ESTHER CAUK HRAM DOMHNAK

ESTHER CAUK

HRAM DOMHNAK

Modekai Mang

 1Siangpahrang Ngan Ahasueras a pen kumhnihnak, Nisan thla nikhatnak ah khan Benjamin chung Kishe i fapa Shimei, Shimei i fapa Jair, Jair i fapa Modekai nih mang a manh. 2Modekai cu Susa ah a ummi Jew miphun pakhat a si i siangpahrang zung ah riansang ngai a tlaimi a si. 3Amah cu Babilon siangpahrang, Nebukhatnezar, nih Jew siangpahrang Jekoniah he Jerusalem in sal ah a rak hruai mi pakhat a si ve.

5 Hihi a mang cu a si: Vawlei pumpaluk ah hin ṭahnak le aihraamnak, khuari le lihninnak le ningcang lonak a um. 6 Cun raltuk ding timhcia a ummi limkeng pahnih an rak chuak i ṭihnung awpi kha an thlah.  7Cu authawng ruangah miphun kip cu a dingmi miphun tuk awkah an i tim.  8 Vawlei ah hin muihnak le rawhralnak, harsatnak le ngaihchiatnak, hremnak le hnahnawhnak nikhat a tlung.   9An cung i a tlung lai dingmi vanchiatnak kha ruat in a dingmi miphun cu an ningpi in ṭihnak he an ther, cun thih ding i timhcia in Pathian sinah an au. 10Cutin an au nak in, tivate sin bangin, tivapi a chuak i tilet a tho.  11Ni a hung chuah tikah ceunak a um, mitoidor hna cu an tho i milianhngan hna kha an ṭam dih hna.  12Hi a mang le Pathian khuakhannak i langhnak in a hung i hlauh tikah Modekai cu mah kong kha fakpi in a ruat len ko.

Siangpahrang an rawinak

12Modekai cu siangpahrang zung ah khan siangpahrang inn vengtu tildit pahnih Biktan le Teres hna he a riak ve.  13An bia le an khuakhannak kha a theih i siangpahrang thah an timh ti kha a hngalh tikah 14siangpahrang kha ralrinnak a pek. Siangpahrang nih annih pahnih kha hrem awkah bia a chah. Annih zong an i phuan ve caah a thahter hna. 15 Cun siangpahrang nih hi thil sining vialte cu anmah Roca Cauk ah a khumhter hna i Modekai hrimhrim zong nih a cazin ah a khumh ve.  16 Siangpahrang nih Modekai cu zung ah rian a pek i lawmman zong a pekchih.  17 Sihmanhsehlaw, siangpahrang mithmaiṭha a hmumi Aakat miphun, Hamedatta fapa Haman cu siangpahrang tildit pahnih hna ca lehrul cham duh ah Modekai kha harnak pek dingin khua a khan.