Fimnak 1

I: FIMNAK LE MINUNG KHAUKHIHNAK

Pathian kha kawl in ṭhat lonak hlawtnak kong ah

1 1Nannih leicung uktu hna dinfelnak kha daw u, Bawipa ca ah nan lung innka hung ulaw amah cu lungthin thiang tein kawl u; 2Zei cah tiah amah a hneksak lo mi hna nih amah cu an hmuh lai i amah aa bochan mi hna sin ah aa phuang. 3Asinain ruahnak ṭha lo nih minung cu Pathian he a ṭhen tawn; lianhngannak cu hneksak a ton tikah a hmur a cip tawn. 4Fimnak cu chiatnak a tuah mi hna thlarau ah a lut bal lai lo i sual saltaang hna pum chung zong ah khua a sa bal lai lo; 5zei cah tiah fimchimtu thiang thlarau cu hlenthawinak in a zaam, mihrut hna khuaruahnak aa zuk i chiatnak nih a lam a mer.

6 Fimnak cu minung phun he aa kawm ngai mi thlarau a si; sihmanhsehlaw thangchiatbia a chimtu i bia cu dantat lo in a um bal lo; zei tin tiah Pathian nih cun minung si ning taktak kha a zoh i a lungthin kha a hmaan ning tein a purhdah dih, chim mi biakip kha a ngai. 7Zei cah tiah leicung cu Bawipa thlarau in a khat i zei zong vialte a tlaitu nih cun chim mi bia vialte a hngalh. 8 Palhbia a chim mi a hngalh lo mi a um lo i cu bantuk mi cu teirul chamtu Dinnak nih a lanhtak bal lai lo.

9Zei cah tiah, pathian hngal lo hna khuakhannak cu ṭha tein ngiatthlai an si lai i khuasual a tuah mi langhternak caah bia a chim mi vialte cu Bawipa sin ah a phan dih lai. 10Zei zongte a theih dih i ceihcum biathli hmanh a ngan lo mi, nahchuah hmang hna a um. 11Cu caah thlite ceihcum tiang i ralring, palhnak chim i sum, a thlithup in chim mi hmanh ṭhat lonak a chuahpi, cun lihchim hmur nih thlarau kha a thah.

12Na nunzia chia in na thihnak chuahter hlah, na ṭuannak in rawhnak cu sawm fawn hlah. 13Zei cah tiah Pathian nih Thihnak kha a ser lo i a nung mi hrawh awkah aa lawm lo. 14Zei cah tiah zongte hi nun awkah a ser; leicung ser mi vialte chung ah hin hma damnak ah an chung ah thih sivai a um lo, cun Mithi  khua nih leicungmi cung ah nawl a ngei lo: 15zei cah tiah dinfelnak cu a thi thiam lo.

Pathian hngal lo hna nih nunnak an hmuh ning

16Sihmanhsehlaw, pathian hngal lo hna nih cun thihnak kha an bia le an tuahsernak in an auh tawn; hawi ah an rel i amah ca ah an tha an dih, amah he biakamnak an tuah, amah ta si cu an i tlak hringhran ko.