SALM 69:1-36

Tah hla

69. 1 Pathian, ti hna nih ka nunnak hrimhrim phum timh in an ka kulh dih cang caah ka khamh tuah. 2 Nawncek thukpi chung pilhnik kaa zal i chang nakding zei hmanh a um ti lo. Ti thukpi chung ka kar ka hlan cang i tilet nih phum hnik an ka zalh cang. 3 Nangmah kan auhnak ah ka tha a dih, ka dang a car; ka Pathian kan zohnak ah ka mit a phing dih cang. 4 Zei ruang lo ah a ka huatu hna cu ka lu samfa hna nak hmanh in an tam deuh. Ka nunnak a kawl mi hna cu rawiphiar hmang a `hawng ngai mi ka ral hna an si. (Ka rak fir lo mi cu maw ka cham `han lai?)

5 Pathian, zei tluk mihrut ka si cu na hngalh ko, ka palhnak cu na hmuh dih ko hna. 6 Vanralkap run Bawipa, nangmah an bochan mi hna cu, keimah ruang ah, mihrut ah ser ding an si lo. Israel Pathian, nangmah an kawl mi hna cu, keimah ruangah, ningzahnak an in ding a si lo! 7 Serhsatnak ka in mi cu nangmah ca ah a si, ka hmai cu ningzahnak in a khat. 8 Ka unau hna sin in an ka chuah, ka nu fapale hna sin ah khual ka si; 9 zeicahtiah keimah cu na inn ka tlaihchan tuk nakah ka ciam dih cang, nangmah an in zomhtaihnak vialte cu ka cung ah an tla.

10 Ulhnak le sumnak in ka nunnak cu ka sersiam, cu ruangah mi nih an ka serhsat. 11 Buri kaa aih i anmah nihsawhnak ka cang, 12 kei cu hauka i a `hu mi hna phailen awk le zuri hna hla ah ka cang. 13 Cucaah, Bawipa, na mithmai a panh caan ah na sin ah thla ka cam, a fek mi na dawtnak le a hmun mi na khamh-`hawnnak thawng in ka khamh ko.14 Ka pil hlan ah nawncek in ka chanh ko, cuticun a ka huatu hna sin le tithuk chung in khamh ka si lai. 15 Tilet nih ka phum hna hlah sehlaw tithuk nih ka dolh hna hlah seh, khorthuk nih ka hmawm hlah seh. 16 Bawipa, a fek mi na dawtnak cu velngeihnak a si bang ka let tuah, na zaangfah dawtnak in ka hoih ko, 17 na salpa cu ka mertak sawh hlah, ka re a thei caah khulrang in ka let ko. 18 Run ka naih law ka chanh tuah, ka ral hna ruang ah ka tlanh ko.

19 Ka tuar mi serhsatnak, ningzahnak le mualphohnak cu `ha tein na hngalh ko hna. A ka hremtu cu na hngalh dih ko hna. Serhsatnak nih a dam cia mi ka hma cu a suah `han. 20 Zawnruahnak kaa ruahchan nain pakpalawng a si, hnemhtu ka kawl- pakhat hmanh hmuh khawh an si lo. 21 Ei awk ah thih sii an ka pek, ka ti a hal i tithor an ka pek. 22 An cabuai hrimhrim kha an ca ah rap si sehlaw an rumnak cu an i awhnak si hram seh; 23 an mit cu an hmuh khawh lo tiang maw sehlaw an tha dih dih seh. 24 Na thinhunnak cu an cung ah thlah law na thinlinhnak nih kang dih ko hna seh. 25 An riahbuk cu hrawk dih hna law an thlam cu a lawng in chia hna, 26 zeicahtiah annih nih na den cia mi kha an dawi hna i na hliam mi kha fahnak an pek chin hna. 27 Sualnak pakhat hnu pakhat in phaw hna law na khamh-dinnak cu pe hna hlah, 28 nunnak cauk in an min cu hnawt hna law miding hna lak ah telh ve hna hlah. 29 Keimah hrimhrim hi, hliamhma he zaangfak ka si bang in, na khamh-`hawnnak in ka thawhter ko. 30 Pathian min cu hla in ka thang`hat lai, lawmhnak pek in ka conglawmh lai, 31 zeicahtiah hi nih hin Bawipa cu cawtum; cawtum kikawng le saram hna nakin a lung a ton deuh lai. 32 Mitoidor nih a hmu i aa lawm, nannih Pathian a kawl mi hna, nan tha chia hlah seh. 33 Zeicahtiah Pathian nih misifak cu a ngaih i a mi saltaang hna cu a zoh sawhsawh bal hna lo. 34 Van le vawlei le rili hna le a chung i a cawlcang mi vialte hna nih conglawmh hna seh. 35 Zeicahtiah Pathian nih Zion cu a khamh lai, Judah khualipi hna cu a sak `han hna lai, rammi hna cu an ramte ah khua an sa hna lai; 36 a salle tefa hna nih an co lai, a min a daw mi hna cu ram ah cun an um lai.