2 Maccabaeus 3

III: HELIODORUS TUANBIA

Jerusalem ah Heliodorus a phanhnak

3 Tlangbawi ngan Onias thianhlimnak le ṭhatlonak a huatnak thawng in a thiang mi khualipi cu dai zirziar in a um i zulhphung hna cu a si khawh chung in an zulh hna tikah 2 Siangpahrang hna hmanh nih a thiang mi hmun kha an upat i Biakinnpi sunparnak cu an pekchanhnak liangluang nih a tleu in a tleuter, 3 Asia siangpahrang Seleucus hmanh nih amah pumpak ngunkhuai chung in pumhnak ca dih mi vialte kha a pek dih. 4Sihmanhsehlaw Bilkah phun  Simon ti mi pa cu Biakinn zokhenhnak rian an pek tikah khuapi chawdawr tawlrelnak kong ah tlangbawi ngan he theihthiam lonak an ngei. 5Onias a tei lo tikah, a a chuak i Thraseo fapa Apolonius sin ah a va kal; amah cu mah lio ah cun Coele-Siria le Fonesia ralbawi lu bik a si, 6cun amah kha, “Jerusalem chawkuang chung i chawva liangluang hna cu an hrum cang, relcawk an si ti lo i thawhlawm cu thawinak ca a dih mi he tahchunh tlak lo, siangpahrang lawng nih ṭuanvo a lak khawh cang lai ti in ṭawnchom in a chimh.  7Apolonius nih  siangpahrang cu a ton i amah kha a sin an phuan mi chawva kong vialte cu a chimh dih.  Cu tikah siangpahrang nih a zungbawi, siangpahrang changtu, Heliodorus kha a thim i mah chawva vialte va lak  awkah a thlah. 8Heliodorus zong aa thawh colh ve, hmuhnak ah Coele-Siria le Fonisia khua hna a tlawn ding bang, a taktak ah cun siangpahrang fial mi va tuah awkah a si. 9Jerusalem a phan i tlangbawi ngan le khualipi nih sunglawi ngai in an don hnu ah amah nih thawngthanhnak kong le khika a umnak a ruang cu a chimh hna, cun thil hi a si takmi a si maw tiah a hal hna. 10Tlangbawi ngan nih nuhmei le ngakṭah hna ca ti kulh mi tangka, 11cun a cheu cu Tobias fapa Hyrcanus, riansang ngai a tlai mi pa a tangka hna an um, cun mi ṭha lopa Simon nih a chim ning he i kalh in kan ngeihmi dihlak cu ngun ṭalen zali le sui ṭalen zahnih bak a si,” tiah a fianter. 12Cun amah nih hmun a thiannak an zumh caah le vawlei pumpaluk ah a min a thang mi Biakinnpi a liannganhnak an zumh caah an chiah mi chawva cung i din lonak tuah ding cu a si kho hrim hrim lo mi a si,” tiah a chapchih.

Jerusalem ah lungretheinak a tlung

13Sihmanhsehlaw siangpahrang bia a um ve caah Heliodorus nih mah chawva cu siangpahrang ngunkuang ca ah lak ding a si a ti chih. 14Khon mi tangka apnak ni kha a khiah i thilri hna cazin cu a lak. Khualipi chung ah buainak ṭhalo tein a chuak cang:  15Tlangbawi hna cu an tlangbawi thuam hna he biakṭheng hmai ah an bawk i thawhlawm cu a chiatu hna duh ning in him tein a um khawh nakhnga thawhlawm ca phunglam a sertu Vancung zoh in thla an cam. 16Tlangbawi ngan mithmai nih a cuantu hna lungthin cu fei bang a chunh, a biachim le a hmai umtu ning nih a ngaihchiatnak a langhter lo; 17A ṭih le a ther tuk ah a hmutu nih a ngaihchiatnak cu hmuh dih khawh a si. 18 A thiang mi hmun zei rel lonak ruang ah nawlnak tuah duh ah  mipi cu an inn cio in an rak chuak lulh. 19Nutung hna cu buri kha an hnuk-tang tiang an i men i an rak i tlar; inn i aa erh ko mi nungak no hna zong a cheu kutkalei ah a cheu khualipi vanpanglei ti in an rak tli, a cheu cu thlalangawng in an rak bih,  20an dihlak in Vancung ah an kut hler in nawlnak an tuah. 21Bawk ding ah a ra lulh mi mipi le a ngaih a chia tuk mi tlangbawi ngan hmuh cu zaangfak ngai a si ko. 22Thawhlawm cu a chiatu hna duh ning in a um khawh nakhnga zei zong tuah kho Bawipa sin i nawlnak an tuah lio ah; 23Heliodorus tu cu an fial mi rian ṭuan awkah a cawngtu hna he aa thawh ve.

