SALM 44:1-26

Saltaang Levimi hram thawng

44 1 Pathian, hlan ah na rak tuah mi thil hna, an chan ah thil na rak tuah mi hna, cu kan pupa hna nih an kan chimh i kanmah hrimhrim zong nih kan rak theih. 2 Anmah kha khi ram ah umter hna awk ah miphun dang hna cu na rak `hawl hna, an ca hmun serpiak awk ah midang cu harnak na rak pek hna. 3 Khi ram cu an hriam in an rak co mi a si lo, cun an vainam nih teinak a rak pe hna lo, na kut le na baan, cun na umnak i ceunak, nih teinak a rak pek hna, zeicahtiah annih cu na rak dawt hna.

4 Jacob teinak ca nawl a rak chuahtu cu, ka siangpahrang le ka Pathian, nangmah na si; 5 nangmah thawng in a kan ralchanhtu hna cu kan tei hna, ral a tho mi hna cu na min in kan cil dih hna. 6 Zeicahtiah kaa bochan mi cu ka likuk a si lo, ka tei cu ka vainam thawng a si lo; 7 a ka dohtu hna sin in a ka khamhtu cu nangmah na si, nangmah nih a kan huatu hna cu ningzak in na chiah hna. 8 Kan i chornak cu zungzal in Pathian ah a si, na min cu ngol lo in kan thang`hat. 9 Asinain atu cu na kan hlawt i puanlu na kan khuh, kan ralkapbu hna he ralram ah na kal ti lo, 10 kan ral hna hmai tlukrilh awk ah na kan kaltak; a kan huatu hna nih duhduh in an kan chuhramh. 11 Thah ding tuu hna bang an kut ah na kan chanh, miphun hna lak ah na kan `hekdarh, 12 na mi cu thil hmete ah na zuar i a miak zei hmanh na hmu lo.13 Kan innpa hna nihsawh awk, kan pawngkam hna capo in saih awk le nautat awk men ah na kan ser. 14 Miphun hna lak phailen awk ah na kan ser, midang hna nih an lu an kan thinhnawh.

15 Chun nitlak ka hmai a chia, ka hmai ah fiang tein aa `ial mi ningzahnak a si, 16 cucu serhsatnak le zawmhtaihnak aw le huattlai le teirulchamnak ka hmuh mi hna ruangah a si. 17 Nangmah cu kan in philh rih lo, na biakamnak zong kan buar rih lo, 18 nangmah cu kan in mertak rih lo, na lam in kan pial rih lo nain hi vialte cu kan cung ah an tlung. 19 Ram-ui hna tlonlennak si ding in na kan cil i thihnak khuamui lak ah na kan hlonh. 20 Kan Pathian min kha kan philh i kan kut cu pathian dang hna sin ah kan rak thlir a si ahcun Pathian nih a rak kan hmu hnga lo maw?’ 21 zeicahtiah amah cu lung chung ruahnak tiang a hngal mi a si. 22 Nangmah ruangah chunnitlak an kan thahnawn i thah ding tuu bang an kan serhsat. 23 Bawipa, i hlau tuah! Zeiruangah dah naa hngilh? I hlau tuah! Zungzal ca in kan hlaw hlah, 24 Kannih cu sifak le namneh mi kan si timi philh in zeiruangah dah na kan mertak? 25 Zeitintiah kannih cu leidip kha kan hnamh cang, kan pum cu vawlei ah aa benh cang. 26 Tho! kanmah bawmh awk ah ra cang! A fek mi na dawtnak nih a hauh bang kan chanh tuah.