1 Maccabaeus 9

Akos ah i tuknak le Judas Makabi a thihnak

9 Dimetrius nih Nikanor le a ralkap hna cu ral ah an thi cang ti kha a theih tikah Bakhides le Alcimus kha Judea ram ah a voihnihnak a thlah ṭhan hna, anmah he orhleikap ralkap zong a thlahchih. 2 Galilee lam kha an zawh, Arbela i Mesalot kha an kharkhumh, an lak i mi tampi an thah hna. 3 152 kum, thla hmasa bik ah khan Jerusalem hauleng ah riahbuk an khuar; 4 cuka cun an i thawn i ke ralkap thongkul le rangcung ralkap thonghnih hna he Beer-Zaith ah an kal. 5 Judas cu ralkap ṭhawngṭhawng thongthum hna he Elasa ah khan riahbuk a khuar. 6 Ral ralkap tampi kha an hmuh hna tikah an ṭih tuk caah riahbuk khan an i zuk i zariat hrawng te lawng an tang. 7 Ral cu tuk a hau cang nain a ralkapbu cu a zor tuk cang ti kha a hmuh tikah khuaruahhar in a um ko; zei tin tiah ralkap khawmh caan a ngei ti lo. 8A lung a rawk nain a tang mi ralkap hna kha, "Tho ulaw ral cu tu hna u sih; anmah doh awkah kan thazaang a um rih kho men ko," tiah a ti hna. 9 A mi hna nih khan, “Kan himnak ca ah zaam ding hlei in zei thazaang hmanh kan ngei ti lo; anmah tuk awkah kan hawile he kan ra ṭhan te lai; kanmah lawng cu kan tlawm tuk" tiah an chimh len. 10 Cu tikah Judas nih: "Anmah sin in maw ka zam len lai! Kan caan a phanh a si ahcun, pasal kan si bang in, kan miphun ca ah thi ko u sih, cuti cun, kan minṭhatnak cu a duai lai lo," tiah a ti hna.

       11 Cu tikah ralkapbu cu riahbuk in an chuak i ral he hmaitonh in an dir. Rang ralkap hna kha phuhnih ah a tlar hna; chai a chaitu le thal a kaptu cu lengcung in an kal i ralkap ṭhaṭha hna cu hmai ah a kalter hna. 12Bakhides cu orhlei kam ah a um.  Rang ralkap phuhnih hna karlak ah khan ralkap bu pipi cu an hung chuak i muko kha an tumpah hna; Judaslei ralkap hna zong nih an muko cu an tum ve hna i 13vawlei cu ralkapbu hna thawng nih a hninh dih. Zingka in zanlei tiang an i tu.

       14 Judas nih Bakhides le a ralkapbu thazaang taktak cu orhlei kamah a um ti a hmuh tikah a lung a ṭhawng mi vialte cu amahlei ah an ṭang, 15 cucaah orhlei phu kha an den i Azara tlang tiang an dawi hna. 16 Sihmanhsehlaw kehlei phu i Syria ralkap hna nih orhlei phu an khuai cang kha an hmuh tikah an i mer zau i Judas le a ralkap hna kha hnulei in an dawi ve hna. 17 Raltuknak cu a fak hringhran i kaphnih in sunghnak tampi a um. 18 Judas zong cu a thi ve i a taang mi cu an zam dih.

Judas Makabi vuinak

19Jonathan le Simon nih an upa Judas ruak kha an lak i Modein i an pupa hna thlanhmun ah khan an vui. 20 Israel mi dihlak cu an ngaih a chia hringhran i ni tampi chung hiti hin amah ṭahnak hla cu an sa: 21 “Israel kha himnak a petu paralṭha a thih cu zei tluk in dah a fah! 22 Judas i adang tuahsernak hna, ral a rak tuknak, thil a rak tuah mi le minṭhatnak a hmuh mi vialte cu hika ah hin khumh an si lo; sihmanhsehlaw an tam tuk hringhran.

