SIRACH 38

Sii le zawtnak hna

38    Siibawi cu an zohkhenhnak kha ruat in amah he aa tlak mi mi upatnak cu va pe, zei cah tiah amah zong kha Bawipa nih a rak ser ve. 2Damnak hrimhrim hi siangpahrang sin in hmuh mi laksawng bantuk in Cungnung Bik sin in a ra mi a si. 3Siibawi cu a thiamnak nih a cawisan i milianngan hna nih an upat. 4Bawipa nih sii-kung hna cu vawlei ah a khohter hna i a lung a fim mi aho hmanh nih annih kha an nautat lai lo. 5Voikhat ah thingfung sawhsawh nih ti cu a rak thlumter i a ṭhawnnak kha a langhter a si lo maw?  6A tuah mi thil khuaruahharnak in min ṭhatnak an hmuh nakhnga micheu kha hngalhnak a pek hna. 7Hi hna hi damnak ca le fah daihnak ca ah a hman hna, saya nih annih kha a cawhpiak hna. 8Cucaah a cawlcanghnak cu dongh ni a um lo, cun lawmh a um mi cu amah thawng in siṭhatnak cu vawlei ah hin a um,

9Ka fa, na zawt tikah na zia chia hlah, Bawipa sin ah thlacam law damnak an pek lai. 10Palhnak kha hnong, na kut cu thurter hlah; cun na lungthin cu sualnak in thianh. 11Rimhmui le philh lonak changvut ṭhaṭha kha pechan, a tam khawh chung in pekchan. 12Cun siibawi nih ṭuanvo la seh –amah zong cu Bawipa nih a ser mi a si ve –amah cu kalter hlah, zei cah tiah amah kha na herh. 13A caancan ah damnak cu siibawi cung ah aa hngat, 14zei cah tiah annih zong nih Cungnung Bik sin ah thla an cam ve lai, cucu annih kha fahnak nemter deuhnak, damternak le nun khuasaunak vel a pek hna naklai a si. 15Amah a Sertu mithmuh ah a sual mi vialte cu siibawi nih zohkhenhnak ko hna seh!

Mithi ṭahnak

16Ka fa, na ngeihchiatnak langhter awkah mithi cu na mitthli thlak law ṭah ko, cun amah he aa tlak mi pumhpinak in a ruak hum law a thlaan cu upat va philh hlah. 17Lungkuai in ṭap law, na ṭang i cum, a thi mi cu aa tlak ning in va hram ko, a herh lo mi thangchiatnak in na luat nakhnga nikhat nihnih cu ṭahpi law cun ngam cang ko; 18zeicahtiah ngaihchiatnak nih thihnak a phakpi khawh, lungdongh tuknak nih tha a ei dih. 19Harnak in caan ah ngaihchiatnak a sau khun, ngaihchiat zungzal cu tuar a har ngai. 20Na caan donghnak ni kha ruahchih in na lung cu a ngaihchiatter tuk hlah, kalter ko.

21Mithi nih a kir bal lo kha philh hlah; mithi cu na bawm kho lo, nangmah tu kha harnak naa pe lehlam lai. 22Ka ngaihchiat caan cu philh hlah, zei tin tiah nangmah zong cutin na si ve te ko lai; zahan keimah, nihin nangmah! 23Mithi cu voikhat an vui hnu cun an konglam zong a thi ve ko, voikhat a thlarau a chuah hnu cun na lungre i theihter ti hlah.

Chawlet chawhrol le kutzung thiam hna

 24Manh caan nih phungbia cawnpiaktu cu fimnak cawnnak caan ṭha a pek, rian fak a tuan lo mi nih an fim kho. 25 Zei tin tiah leithuang mi cu a fim khawh lai? zei cah tiah a hmuitinh cu funghreu hui, 26 a caw khalh, a ram kauh, a bia cu a cawleng kong lawngte, 27 a ruahnak cu a leitlang ah a dih i zanlei a caan vialte cu a cawfa cenhnak ah a hman. Cu bantuk in rianṭuan hna le kut zungthiam hna zong an si ve, chunzan in rian an ṭuan: ṭacik a tuah mi hna zong, muisam thar le aa lawhnak lawng te a ruat, cun a rian lim awkah zantlai tiang a um.  28Sosernak kam ah a dir mi soserpa zong cuti cun a si ve, meizik nih a hmai a emh, meiphu mei he aa lungsi ngai ko; sobul den thawng nih a hna a chehter i a mit cu tuah duh mi muisam ah aa tap ko, cun a rian lim kha aa zuam i a mei a mih hlan lo a ṭuan. 29A rian ah a um mi um sertu zong cuti cun a si ve, a ke nih lengke kha a mer i ralring ngai in a ṭuan, ruat hmasa lo in a kutdong a cangh ter lo. 30Tlak cu a kut in a ser hna i a ke in a nen; a tleu mi sii thuhnak ah caan a lak i zantlai tiang hnawm a thianh. 31Mi vialte nih an kut an i bochan cio i an rian cio ah an thiam tuk. 32Anmah lo in khuapi a um kho lo, innsak, losak le khualtlawn zong an um lai lo. 33Sihmanhsehlaw annih cu parliment ah nan hmu hna lai lo i khawngsil zong ah rian sang an tlai lo. Biaceihnak ṭhutdan ah an ṭhu lai lo i Phungbia zong an ruat len lai lo. 34An nun ning le an biaceihnak ah chim awktlak an si lai lo i vawleilei mifim hna he zong voi tampi an i tong lai lo. Annih cu vawlei cung i inn le lo kha an sak i an thlacamnak cu an rian kong lawngte a si ko.