SIRACH 4

4 1Ka fa, misifak kha a pawcawmnak ah va bawm, misifak cu va hngar hlah. 2Rawlṭam mi kha a ngaih va chiatter hlah, aho hmanh ngaihchiat in va umter hna hlah. 3A thin a hung cang mi cu va hunter chin hlah, cun mi vanchia kha na dawtnak va hngahter hlah. 4Nunhar in a vak mi kha va dawi hna hlah law misifak cu va bawm hna. 5Misifak sin ah na mit chin hlah law aho hmanh chiatserh khawhnak caan ṭha pe hlah; 6zei cah tiah mi pakhat nih ngaihchia in chiat an serh ahcun amah a Sertu nih a thlacamnak a theihpiak lai. 7Mibu i dawtnak co i zuam law upa hmai ah na lu va kun. 8Misifak kha an bia va ngaihpiak hna law mi i chawnhbiaknak cu ṭihzahnak he va let hna. 9Hrem mi hna cu hremtu hna kut in va chanh hna, cun bia cu nemnak in va ceih.  10Pa ngei lo kha pa canpiak hna law an nu hna sin ah an pasal bang va ṭha. Cu tikah nang cu Cungnung Bik i fapa bantuk na si lai i amah nih na nu nakin an dawt deuh lai.

Fimnak cu cachimtu a si

 11Fimnak nih a fale hna cu a cawm hna i amah a kawl mi hna cu a zohkhenh hna. 12Amah a daw mi poh nih nunnak a dawt  ve i amah kha tuante in a kawl mi hna cu an i lawm lai. 13Amah a co mi poh nih upatnak an co lai i a kalnakkip ah Bawipa nih thluachuah a pek lai. 14Amah a rianh mi hna cu a Thiang Bawi kha an rianh a si i Bawipa nih amah a daw mi hna cu a dawt ve hna. 15A nawl a ngai mi poh nih ram kha an uk lai i a bia a ngai mi poh cu an him lai. 16Amah kut ah aa chanh ahcun amah kha a co lai i a tefa hna nih amah cu an co zungzal lai; 17zei cah tiah a hrawmthawk ah amah kha lam kilkawi in a hruai, ṭihnak le phannak a hmuhsak; bochantlak a si tiang a phunglam kha a zulhter i harnak tampi in a hneksak nain 18 a hnu ah lam ding in a sin ah a rak kirpi i amah kha lawmhnak a pek, cun a sin ah a biathli a phuan. 19Sihmanhsehlaw lam a pial ahcun a hlawt lai i a kaltak lai.

Zoh dawh nun le lungthin thiannak

 20Na pawngkam kha zoh law ṭhat lonak kha i ralring, cun na mual a pho lai lo; 21zei cah tiah sualnak ah a hruai mi ningzahnak a um i upatnak ah a hruai mi ningzahnak a um.  22Nangmah le nangmah i hrem tuk hlah, ningzahnak nih rawhralnak ah in hruai hlah seh. 23Caan a rem tikah biachim i sum hlah, cun na fimnak cu thup hlah; 24zei cah tiah na chim  mi in na fimnak a lang i na chim mi bia in na cawnnak cu na langhter. 25Biatak cu ralchanh hlah, na hngalh lonak ca tu ah na hmai sen seh.  26Na sualnak phuan ding na ningzak hlah, tiva kha a hratnaklei in kai i zuam hlah. 27Mihrut hmai ah bawk hlah, mi lianngan kha mithmai ṭha pe hlei hlah. 28Biatak ca ah thih tiang tu, cun Bawipa cu nangmahlei ah a ṭang lai. 29 Hmurka ah ral ṭha in na tuahsernak ah thathut le zanguai in i la hlah; 30Inn ah cun chiandeih bang hran in na salle hna cung na ral va chia hlah. 31Cohlannak ah na kut samh in pekṭhenhnak ah na kut vaa sum hlah.