SALM 9:1-20

Pathian nih mi`halo kha a tuk i mitoidor kha a khamh

9. 1 Bawipa, ka lungthin dihlak in kan lawmh i khuaruahhar na tuah mi hna cu ka chim hna lai.2 Nangmah ah kaa lawm i kaa nuam, Cungnung bik Bawipa, na min cu hla in ka thang`hat lai.

3 Ka ral cu an tawn i na hmaika ahcun an tlu i an rawk dih, 4 zeicahtiah keimah lei `ang in a dik mi biaceihnak cu na tuah cang, miding biaceihtu sinak in na bawi `hutdan ah cun na `hu.5 Miphun dang cu na hro hna i mi`halo cu na hrawh cang hna, an min cu zungzal ca in na hnawh cang hna; na phiah dih cang hna caah zungzal in an rawk dih cang. 6 An khualipi cu na hloh cang hna, anmah philh lonak cu an lo dih cang hna.7 Zohhmanh, Bawipa cu zungzal in a bawi, a bawi`hutdan cu biaceihnak ca ah fek tein a hmunhter; 8 amah hrimhrim nih vawlei cu dinnak in bia a ceih lai, miphun dang cu a dik mi biaceihnak a tuahpiak hna lai.

9 Bawipa cu hrem mi hna ca ah ralhruang, retheih caan i dornak si hram seh! 10 Na min a upat mi nih in hngatchan ko hna seh; Bawipa, nang an kawl mi cu zeitik hmanh ah na kaltak bal hna lo.

11 Zion i a um mi hna, Bawipa cu thang`hat tuah u, thil lianngan a tuah mi kha miphun hna cu chim hna u, 12 zeicahtiah thisen phu a hlamtu nih cun a philh hna lo, cun ngaihchia mi hna `ahnak zong kha zei rel lo in a um bal lo.13 Bawipa, ka zaangfah law ka nganfahnak hi zoh tuah, mithi khua in ka chuah `han tuah, 14 cuticun na thang`hatnak vialte cu Zion fanu hna kutka ah ka chim lai i na khamhnak ah kaa lawm lai.

15 Miphun hna cu anmah nih an cawh mi khor ah an tla cang, an ke cu an chiah mi rap ah aa awh cang. 16 Bawipa cu aa phuang i biaceihnak kha a tuah cang, mi`halo cu an tuah mi chiatnak in a awh hna.17 Mi`halo hna, Pathian philhhmang miphun vialte cu, mithikhua lei ah i mer hna seh. 18 Zeicahtiah miharsa cu zungzal in philh an si lo; cun misifak hna ruahchannak zong pakpalawng a si zungzal lo.19 Bawipa, tho tuah; minung `hawnnak cu zei san a tlai lo. Miphun hna cu na hmaika ah an chuak te lai. 20 Bawipa, annih kha tlalaunak in tu hna; miphun hna nih annih cu minung menmen an si ti kha an hngalh lai!