SALM 59:1-17

Mi`halo hna ralchanh in

59 1 Ka Pathian, ka ral hna kut in ka chanh law a ka dotu hna sin in ka huppheng tuah, 2 `hatlonak-tuahtu hna sin in ka chanh law mipuarhrang hna sin in ka khamh ko tuah. 3 Bawipa, zohhmanh, keimah bawh awk ah an i zukpiak khih, mipuarhrang hna nih an ka tuk, 4 Bawipa, zei sualnak, palhnak le `hatlonak hmanh ka tuah lo nain keimah tuk awk ah hmunhma an lak cang khih. 5 I hlau, ka pawng ah dir in ngiat ko hna. Bawipa, van ralkap run Pathian, Israel Pathian, miphun vialte hna dantat awk ah tho cang, hi mi`halo rawiphiar hmang hna cu zaangfah hna hlah.

6 Khua a mui in cun an kir `han hna, ui bang ngur in khua cu an cul. 7 An kaa ah hriam i seh in, ‘Aho nih dah a kan theih?’ ti in aw thangpi in an au hna. 8 Bawipa, nangmah tu nih cun na nihsawh men ko hna, miphun vialte cu capo ah na saih men ko hna. 9 Ka `hawnnak, kei nih cun mit`hep lo in kan zoh ko. Zeicahtiah ka ralhruang cu Pathian a si, 10 a ka daw zungzal mi Pathian cu keimah ton awk ah a ra lio. Pathian nih cun a ka bawh mi hna cu diriam in a ka zohter hna lai. 11 Ka mi nih an philhsual hna nakhnga lo annih cu hlo dih hna hlah; na `hawnnak in thin hna law thla ko hna, Bawipa, ka phaw. 12 An hmurka ah hin sualnak, an lei ah sualnak, cucaah an i porhlawtnak rap ah i awh ko hna seh, zeicahtiah an chim mi cu chiatserhnak le lihbia lawng te a si. 13 Na thinhun in hrawk ko hna, an lo dih tiang hrawk ko hna, cu tik ah Jacob chung le vawlei pumpaluk ah hin Pathian cu Bawi a si ti kha an hngalh lai. 14 Khua a mui in cun an kir `han hna, ui bang ngur in khua cu an cul, 15 ei ding rawl kha an kawl i an khim hlan lo poh cu an ngur ko hna. 16 Cucaah na `hawnnak cu hla in ka sak lai, zingkate ah a fek mi na dawtnak cu ka thanh lai; nangmah cu ka ralhruang, har caan i kaa dornak na si. 17 Ka `hawnnak, nangmah ca ah ringawn dawh ka thlah lai, zeicahtiah ka ralhruang cu Pathian a si, zungzal in a ka daw mi Pathian a si.