SIRACH 30

Ngakchia zohkhenhnak

30 A fa a daw mi poh nih a fapa cu atu le tu a velh, cucu kum tampi hnu ah a hnangamnak a si naklai a si. 2A fa cung ah a hrang mi poh nih a theipar a zun te lai, amah cu a hawile hna sin ah aa uanthlarpi khawh lai. 3A fapa fim a chim mi poh cu a ral hna nahchuahnak a tong te lai, cun a hawile hna hmai ah aa chor te lai. 4A pa a thih hmanh ah a thi taktak lo, zei tin tiah amah bantuk kha a chiahtak cang.  5A nun chung vialte hawikom ṭha a ngei, nuamhnak a hmu i a thih tikah a lungre a thei ti lo.  6A ral hna teirul a chamtu le a hawile hna dawtnak a chamtu kha a chiahtak cang.

7A fapa cung i a nem tuk mi poh nih a hma a tuampiak te lai, authawng a theik tik poh ah a molh te lai. 8 Ṭha tein hrem lo mi rang cu a lung a khawng i zoh sawhsawh mi fapa cu a lung a khawng ve. 9Na fa kha a duhnak zul law a hnu ahcun an tlerh te lai, amah he lente i celh law na ngaih an chiatter te lai.

10Amah he va ni hlah, cuti na tuah ahcun hnu ah na ṭahpi te lai.  11A ngakchiat lio ah zalonnak pe hlah law a palh tikah na mit chinpiak hlah. 12A no lio ah a hngawng mer, a ngakchiat lio ah a hnakruh khiak, cu lo ahcun ziachiat le lungkhawn in a ṭhang lai i fahnak nganpi an pek te lai. 13Na fapa cu fak ngai in cawnpiak, cun na lung sau seh, cu lo ahcun, chimh a har  caah naa ngaihchih te lai.

Ngandamnak

14Pumsa a dam lo mi mirum si nakin a dam i a ṭhawng mi misifak si a ṭha deuh. 15Damnak le thazaang cu zei sui hmanh nih a tluk lo, pumrua nganpi cu relcawk lo chawva nakin a ṭha deuh. 16Pumsa damnak a tluk mi rumnak a um lo, lungthin nuamhnak a tluk mi zei lawmhnak hmanh a um lo. 17Zaangfah awk nunnak nakin thih a ṭha deuh i zawtnak ṭha lo ngeih nakin zungzal dinhnak a ṭha deuh. 18A hmur a cip mi pumh hnawh mi thil ṭha hna cu thlaan cung chiah mi rawl he an i khat. 19A ei i a rim zong a tep kho lo mi milem sin  ah rawl chanh cu zeidah a ṭhathnem? Bawipa mithmaichia nih a dawi mi mi pakhat cu zei tin dah kan chim lai? 20Ngaknu dawhte a kup mi tildit bantuk a si, a zoh i a thawpi a chuah – zei tin a thawpi a chuah!

Lunglawmhnak

21Nangmah le nangmah kha ngaihchiatnak i teiter hlah, lungfahnak in i hrem hlah. 22Lunglawmhnak cu mikip ca ah nunnak a si, lungnuamhnak cu nun khuasaunak a si. 23Na ngaihchiatnak chia law i hnem, ngaihchiatnak cu hlatpi ah dawi; zei cah tiangaihchiatnak cu mi tampi ca ah rawhnak a rak si cang, cun aho ca hmanh ah a ṭha lo. 24Nahchuahnak le thinhunnak nih na chan an tawiter, cun lungretheinak nih kumno tein mi a upatter. 25Mi lungput ṭha nih kheng ṭha a ser i nuam tein a ei mi cu a si..