SALM 63:1-11

Pathian hlamnak

63. 1 Pathian, nang cu ka Pathian na si; nangmah cu kan hlam; ramro, ramcar le thetse ram bang ka thinlung nih tihal in an hal, ka taksa nih an hlam. 2 Cucaah na `hawnnak le na sunparnak hmuh duh ah na hmun thiang chung i nangmah cu kan zoh ko. 3 A fek mi na dawtnak cu nunnak hrimhrim nakin a sunglawi deuh, ka lei nih an thang`hat lai. 4 Cucaah ka chan chung vialte kan chimthiam lai, na min in ka kut ka thlir lai. 5 Chiti le rawl thawthaw bang, ka duh mi vialte a tling cang, ka lei le ka hmurka cu lunglawmh thang`hatnak hla in a khat. 6 Ka chantling cung in nang kan ruat tik ah zan`im hna ah lawmhnak in ka khat, 7 zeicahtiah nang cu a ka bawmtu na rak si zungzal; na thladem tang ah kaa nuam; 8 ka lung cu nangmah ah aa hngat, na orhlei kut nih a ka domhtlaih. 9 Ka nunnak a kawl mi hna cu vawlei tawne ah tla hna seh; 10 vainam har in at dih si hna sehlaw ram-ui rawl ah cang hna seh. 11 Cu tik ah siangpahrang cu Pathian ah aa lawm lai, amah min in biakamnak a tuah mi vialte cu hmaihngalnak an hmuh lai, zeicahtiah lihchim lei cu daihter an si cang lai.