Judit 16

Lawmhnak,

16 Ka Pathian cu khuangdar he thangṭhat tuah u, Bawipa cu chengcheng he upatnak pe tuah u, amah cu salm hla hna he thangṭhat tuah u, a min cu hlorh ulaw bawmhnak hal tuah u! 2Zei tin tiah, Bawipa cu ralkap bupi hna kha a khuaitu a si; A riahbuk cu a mi hna lak ah a derh cang, cucu kan ral hna kut in keimah kha khamh awkah a si.

3Assiriami hna cu an ralkap thongthong hna he chaklei tlang in an rak ṭum. An milu nih horkuang cu a khar i tlangbo cu an rang in a khat. 4 Ka ram kha mei in khangh dih ding, ka mino hna kha vainam in hrawh ding, bawhte hna kha vawlei ah tengh dih ding, ka hngakchia hna kha hranchaw ah ser ding le ka ngaknu hna kha hruai dih ding in a tlerh. 5Sihmanhselaw lianngan Bik Bawipa nih minu pakhat kut in an khuakhannak cu a lettalam in a chiah cang.

6Zei tin tiah an pa ralṭha cu patung no hna kut in an tluk a si lo, annih cu Titan fale hna nih an thluk hna, mi nganpipi hna nih an doh mi a si lo, sihmanselaw amah kha a muidawhnak in a hriamnam a chuttu cu Merari fanu Judith a si. 7Israel i hrem mi hna kha thawh awkah a nuhmei thuam kha a phoih cang; 8a hmai cu zihmui a thuh i a sam cu a lu pawng tang ah a ṭem, cun amah kha lem awkah skart fualpi kha aa hruk. 9A kedan nih amit kha a lak i aa dawhnak nih a lungthin kha thong ah a thlak i a namtong nih a hngawng kha a tan!

10Persiami hna nih a ralṭhat zia kha an zoh i an ther, Mediami hna zong a ngamhnak nih a lauter hna. Ka fale hna cu ral ti in an au tikah hi hna cu ṭihnak nih a den hna. 11Kan mi derthawm hna nih an aw an thlah tikah hi hna cu ṭihnak nih a tlaih hna. 12Annih cu nu tete hna nih an zuan hnawh hna i rawiphiar fale hna bang in nam in an sawh hna. Ka Bawipa i raltuknak ah cun annih cu an rawk dih.

13 Ka Pathian cu hlathar in ka thangṭhat lai. Bawipa, nangmah cu na lianngan, mi zawnruat , khuaruahhar in na ṭhawng, tei khawh ding na si lo.  14 Na ser mi vialte nih in rianh hna seh! Zei cah tiah bia na chim i zeizongte cu an hung si, na thaw na chuahhnawh hna i annih cu pumkhat ah an cang i aho hmanh na aw an celh lo.

15Tlang hna cu tilet he i cawh ding in an hram in i hnin hna hmanh seh, na hmaika ah cun lungpang hna cu phazawngdan bang in tii hna hman seh, nangmah an ṭih mi hna cu na zaangfah rih ko hna lai. 

16Rimhmui thawinak hna cu thil hme tete an si, cun khanghthawi pekchanhnak cu a hme deuh rih, sihmanhsehlaw Bawipa a ṭih mi hna cu zungzal in an lianngan. 17Ka miphun doh awkah ral a tho mi hna cu mi vanchia an va si dah! Cungnung Bik Bawipa nih hmanung bik ni ah dan a tat hna lai. An pum cung ah mei le rungrul a thlak lai i annih cu zungzal fahnak he an ṭap lai.

18Jerusalem an phanh tikah Pathian hmai ah an bawk i mi cu an i thianh hnu ah khan, khanghthawinak, lungduh pekchanhnak le laksawng hna kha an pekchanh.  19Judith nih cun mi nih an pek mi Holoferni thilri vialte le a ihkhun in a phoih mi thlaam puanzaar vialte kha Pathian sin ah biakamnak ca in a pekchanh. 20 Zarhthum chung mi hna cu Jerusalem Biakinn hmai ah khan puai an tuah i Judith zong anmah he a um ve.

Judith cu tartlung a nung. A thihnak

21Puai a dih tikah an inn ah an tlung cio dih. Judith zong Bethulia ah a tlung ve i cuka ah cun a ngeihchiah kha ei in khua a sa; a nunchung vialte rammi vialte i upatnak a co. 22Duhtu tampi a ngei ko hna; sihmanselaw a pasal Manasseh a thih in a mi hna sin a kal tiang, aho kut hmanh ah a tla lo.  23A vapa inn ah a um a sau chinchin, a min zong a thang chinchin; kum zakhat le kumnga tiang a nung. A salnu kha a luatter i cu hnu ah Bethulia ah khan a thi i a pasal Manasseh thlaan ah khan an vui ve. 24 Israel chungkhar nih amah kha ni sarih chung an ṭah. A thih hlan ah khan a chawva vialte cu a chungkhat le a pasal Manasseh i chungkhat hna kha a phawt dih hna.

25Judith chan chung ah siseh, a thih hnu caan saupi tiang ah siseh, aho hmanh nih Israel kha harnak an pe bal ti lo.