SALM 18:1-50

Siangpahrang i lawmhnak hla

18. 1 Ka `hawnnak Bawipa, nang cu kan dawt (Ka khamhtu, zaang-ennak in na rak ka khamh cang)

2 Bawipa cu ka lungpi le ka ralhruang a si, a ka chanhtu cu ka Pathian a si. A toi ah kaa dor, amah cu ka lungpi, ka phaw, ka khamh-`hawnnak; ka ralhruang, kaa dornak hmun a si. 3 Thang`hat a tlak mi Bawipa sin ah ka au i ka ral hna kut in a ka khamh. 4 Thihnak tilet nih an ka naih, Belial tilian nih phumhnik an ka zalh cang, 5 Ka velchum cu mithikhua rap lawngte an si ko, Thihnak rap cu ka hmai ah an chiah hna. 6 Ngaihchia in Bawipa sin ah ka au; ka Pathian sin ah bawmh-hal in ka au; a Biakinn in ka aw cu a theih, ka `ahnak cu a hna nih a theih. 7 Cun vawlei cu aa hnin i a laam, tlang hna cu an hram an kuai, a thin cu mei bang a alh tikah an i hnin. 8 A hnarkua in meikhu le a kaa in `ihnung mei an chuak (a chung ah meiphu aa ser)

9 Van cu a cheu i a rung `um, a kei tang ah cun khuadawm tompi a um; 10 thla-ngei saram pakhat kha i cit in a zuang, thlitu thla in a kai thluahmah. 11 Muihnak cu a thuam ah aa ser, a khaan cu tithukpi le khuadawm nakpi hna an si. 12 Rialti le mei-alh tompi, ceunak nganpi, nih a lam cu an ceuh. 13 Bawipa cu van in a tur, Cungnung bik nih a aw a thlah. 14 A fei cu a khawh i a `hek dih hna, a nimtlau a run thlah i a `hio dih hna.15 Bawipa, na hrum thawng le na thaw thawng an theih tik ah rilipi cu a tawne tiang a lang i vawlei cu a hrampi tiang aa hnin. 16 Cung khin a rung ka banh i a ka tlaih`hup, tithuknak in a ka cawi, 17 ka ral lian, ka nakin a `hawng deuh mi ka ral, hna kut in a ka chanh.

18 Ngaichiat ka ton caan ah an ka doh, sihmanhsehlaw a ka bawmtu Bawipa ka ngei; 19 luatnak a ka pek i hnangam tein a ka umter, a ka dawt caah a ka chanh. 20 Bawipa nih ka dinfelnak caah laksawng a ka pek, ka kut a thian man a ka pek, 21 zeitintiah Bawipa lam kha ka rak zul i ka Pathian sin in ka rak tlau bal lo. 22 A biaceih lairelnak cu ka hmai ah an um dih, a zulhphung hna cu ka hlaw bal hna lo. 23 A hmai ah soiawk um lo in ka nung, `hatlonak vialte ka hrial hna.

24 Dingfel tein ka rak cawl caah Bawipa nih a ka cham `han, a ruang cu ka thiang kha a hmuh. 25 Bawipa, nang cu a fel mi hna sin ah na fel ve i soiawk a um lo mi hna sin ah soiawk um lo in na um ve. 26 A lung a thiang mi hna sin ah na lung a thiang, asinain mizer hna sin ah na zer ve, 27 mitoidor kha na khamh hna i miruamkai cu na `humh hna. 28 Bawipa, nangmah hrimhrim hi ka mei-inn na si, ka Pathian nih ka muihnak cu a ceuter, 29 nangmah he cun ralhau khua hmanh kha ka den, ka Pathian he cun vanpang kip kha ka kai khawh. 30 Hi Pathian, a lam cu soiawk a um lo; Bawipa bia cu mei in thianh mi a si, zeicahtiah amah lawng hi a toi i aa dor mi vialte ca ah phaw a si.31 Zeicahtiah Bawipa hlei in zei Pathian dah a um ti, kan Pathian hlei in zei lungpi dah a um ti? 32 Hi Pathian nih hin a `hawnnak in a ka kilh, ka lam cu mawhchiatnak in a luatter, 33 sazuk bang ka ke a zanter i tlangsang cung ah fek tein a ka dirter, 34 ka kut cu ral tuk awk le ka baan cu thir likuk zaam awk in a cawnpiak.

35 Tei khawh lo mi na phaw cu na ka pek (Na orhlei kut nih a ka domhtlaih) ka bia cu na ngaih zungzal, 36 keitlau karhlan na ka pek, a fek mi fingbeu na ka pek. 37 Ka ral cu ka dawi i ka phak hna, ka hloh dih hna hlan lo ka kir bal lo. 38 Ka thluk hna i an tho ti lo; an tlu i ka ke tang ah an bawk. 39 Raltuknak ca ah `hawnnak puan in na ka menh, a ka dohtu hna cu ka tang ah na thlak hna, 40 ka ral cu ka hmai in an i tawn; cun a ka huatu cu ka hrawh hna. 41 An au len nain khamhtu an ngei lo; Bawipa sin ah an au nain a let hna lo. 42 Thli nih a choih mi leiphut bang ka rial hna, lamcung nawncek bang ka lamhchih hna. 43 Ka mi hna bia an i alnak in na ka luatter; miphun hna cung ah na ka chiah, ka rak hngalh bal lo mi miphun cu atu ah ka sal an cang; 44 ramdang mi hna cu ka mithmai `ha hmuh duh ah an rak ra, ka bia an theih in an zulh colh; 45 ramdang mi hna cu an lau i an lung a mit, ther buin an hrennak hna in an rak chuak. 46 Bawipa cu a nunkhua sau ko seh! Ka lungpi cung ah thluachuahnak um ko seh! Ka khamhnak Pathian cu hlorhchin si ko seh. 47 amah cu teirul a ka champiaktu le mi vialte ka tang a chiatu Pathian a si, 48 `ihnung ka ral in a ka chuahtu a si. A ka tu mi cung ah na ka chiah, zaang-en hmang kut in na ka chanh. 49 Hi ruangah hin, Bawipa, nangmah cu miphun dang hna lak ah kan thang`hat lai, na min thang`hatnak hla cu ka sak lai. 50 A siangpahrang cu atu le atu a khamh, chiti thiang a thuh mi David le a roco hna sin ah a fek mi a dawtnak cu zungzal in a langhter.