawtter dih hna. 10Khuatuan deuh liote ah van arfi hmanh a rak tong mi ah aa ruat nain atu cu a thuhaw a nam tuk caah aho hmanh nih a laang cu an i zawn duh ti lo.

       11A theipar cu khika i a dirhmun a ṭhatlo tikah khan a ngan a fah tuk nak ah a puarthaunak kha a ṭhumh i Pathian tuknak thawng in a lung a hung fim.  12 A thu haw cu amah hmanh nih a celh ti lo tikah amah nih, “Pathian toi ah i dor cu a hmaan mi a si; aho minung hmanh nih Pathian he i tluk ding in aa timh ding a si lo,” tiah a hrum. 13 Cun michiakhapa nih Bawipa sin ah thla a cam i a thanh mi cu Bawipa nih a zaangfah bal lai lo nain, 14 cucu hnawhnam in vawlei ah thluk dih ding in a kal hnawh mi khualipi cu luatter awk, 15 an thut tuk caah vui awk hmanh a tlak lo mi, van vate le sahrang hna ei awkah  an fale hna he leng ah hlonh men ding a ruah mi Jew hna cu Athenmi hna he aa tluk in covo pek awk le 16 a ramh dih mi Biakinn thiang cu pekchanhnak he ṭamh ṭhan awk, cun a thiang mi biakinn thilri hna cu a let tampi in chap ṭhan awk, raithawinak ca a dih mi vialte cu amah ngunkhuai in cham awk; cun cu vialte lak ah a sang bik mi cu, 17amah hrimhrim kha Jew ah aa cang lai i Pathian lianhngannak thanh awkah mi umnak vialte a tlawng lai ti hi an si.

Antiochus nih Jew hna sinah ca a ṭial

18A fahnak in damlei a panh lo, Pathian i a dik mi dantatnak a cung i a tlun caah aa ruahchannak vialte a dong i a tanglei bang in Jew hna sin ah ca a ṭial, a ca cu nawlpatnak phun a si.

19 “Upat tlak Jewmi hna le ra mi hna, siangpahrang le ralbawi lu bik a si mi Antiochus nih damnak le rumnak vialte nan cung ah um hram seh ti in dawtnak nganpi he kan biakchawnh hna. 20Nannih cu nan fale hna he nan dam i nan rian a tluan ahcun kan i lawm ngaite. 21 Nan ka dawtnak cu ka philh bal lo.

"Persia ram in ka rak kir lio ah fak piin ka zaw, cucaah mipi himnak ca ah timhtuahnak ngeih a herh ti ka lung a fiang. 22 Ka lung a dongh bia a si lo, zei cah tiah ka dam hirhiar te ko lai ti ruahchannak ka ngei ko. 23 Zei cah tiah ka pa cu tlangram ah raltuk a kal tik poh ah a hmun rawltu a thim peng kha ka hngalh, 24 cucu ruah lo pi in thil pakhatkhat a can asilole hnahnawhnak a um sual ah mipi nih aho sin ah dah uknak nawl a pekta ti an hngalh i hnangam tein an um nakhnga caah a si, 25cu lawng a si lo, kan ramri ah a um mi hna le kan pawngkam miphun hna cu caanṭha an hngak i kan cung ah zei dah a cang lai ti kha an ngiat ko ti ka hngalh,  cucaah ka fapa Antiochus kha siangpahrang ah ka thim cang, tlangcung ram hna ah raltuk ka kal tik poh ah amah cu a tam u cu kan chimh cang hna; hika ah hin a sin ka cakuat cu ka khumh chih.  26 Cucaah mipi le pakhat cio nih ka sin in nan hmuh mi ṭhatnak vialte cu nan philh nakhnga lo le khuatuan lio bang in ka cung ah dawtnak nan ngeih zungzal naklai kan nawl hna i kan forh hram hna. 27Amah nih ka khuakhannak cu zawnruahnak le nemnak he a pehzulh lai i nan duhnak an zulh hna lai ti cu ka zumh ko.

28Cucaah hi lainawng le Pathian a thangchiattupa cu midang a rak pek mi harnak tluk in amah zong a in ve caah zaangfah awk in a thi, cun a nunnak cu a inn he aa hlatnak tlangpar ah a dong. 29 A hawipa Filip nih a ruak cu a hun tlunpi nain Antiochus fapa a a ṭih caah Izip ram Ptolomy Filomitor inntual ah a thli tein a kalpi.