Heliodorus dantatnak

24A cawngtu hna he Ngunkuang pawng a phan cang, cu lio ah ṭhawnnak le thlarau vialte cung Nawlngeitu nih a nung tu kmi hmelchunhnak a tuah caah Heliodorus a rak zul ngam mi vialte cu Pathian ṭhawnnak an hmuh tikah an ar i an ṭih tuk cang. 25An mit ah khan dawh ngai in ṭamh mi rangtumpi cu a cung i a ṭhu mi ralbawi pakhat he a rung lang. Cu rang cu hnawh ngai in a rung lut i Heliodorus kha a hmailei ke in a lamh. 26Cu caante ah cun a ṭhawng ngai mi le a thuam a tleu ngai  mi tlangval pahnih cu a hmaiah an rak chuak, a kam ah khan pakhat veve in an dir i amah kha ngol lo in an tuk thluahmah. 27Hmakhatte ah Heliodorus cu a tlu i khuamui nih a khuh. A mi hna cu amah chanh awkah an ra i amah kha laang cung ah an chuan. 28Kan in chimh cang hna bang in atu nai ah ngunkuang ah a ralkap le a zultu hna tampi he a rak ra mi hi mipa cu zei tuah kho lo in an kalpi tikah zeizong tuah kho Pathian lianngannak cu an cohlan cang.

29Heliodorus cu Pathian lennak tang ah holh khawh lo le chanhnak ding ruahchannak ngei lo in a bawh ko lio ah Jew hna cu khuaruahhar ngai in a thiang mi hmun sunparnak a petu Bawipa cu an thangṭhat. 30Cun atu nai ah thinphannak le ṭah aihramnak in a khat mi Biakinnpi cu Bawipa lianngannak aa phuannak thawng in lunglawmh le thanuamhnak in a khat. 31Heliodorus hnuzul cheukhat nih Onias cu mithi bang a it mi an bawipa nunnak cu a khamh nakhnga Cungnung bik Pathian sin nawlpiak ding ah khulrang in bawmhnak an hal.

32Tlangbawi ngan Onias cu Heliodorus kong ah Jew pawl nih thil dik lo pakhat an tuah tiah siangpahrang nih a ruah sual nakhnga lo mipa a damnak ca ah thawinak a pekchanh taktak ko. 33Cutin tlangbawi ngan nih sualthawinak a tuahpiak lio ah cun hmasa tlangval pahnih hna kha an thuam kel he an rung lang ṭhan, a pawng ah an dir i amah kha, “Tlangbawi Ngan Onias cu lawm ko, zei  cahtiah amah mithmai zoh in  Bawipa nih na nunnak an zuah. 34Nangmah tu cu vancung in daantat cang mi na si bang in mi vialte sin ah Pathian lianngan sunparnak na thanh lai, ,” tiah an ti. Cuti an chim pah in an lo. 

Heliodorus lungthlennak

35Heliodorus nih Bawipa sin  ah thawinak a pekchanh i a nunnak a zuah caah biakamnak nganpi a tuah; cun Onias hmai in upatnak nganpi he a chuak i siangpahrang sin  ah cun a ralkap hna he a kir. 36A mit hrimhrim in a hmuh mi Pathian lianngannak kha mikip sin ah langhngan in tette a khaan. 37Heliodorus kha siangpahrang nih a voihnihnak ah Jerusalem ah aho thlah ah dah a ṭhat hnga ti a hal tikah amah nih, “38"Ral zei maw asilole chimh ngai lo pakhatkhat na ngeih ahcun annih kha thlah hna, mah a thianghlim hmun ah cun khuazing ṭhawnnak phunkhat a um caah an nung in an rak kir hmanh ah fungtuk hma he an rak kir hrimhrim lai. 39Vancung i a um mi pakhatkhat nih khi hmun cu a zokhenh a dirkamh i harnak pek ding ah a ra mi poh cu a tuk i a thah hna,” tiah a leh. 40Hihi Heliodorus le ngunkuang kilvennak kong buainak i a theipar a si.