1 Maccabaeus 2

II. MATTATHIASS NIH RAL THIANG A THAWK

     Mattathiass le a fapale hna

2 1Cu hrawng ah cun Joarib chung tlangbawi Simeon i fapa Johan i a fapa Mattathias cu Jerusalem in a chuak i Modein ah a va um. 2Fapa panga a ngeih hna i anmah hna cu – Gaddi ti hngalh mi Johan, 3 Thassi ti auh mi Simon, 4 Maccabi ti auh mi Judas le 5 Avaran ti auh mi Eleazar le Affus ti auh mi Jonathan hna an si. 6Jerusalem le Judah ram ah Pathian sersatnak an tuah mi kha a hmuh tikah amah nih: 7 "Ai zee, ka mi hna rawhnak le a thiang khualipi rawhnak tehte khaan awk le khualipi a ral hna kut ah le a hmunthiang cu ramdang mi hna kut ah an chanh kha ṭhu in zoh ko ding in ka rak chuah cu mi vanchia ka va si dah! 8 "A Biakinnpi cu mithmai a ngei lo mi ah a cang cang, 9a rak sunparnak thilri hna cu hranchaw ah an kalpi cang hna, bawhte rual hna cu zatlanglam ah thahnawn an tong, a tlangval no hna cu ral vainam in an ciam cang.10 A bawi rumnak a rak i hrawm lo mi miphun le a hranchaw a rak la ve lo mi miphun pakhat tal an um maw? 11Aa ṭamhnak vialte cu an lakpiak dih cang, khuatuan i a zalennak cu a salcannak ah a cang cang.12  Kan hmunthiang, kan i dawhnak le kan sunparnak cu zei tin dah a tu an hrawh dih ti cu zoh tuah hmanh u! 13Kan nunchan zei dah a um ti? tiah a ti.  

14 Mattathiass le a fapale hna cu an hnipuan an thleh, buri an i hruk, cun an ṭap i an hraam.

Modein i ṭihnung raithawinak

15 An phung kaltak awk hnekchih ding in siangpahrang nih a thlah mi hna cu thawinak tuah awkah Modein khua ah an rak phan. 16 Israelmi tampi hna cu an velchum ah an i pum nain Mattathiass le a fapale hna cu adang tein an um. 17 Cu tikah siangpahrang thlah mi hna nih Mattathiass cu a tanglei bang in an chimh: "Nangmah cu hika khua ah upat mi hruaitu le milianngan na si; an dirkamhtu ding fapa le unau na ngei hna. 18 Miphun vialte, Judah hruaitu vialte hna le Jerusalem i kaltak mi hna nih an tuah cang bang in rak chuak law siangpahrang nawl a zul hmasa mi si tuah; nangmah le na fapale hna cu Siangpahrang Hawi ah ruah nan si lai i nangmah le na fapale hna cu sui le ngun le laksawng tampi hna he upatnak pek nan si lai," tiah an ti. 19Mattathiass cu a bia kha a tan i aw thang pi in a ti mi cu: "Siangpahrang pennak chung miphun vialte nih a bia an ngaih i a nawl zulh duh ah an pupa hna biaknak kha an kaltak hmanh ah, 20 kei, ka fapale hna le ka unau hna cu kan pupa hna thisen biakamnak kha kan zulh rih ko lai. 21A Phungbia le a zulhphung hna hlawtnak in van nih kan huppheng ko seh! 22Siangpahrang nawl tu cu kan zul lai lo; kan pupa hna biaknak in kehlei zong orhlei zong kan i mer lai lo," tiah a leh hna. 23 Biachim a vun dih bak in siangpahrang nawlpeknak bang in, Modein khua biakṭheng cung ah zapi hmuh in raithawinak pekchanh awkah Jew pakhat cu a rak chuak.  24Mattathiass nih a hmuh tikah a thin hun a celh lo tuk cang, a pumpaluk in ther i a dik mi a thinhunnak cu a chuah, mipa cu a vun zuanhnawh i biakṭheng cung ah khan a saam ko. 25Raithawinak tuah ding mi a hnektu ding siangpahrang palai zong kha a thah, cun biakṭheng zong kha a hrawhchih. 26 Phungbia kha a ṭanh tuknak ah Finehas nih Salu fapa Zimri cung a rak tuah bantuk khan a tuah ve. 27 Cu hnu ah Mattathiass cu khuapi chung ah aa chawk, cun a aw dih-um in : "Phungbia a ṭanh mi le thisen biakamnak aa tlaih mi poh rak chuak ulaw ka hnu ka zul u," tiah a au. 28 Cu hnu ah an chawva vialte kha khuapi ah kaltak in a fapale hna he tlangram ah an zam.

Thetse ram chung Sabbath ni thahnawnnak

       29 Dinnak le ṭhatnak kong a tuaktantu tampi cu thetse ram ah an kal i cuka ah cun an va um; 30  an fale le an nupile le an saṭil hna zong kha an i kalpi hna caah an tuar a fak ko. 31 Zungbawi hna le David Khualipi, Jerusalem, i a ṭhu mi hna sin ah siangpahrang nawl a ngai lo mi hna cu thetse ram ah an kal i an i thup ti bia a thang. 32 A ṭhawng ngai mi ralkap bu nih an dawi hna, cun an sin an phanh tikah hmunhma an la i anmah kha Sabbath ni ah tuk ding in an i tim, 33 cun annih kha, "Hi vial in za cang seh; rak chuak ulaw siangpahrang nih nawl a pek bang in tuah u, cun nan luat lai,” tiah an ti hna. 34 Sihmanhsehlaw khatlei mi hna nih annih kha, "Kan chuak lai lo; siangpahrang nawl kan ngai lai lo i Sabbath ni zong kan buar lai lo," tiah an leh ve hna. 35 Cu tikah bawi ralkap hna cu an hriamnam an i lak i an tuk colh hna, 36 sihmanhsehlaw khatlei mi nih an rak tu ve hna lo; lung pakhat hmanh an i char lo i an i thuhnak hmun zong kha an khar lo. 37 An chim mi pakhat te cu: "Zei sualnak hmanh tuah lo in thi ko usih; zei din lonak ruang hmanh si lo in nan kan thah ti cu van le vawlei nih hmu ko seh," tiah an ti. 38 Sabbath ni hrimhrim ah fakpi in an tuk hna; an nupile an fale hna le an saṭil hna he minung thongkhat khengte an saam dih hna.

