SIRACH 24

Fimnak kong biaruahnak

24 Fimnak nih amah thangṭhatnak kong a chim, a mi hna lak ah a sunparnak cu a chim. 2Cungnung Bik ca tonpumhnak ah a kaa a aang i Zei zong tuah kho Bawipa hmaika ah a sunparnak cu a chim.  3‘Keimah cu Cungnung Bik hmurkaa in ka chuak i vawlei kha minmei bang ka khuh. 4Ka thlaam cu a sannak ah khin a um i ka bawiṭhutdan cu khuadawm tlangpi khi a si. 5Keimah lawng nih van kualpi cu ka ser i rili thukpi chung ah kaa chawk. 6Rili tilet cung le vawlei pumpaluk cung ah le minung le miphun hna cung ah kaa hel. 7Hi vialte ah hin khuazei ah dah kaa dinh lai i khua ka sak lai ti ka kawl.

8Cun zei zong Sertu nih lam a ka chimh i a ka sertu nih ka thlaam ka sak nakding cu a ka chimh. Amah nih, ‘Na thlaam cu Jacob ah sa law Israel cu na ro si seh,’ a ka ti. 9Caan a rak umka in a hramthawk in a rak ka ser i a zungzal in ka um lai. 10Amah hmai, a thlaam thiang ah cun amah kha ka rianh i cuti cun Zion ah khua ka sa. 11A dawt mi a khualipi ah cun Bawipa nih dinhnak a ka pek i Jerusalem ah cun ka nawlngeihnak cu ṭha ngai in ka hman. 12Thluachuak mi miphun, Bawipa chawva le a rohmun ah cun ka hram ka bunh. 13Lebanon i Sidar kung le Hermon tlang i cypress kung bang ka ṭhang i ka sang. 14Eg-gedi i ungkung le Jericho i rose burbuk bang ka ṭhang i ka sang; cun nelrawn i olive phun ṭha kung le tiva kam i farkung bang ka ṭhang i ka sang. 15Ka rimhmui cu cinnamon le acanthus bang ka thlah i zihmui phun ṭha bang le galbanum, onycha le labdanum rimhmui le thlaam chungin a chuak mi zihmui rim bang, ka rimhmuinak cu ka thlah.

16Ka ṭengnge cu bungkung bang ka samh, an i dawh i an i rem ngai. 17Kei cu rem ngai in a hram a corhmi mitsur ruang bantuk ka si, ka hnahbor hna nih rumnak le sunparnak thei an tlai.

19A ka duh mi vialte ka panh ulaw ka theitlai cu khim tein ei u. 20 Ka kong theih cu khuaihliti nakin a thlum deuh i keimah co cu khuaithlar vialte nakin a thlum deuh. 21A ka ei mi cu an rawl a ṭam ti lai lo i ka ti a ding mi cu an ti a hal ti lai lo. 22Ka nawl a ngai mi cu ningzahnak an tong bal lai lo i ka chim ning bang in a cawl mi cu an sual bal lai lo.

18Keimah cu aa dawh ngai mi dawtnak, ṭihzahnak, theihhngalhnak le a sunglawi mi ruahchannak i nu ka si. Bawipa hrimhrim nih a min a sak mi a fale hna kha keimah cu a ka zohkhenhter hna.

Fimnak le Phungbia

 23Hi vialte cu zei dang si lo in Cungnung Bik Pathian i Thisen biakamnak Cauk, Moses nih a kan pek mi Phungbia, Jacob tefa hna rosung a si.   25Hihi fimnak kha Pison bantuk in le fang ṭuan caan Tigris bang in a liamtertu a si, 26Thiamnak kha Euphrate le fangṭuan caan Jordan bang a liamtertu a si; 27cun Nile kha ningcang tein a luanter i mitsur lak lio Gihon bang a liamter. 28Minung hmasa nih a hmu dih kho lo i hmanung bik pa zong nih a keneh cu a zul kho lo, 29zei cah tiah a ruahnak cu rili nakin a kau deuh i a khuakhannak cu rili thuk nakin a thuk deuh. 30Cun keimah cu tipi i tivate bang le 41dum chung i luti bang ka si, 31 keimah nih, ‘Ka kuhthing dum cu ti ka toih lai i ka pangpar cu ti ka pek hna lai,” ka ti. Zoh hmanh ka tivate hna cu tivapi ah aa cang i ka tivapi hna cu rili ah aa cang cang. 32Ka chimhhrinnak cu zing khuaceu bang ka ceuter i ka ceunak cu lamnai ti lo lamhlat ti lo ka pek lai. 33Ka cawnpiaknak cu profet bia bang le chanthar hna rothil bang ka surter lai.34Cun keimah ca lawng ah si lo in fimnak a kawl mi vialte hna caah ka ṭuan cu philh hlah u.