SALM 33:1-22

Bawmhchanhnak hla thiang

33. 1 Nannih miding hna nuam in au tuah u, thang`hatnak cu milungthiang hna sin in a ra. 2 Tingtang tum in Bawipa cu thang`hat tuah u, amah kha hrihra-ngei tingtang tum in thang`hat tuah u. 3 Amah sin ah hlathar sa tuah u, teinak ringawn cu a sin ah thlah tuah u. 4 Bawipa bia cu a ding, a tuah mi vialte cu zumhtlak a sinak in a chuak mi an si. 5 Felfainak le dinnak cu a duh; vawlei cu a fek mi Bawipa dawtnak in a khat.

6 Van hna cu Bawipa bia in, van arfi le thlapa vialte cu a thaw in ser an si. 7 Rili ti dihlak cu tidil bang a khon hna, rili thukpi cu a chawva-inn chung ah a khon hna. 8 Vawlei pumpi nih Bawipa cu `ih seh, vawleicung um vialte nih amah cu upat hna seh; zeicahtiah, bia voikhat a vung chim in thil cu an hung cang, 9 nawl a pe cangka in zulh an si colh.

10 Bawipa nih miphun hna khuakhaan lairelnak cu pingpalo ah a chiah hna, an ruahnak cu hlawh tling lo in a chiah hna, 11 sihmanhsehlaw Bawipa khuakhannak, a pek mi ruahnak hna, cu a fek i zungzal in hmun. 12 An Pathian ah Bawipa aa ser mi miphun le a roco ah a thim mi miphun cu zei tluk thluachuah dah an si.13 Van khin Bawipa nih a run zoh hna, Adam fale vialte cu a hmuh dih hna, 14 a `hutnak hmun in vawlei khuasa vialte cu a ngiat dih hna; 15 amah lawng nih an lungthin cu a sersiam, an tuah mi vialte cu a hngalh dih.16 Ralkapbu nganpi nih siangpahrang cu himnak a pe lai lo, cun a `hawnnak nih paral`ha nunnak cu a khamh fawn lai lo; 17 himnak ca ah rang hna i bochan cu mah le mah i hlen a si, zeicahtiah a `hawnnak vialte nih amah cu a khamh kho lo.18 Sihmanhsehlaw Bawipa nih amah a `ih mi hna, a fek mi a dawtnak aa hngatchan mi hna cu zeitin a zohkhenh hna ti cu hmu tuah u, 19 cucu annih kha thihnak in chanh awk ah le mang`am caan ah himbawm tein chiah hna awk ah a si. 20 Kannih cu Bawipa kha kan hngak; amah cu a kan bawmtu le kan phaw a si, 21 zeicahtiah amah ah kan lung aa nuam, a min thiang kan i bochan. 22 Bawipa, kan ruahchannak cu nangmah ah kan chiah bang in a fek mi na dawtnak cu kan cung ah hmun hram ko seh.