SALM 58:1-11

Vawlei biaceihtu hna biaceihtu

58 1 Khuazing pathian bang vawlei biaceihtu hna, a dik mi biaceihnak nan tuah taktak maw? Adam fale hna cu aa ruang tein bia nan ceih hna maw? 2 A si lo! nan lung chung in a ding lo mi khua nan khaan, cun vawlei ah uknak chia kha nan lenter. 3 Mi`halo hna cu, an nupaw chung in lam an rak pial cung, a dik lo mi an biaceihnak he, an chuakka in, lamchia kha an rak zawh cang . 4 Annih cu rul bang siivai an ngei i a hna aa phih kanh mi rulchok bang an hna a chet, 5 cucu zei tluk a thiam zong ah, camhthiampa aw an theih nakhnga lo caah a si. 6 Pathian, an kaa chung i an haa cu thlong hna. Bawipa, hi chiandeih no hna ho cu phoi dih hna. 7 Annih cu hnawmkhor ah a lut mi ti bang tlau dih ko hna seh, lamhchih mi ram hna bang uai dih hna seh, 8 aa thawnpah in a ti (tlum) mi cengkeuh bang lolak hna seh, asilole, ni a hmu bal lo mi naurawk bang si hna seh. 9 Hlingkung bang an hling a chuah hlan, an hrin zong an ro zong, dantatnak thliher nih kalpi dih hna seh. 10 Annih cu lehrul cham an si cang ti miding nih a hmuh tik ah aa nuam lai, cun a ke cu mi`halo hna thisen in aa `awl lai. 11 Cu tikah mi nih, ‘Miding nih a laksawng cu a hmuh taktak cang; vawlei cung ah hin dinnak a tuahtu Pathian a um,’ tiah an ti lai.