Mattathiass le a phu hna cawlcanghnak

39 Mattathiass le a hawile hna nih thawng an theih tikah fakpi in an ṭah hna i 40 pakhat le pakhat kha: "Kan unau hna bang in kan tuah, cun kan nunnak le biaknak ca ah Jentailmi hna kha kan doh hna lo a si ahcun vawlei hin tuante ah kan lo dih cang lai," tiah an ti. 41 Cu tikah mahka ah khan hiti hin biakamnak an tuah colh, "Mi pakhatkhat nih mizei a si ah, Sabbath ni ah an kan tuk a si ahcun kan doh ve lai, kan unau hna an i thuhnak cung i thil a can bang in kan i thahter hna lai lo.

       42A rauh hlan ah Hasidaean bu an rak i fonh ve, annih cu Israel raltuk ṭhawng taktak mi an si i annih pakhat cio cu Phungbia ca i a caan aa pe mi an si. 43 Hremnak in a zam mi vialte hna zong an rak i fonhchih rih i an thazaang aa chap ngaingai. 44 Hriamtlai phu ah an i chuah, an thin linh in misual hna le an thinhun in biaknak a chuahtak  mi hna kha an thah hna, cun a luat mi hna cu an himnak ca ah Jentailmi hna sin ah an zam. 45Mattathiass le a hawile hna cu khual an tlawng i biakṭheng hna kha an thluk,  46 cun Israel ah cuarpar tan lo an hmuh mi ngakchia pa vialte kha hramhram in an cuarpar an tanter hna. 47Mipuarthau kha an dawi hna i an thil tuah mi cu hlawh a tling ngai. 48 Phungbia kha siangpahrang le Jentailmi hna kut in an lak i misual hna cu santlai lo ah an ser hna. 

Mattathias biakamnak le thihnak

       49 Mattathiass cu a kumkhua donghlei a panh tikah a fapale hna kha, “Atu ah puarthaunak le ziachiatnak an kailei a si; buainak le huatnak caan a si. 50 Atu hi ka fale hna, Phungbia ca ah meialh in alh i kan pupa hna thisen biakamnak ca nan nunnak pek caan a si.

51Kan Pupa hna nih an chan cio ah an rak tuah mi thil hna kha philh hna hlah u, upatnak nganpi le zungzal minthannak nan hmuh lai. 52Abraham cu hneksaknak a tuar hnu ah zumhtlak a sinak kha a lang, cucu a dinfelnak ah hmuhpiak a si lo maw?  53 A ngaihchiat lio ah Josef cu Phungbia kha aa tlaih peng caah Izip ah bawi a cang. 54 Kan pa Finehas zong phung a ṭanh tuk caah zungzal tlangbawi sinak kha a rak hmuh. 55Joshua zong a rian kha a rak ṭuan caah Israel biaceihtu ah a cang. 56 Caleb zong aa pum mi hna hmai ah tehte a khaan caah, ram cu ro ah a rak co ve. 57 Siannak lungthin a ngeih caah David cu zungzal pennak i bawi ṭhutdan a rak co.58 Elijah cu Phungbia a rak ṭanh tuk caah vancung ah cawi a rak si.59 Hananiah, Azariah le Mishael hna cu zumhtlak an nunnak caah mei chung in khamh an rak si. 60 Daniel cu a lungthin thiannak ca ah chiandeih kaa in tlanh a rak si. 61Cucaah chankhat hnu chankhat amah aa ruahchan mi cu an sung bal lo ti cu hngal tuah. 62 Misual tlerhkhonhnak cu ṭih hlah u; ralṭhatnak a langhter mi vialte cu non le tholung ah an cang te lai. 63Nihin ah cawisan a si nain thaizing cu hmuh khawh a si ti lai lo; zei cah tiah a rak chuahnak leidip ah a kir ṭhan cang i a khuakhaannak vialte cu zei hmanh lo ah a cang cang. 64 Ka fale hna Phungbia ca ah nan lung fek seh law nan ral ṭha seh, zei cah tiah sunparnak kha an pek hna lai.  

65 "Nan unaupa Simon cu hika ah a um ko hih; amah cu a khuaruahnak a dik ti cu ka hngalh. Nan nun chung vialte a bia ngai u; nan pa can ah i lak u. 66  A hmet lio tein a ral a ṭha i a ṭhawng mi Judas Maccabi cu nan ralbawi si seh law Jentailmi hna tuknak ah rak in hruai hna seh. 67Adang vialte cu Phungbia a ṭanh mi hna ah khan nan ṭuanvo a niam le a san ning cio in chungtel ah rak lut ve ulaw nan miphun ca ah teirul rak cham hrimhrim u.  68 Jentail hna kha tling tein teirul rak cham ulaw Phungbia kha fek tein rak i tlaih u," tiah biaro a vuih hna. 69 Cu hnu ah thluachuah a pek hna i a pupa hna sin ah aa din ve. Kum 146 ah a thi i Modein khua i a pupa hna thlaan ah an vui i Israelmi dihlak nih lungfak ngai in a zun an ngaih.