IV:  JEW MI HNA HRUAITU LE TLANGBAWI NGAN JONATHAN

(BC 160-143)

Grikphu teinak.  Jonathan nih dohnak a hruai

23Judas a thih hnu cun mihrokhrol pawl cu Israel ram an i thuhnak hmunkip in an hung chuak i thil ṭha lo phunphun a chuak ṭhan.  24 Cu lio cu mangṭaam fakpi in a tlung i rammi cu anmahlei ah an i mer.  25 Bakhides nih a hngalh kobu in biaknak a ralchanh mi hna kha uktu ah a thim hna. 26 Hi hna nih Judas hawile hna cu keneh zulh in an kawl hna i Bakhides hmai ah an hun chuahpi hna, amah nih annih kha ṭha lo in a tuah hna i a serhsat hna. 27 Israel ah hremnak ṭihnung a tlung; an lak ah profet an langh ti lo hnu ah a fak bik a si.

       28Judas hawile hna nih hmunkhat tein Jonathan cu, 29 “Na upa Judas a thih hnu cun kan ral hna, Bakhides le kan miphun a hua mi adang hna bantuk, doh awkah nangmah bantuk hruaitu kan ngei ti lo. 30Cucaah nihin ah kannih nih nangmah cu a kan hruaitu le uktu ah amah hmun rawl ding in kan in thim i ral na kan tukpi lai,” tiah an ti. 31Cu tikah Jonathan nih a upa Judas hmun cu la in a hruai hna.  

Tekoa ramcar i Jonathan.  Mediba pawng ah thisen chuahnak

32Bakhides nih hi thawng a theih tikah Jonathan thah awkah aa tim.  33Sihmanhsehlaw hi thil cu Jonathan le a naupa Simon le a bawmtu hna nih an theih ve i Tekoa ramcar ah an i dor i Asfar tibual pawng ah an riak. 34 (Bekhidi nih hi thil cu Sabbath ni ah a theih i a ralkapbu ning pi he Jordan cu a va tan ve.)

35 Jonathan nih a hawile hna a si mi Nabataeami hna kha an ralkap zal tamnawn in chiahpiak awkah bawmhnak hal ding in a ralbawi a si ve mi a u cu an sin ah a thlah. 36 Asinain Mediba miphun Amri fapale hna nih amah kha an kham, John cu a thilri ngeih mi vialte an tlaih i an laksawng hna he lo diam an zam. 37 Cu hnu ah Jonathan le a naupa Simon cu Amri fapale hna nih nupiṭhit puai nganpi an tuah, cun an Monu a si mi Nabata in Cannan bawi lianngan i fanu pakhat kha a hnuzul tampi he, an thlah lio ti kha mi nih an chimh. 38 Thisen he a thi mi an unaupa Johan kha an theih ṭhan caah an kai i tlangphen ah an i thup. 39 An bih ko lio ah khan ralkap zal tampi he mibu nganpi an rak chuah kha an hmuh hna, cun nupiṭhi tlangvalpa cu a hawile hna le a chungkhar hna he ral i cer bang in, khuangtum phu he, amah don awkah a hung chuak. 40 Jew pawl nih an zuan hnawh hna i tampi an thah hna; a nung mi hna cu an zal vialte kaltak in tlang ah an zam dih. 41 Cucaah ṭhitumhnak puai cu ngaihchiatnak puai ah le hlaremh bu hna hla aw cu ṭahnak aw ah a cang. 42 An unaupa thisen phu cu tling tein an hlam hnu ah Jordan cerh ah cun an kirṭhan.

Jordan an tan

43 Bakhides cu hihi a theih cangka in ralkap tam nawn he Sabath ni ah Jordan tivakam a chiatnaklei in a rak kai. 44 Jonathan nih a mi hna cu, “Tho ulaw, kan nunnak ca ah tu cang hna usih; zei tin tiah nihin cu hlan lio bantuk a si ti lo. 45 Nan hmuh bang in kan hnu he kan hmai he kan tuk a hau lai; khattelei ah Jordan tiva le adang khattelei ah cerh le burbuk a um i zuhnak ding lam a um hrim lo. 46 Atu hi nan ral hna kut in luatnak an pek hna nakhnga Vancung ah thlacam caan a si,” tiah a ti hna. 47 Jonathan nih a thawk i fei in vun khawh hmasa nain Syria pa nih a hrial manh i aa zuk, 48 Cun Jonathan le a mi hna cu Jordan ti ah an zuang i khattelei ah an pet; Ral hna nih cun Jordan tan tiang cu an dawi hna lo. 49 Cu ni ah Bakhides ralkap thongkhat tluk an thi.

