BARUCH 5

5 Jerusalem, na ngaihchiat le lungretheihnak hnipuan kha i phoih, Pathian sunparnak iang dawh cu i thuam ko cang, 2Pathian khamh-dinnak puansau cu i menh, Zungzal Nung i sunparnak luchin cu i chinh tuah, 3 zei cah tiah Pathian nih na sunpar tleunak cu vanrang toi miphun kip sin ah langhter a timh, 4cun Pathian nih zungzal ca i an pek mi min cu, ‘Dinnak-sin in-daihnak ah, cun A fek mi Dawtnak-sin in- Sunparnak ah,’ ti a si lai. 5Jerusalem, tho law cungsang ah dir in na mit cu nichuahlei ah hoih tuah: Pathian nih an philh hna lo caah lunglawm thanuam in, a Thiang Bawi nawl bang in, na fale hna cu nitlak nichuah in an rak i pumh cu hmu tuah. 6An ral nih dawi hna i an ke in an chuak nain atu cu Pathian nih bawiṭhutdan bang sunglawi ngai in na sin ah a rak kirpi hna. 7Zei cah tiah Pathian nih hmunrawn ser awkah tlangsangkip le zungzal fingtlangkip kha thlamh i horkua hna kha chilh awkah nawl a chuah cang, cuti cun Israel cu Pathian sunparnak chung ah hnangam tein aa chawk kho lai. 8Cun, Pathian nawl peknak bang in tupi thingkung hna le rimhmui thing dihlak nih Israel cu naidem an pek lai; 9zei cah tiah Pathian nih Israel cu a sunpar tleunak chung ah a sin in a ra mi a zaangfahnak le khamh-dinnak thawng in lawmhnak he a hruai lai.

IV: JEREMIAH CAKUAT

Babilonmi hna siangpahrang nih Babilon ah sal in hruai ding mi hna sin ah Pathian nih zei dah chimh hna awkah a fial ti chimh hna awkah Jeremiah nih a kuat mi cakuat i catlen.