SIRACH 40

Minung temhinnak

40     Rianhar cu minung miphun ca i ser mi a rak si, a nu pawchung a chuahni in mi vialte cu nu paw chung an kir ṭhan hlan lo Adam fale liang cung ah thilrit cu khinh a si. 2An lung i a cam zungzal mi le an ṭih mi cu thihni hi a si. 3 Bawi ṭhutdan cung i a ṭhu mi in leidip le vutcam ah a ṭhu mi santlai lo tiang, 4puansen aa hruk i bawiluchin a chinh mi in buri aa hruk mi tiang an zapi tein thinhunnak, nahchuahnak, hnahnawhnak le lung sivanghnak, thih ṭihnak, zuamcawhnak le entainak lawng te a si. 5Zan ihkhun cung a dinh lio zong ah aa hngilhnak nih lungretheihnak thar a chuahpi rih: 6 Hngilh a vun i timh, a vun zau ah khin, chunsaling bang, 7ral in a zam i vung chanh an timh lio bang in a mang nih a hlauh, cun zei hmanh ṭih awk a um ṭung lo ti in a khuaruah a har. 8Hihi ser mi vialte -minung le saram – misual cu a let sarih in - a tlung mi; 9thihnak, thisen chuahnak, buaibainak le vainam, rawhralnak, mangṭam, fahnak le ngal-eu zawtnak hna cu an si. 10Hi vialte cu mi ṭha lo hna ca ah ser mi an rak si i tilian cu anmah ruang ah a tlung. 11Vawlei in a ra mi vialte cu vawlei ah a kir ṭhan i ti in a ra mi vialte cu rili ah an kir ṭhan.

Mifim hna bia a phunphun

12Ziknawhnak le din lonak vialte cu hloh dih an si te lai, nain zumhnak ṭha cu a hmun zungzal lai. 13A ding lo in hmuh mi chawva cu luti lian le ruahsur hlan i khuari voikhat a tur bang an lo te lai.  14A kut a samh tikah aa lawm, cu bantuk in misual cu an rawk ve te lai.  15Pathian hngal lo hna nge cu an borh kho lo, thinghram thur hna cu lunghak lawng an tong. 16Tibual le tiva kam i a kho mi phaikung cu phawi an tong hmasa. 17Pek siannak cu vancung thluachuahnak a si i pekṭhenhnak cu zungzal a hmun.

18Amahte lawng a um thiam mi le rianfak a ṭuan mi hna ca ah cun nun cu a nuam, anmah nakin nun a nuam deuh mi cu chawva a hmu mi a si. 19Fale hna le khualipi a dirh mi hna nih ro an lin, anmah nakin duh a nung deuh mi cu nupi ṭha a si. 20 Zu le ringawn nih lung a nuamhter, anmah nakin a ṭha deuh mi cu fimnak duh hi a si. 21Thanglawi le tingtang nih hla ngaih a nuamhnak a chap, anmah nakin a thlum deuh mi cu aw-ṭha a si. 22Mit nih iang le pumrua ṭha a hlam, anmah nakin aa dawh deuh mi cu pau caan rawlkung hring a si. 23Hawi le kawi- an i kom zungzal, anmah nakin aa kom deuh mi cu nupi le pasal an si.   

24Unau le ṭangṭi hawi cu har caan ah an ṭha ngai, anmah nakin a ṭha deuh mi cu hartong chanhnak ca pekṭhenhnak a si. 25Sui le ngun nih na karhlan an hmaanter lai; anmah nakin duh a nung deuh mi cu ruahnak ṭha a si. 26Tangka le thazaang nih lunghna a ngamter, anmah nakin a ṭha deuh mi cu Bawipa ṭih hi a si.  27Bawipa ṭih tikah zei hmanh a bau ti lo: midang bawmhnak hal a herh lo. 27,28 Bawipa ṭih cu thluachuahnak luchin a si, a sang bik mi minthannak nakin himnak a pek deuh.

Midang bochan in nun

28Ka fa, midang bochan in nung hlah; midang bochan in nun nakin thih a ṭha deuh. 29Midang rawl lawng hngak i nun cu nunnak kan ti kho hrimhrim lo. Midang rawl nih or kha a hrawh; mifim le ṭha tein zohkhenh mi nih cun hi bantuk tuah cu a hrial lai. 30Mi aa hngatchan mi pa nih a chim mi cu ngaih a nuam ngai kho men ko, nain a paw cu a kangh in a kang ko.