Bakhides nih ralhau kha a sak. Alcimus thihnak

50 Bakhides cu Jerusalem ah a kir i Judea khua cheukhat kha vanpang sangpi le kutka tlangpi hna he ralhruang in a kulh hna. Annih hna cu Jeriko, Emmaus, Beth-Haron, Bethel, Timnath, Farathon le Tepon an si. 51 Cun haukakip ah khan Israel kha hnahnawhnak pek awkah ralveng kha a chiah hna. 52Beth-Zur, Kezar le khualipi zong kha a kulh i a chung ah ei awk tling he ralkap kha a chiah hna. 53 Ramchung hruaitu hna i fapale hna kha a tlaih hna i Jerusalem Ralhruang khua ah khan a hren hna. 

54 154 kum, thla hnihnak thla ah khan, Alcimus nih hmunthiang chungtual vanpang kha a chilh i profet hna rianṭuannak vialte kha hrawh awkah nawl a chuah.  55 Sihmanhsehlaw rian a vun awt kate ah khin zennak nih a tlunh i a rian cu a ngol. A zennak nih a hmurka a phih i a holh kho hrimhrim lo i a chungkhar hmanh kha a hruai kho ti lo; 56 cun nganfahnak nganpi he a thi colh ve. 57 Alcimus a thih tikah Bakhides cu siangpahrang sin ah a kir i Judea ram cu kumhnih chung him tein a um.

Beth-Bassi khua kharkhumhnak

58 Dalan pawl cu hnatlaknak pakhat an ngei. Annih nih, “Atu Jonathan le a bawmtu hna hnangamte le zumh ngai in an um lio ah hin kannih cu Bakhides kha kan va auh ding a si, amah nih zankhat ah tampi a tlaih hna lai,” tiah an ti. 59 Cucaah amah sin ah an kal i amah he theihthiamnak an tuah. 60 Bakhides cu ralkap tampi he aa thawh colh i a ṭangṭi Judea pawl kha Jonathan le a ṭangṭi pawl tlaih awkah a thli tein a cah hna. Sihmanhsehlaw an biathli a puan caah hi thil cu an tuah kho lo, 61 cun Jonathan le a mi hna nih rawiphiarnak hruaitu sawmnga tluk hrawng kha an tlaih hna i an thah hna.

       62 Cu hnu ah Jonathan le Simon cu an mi hna he thetse ram i Beth-Bassi ah an kir ṭhan, cun a rawk mi cheukhat kha an remh i ralhruang an sak. 63 Bakhides nih hi thawng a theih tikah a ralkap vialte kha a pumh hna i Judea ram i a hnuzul hna zong kha thawng a thanh hna.  64 Beth-Bassi khua kulh awkah aa thawh, saupi an i tuk hnu ah kulhnak seh hna kha a dirh hna.  65Sihmanhsehlaw Jonathan cu a naupa Simon kha khuapi ah kaltak in ralkap kutthuam zat he an chuak i khuatelei ah a kal.  66 Anih nih Odomera le a unau hna le Fasiron fapale hna kha an riahbuk ah a tuk hna; annih zong cu i tuknak ah an i tel ve cang i amah he an i fonh. 67Cu lio ah Simon le a mi hna cu khuapi chung in a thli tein an chuak i kulhnak seh thilri kha an khangh dih hna. 68Bakhides kha an tuk i an tei. A khuakhannak le ral a tuknak vialte zei hmanh lo an can kha a hmuh tikah a lung a buai ngai, 69 cucaah a thinhunnak cu ram chung luh awkah a rak forhtu dalan hna cung ah a tlung i tampi a thah hna; cun a ralkapbu kha inn i kirpi awkah bia a chah. 70 Hi thil hi a a theih tikah Jonathan cu daihnak ser in a sin i a um mi saltang hna kha thlah awkah palai kha a sin ah a thlah. 71 Bakhides cu a hna a tla, a biatung a cohlan i a chanchung amah kha zei harnak hmanh pek ti lo ding in bia aa kam.  72 Judea ram i a rak tlaih mi thongtla hna kha Jonathan sin ah a pek ṭhan hna  hnu ah hnulei ah aa mer i a ram ah a kir, cun an ramri hmanh a rak naih bal ti lo. 73Israel cung ah vainam a phan ti lo; Jonathan cu Michmash ah umhmun a khuar, cuka ah a mi hna kha an bia a ceihpiak hna i lawki pawl kha Israel ram in a hloh dih hna.