SALM 45:1-17

Bawi nupi thit hla

45. 1 Hla dawh nih ka lung a ka hlauh, siangpahrang cu biazai in ka chawnh, ka lei cu catial thiam cafung ceo a si ko. 2 Nang cu pa vialte lak ah na cuang khun, na hmurka i bianem cu rialti dai ko khi an lo, zeicahtiah Pathian nih zungzal in thlua an chuah cang. 3 Paraltha, na vainam cu na tai ah i thlaih tuah, na lianhngannak le sunparnak he rang i cit in, 4 biatak, nunnemnak le dinfelnak ca ah, hmai ah fongchin ko. Na likuk hri cu fakpi in zam, na orhlei kut in tlerhkhon hna.

5 Na fei cu an har, miphun hna cu na zaangfahnak hal in an bawk ko, siangpahrang i ral hna cu an si a vang cang. 6 Na bawi thutdan cu Pathian sin in a si, zungzal in a hmun, na siangpahrang thiangthunh cu dinnak thiangthunh a si; 7 dinnak cu na duh i thatlonak cu na huat. Cu ruangah Pathian, na Pathian nih lawmhnak chiti an thuh cang, an zuamcawhtu he i lo loin, 8 na hnipuan cu mura le aloe zihmui in a hmui. Vuiho innpi in, tingtang hna nih lawmhnak an in pek. 9 na hnu in aa tlar mi hna cu siangpahrang fanu hna an si, ophir suihlawn he bawinu cu na orhlei kam ah khan a dir ko.

10 Ka fanu, ka bia cu tha tein ngai law thei tuah, na miphun le na pupa hna inn cu philh hna; 11 cun siangpahrang nih naa dawh caah an tlaihchan lai; 12 amah cu na bawi a si, a hmai ah cun kun. 13 Tair fanu hna nih na mithmai tha cu, laksawng hna he, cun mirum bik hna cu suihlawn thil hna he, an kawl te lai. 14 Hnipuan dawhdawh hna he siangpahrang fanu cu, a hnuzul lengdawh hna he, siangpahrang innchung ah an luhpi; a hawile hna cu a sin ah an hruai ve hna. 15 Siangpahrang innpi chung ah lunglawm thanuam in an lut hna. 16 Na pupale hna can ah fapale na ngeih hna lai; annih cu vawleicung vialte uktu ah na ser hna lai. 17 Na min cu chankhat hnu chankhat ka hmunhter lai, cuticun miphun hna nih na thang`hatnak cu zungzal an sak lai.