2 Maccabaeus 2

Jeremiah nih puanthlam, biaknak kuang le biakṭheng kha a thuh hna

2 Kan chimcia bang in profet Jeremiah nih saltaang hna kha mei i put awkah a fial hna, 2cun, Phungbia a pek hna hnu ah profet nih annih kha Bawipa phunglam hna kha philh lo ding, cun an ruahnak le an lungthin cu an hmuh mi sui le ngun milem hna le ṭamhnak hna in i teiter lo ding, zei tin ralrinnak a pek hna ti cu aa khumh ko. 3Cutin adang a chimhhrin hnanak lakah khan an lung ah Phungbia kha riahter peng ding ti in a nawl hna.

 4Mah cauk ṭhiamṭhiam nih cun profet cu phungchimtu nih Pathian roram co awkah Moses a rak kai tikah puanthlam le biakamnak kuang i ken awkah nawl a rak pek. 5A va phanh tikah Jerimiah nih mi-umnak kua a hmuh, mahka ah cun puanthlam, biakam kuang le rimhmui khanghnak biakṭheng kha a chiah hna, cu hnu ah innka kha a khar tak. 6 A hnu ah a hawile cheukhat nih chinchiahnak tuah awkah an va kal ṭhan nain an hmu kho ti lo. 7Jeremiah nih a theih tikah a mawhchiat hna i annih kha, “Pathian nih a mi kha a pumh ṭhan i a zaangfahnak a hmuhsak hna hlan tiang mah hmun cu aho hmanh nih hngalh ding a si lo. 8Cun Bawipa nih hi thil vialte cu a langhter ṭhan te lai, cun Moses chan le Solomon nih hmunthiang cu sunglawi ngai in thianter awk i thla a cam lio bang in, Bawipa sunparnak le khuadawm cu an lang ṭhan te lai,” tiah a ti hna.

9Cun Solomon nih zei tin dah a fimnak in hmunthiang limnak le pekchanhnak ca thawinak a pekchanh ti zong a ṭialchih. 10Moses cu Bawipa sin ah thla a cam tikah van in mei a rung tla i thawinak kha a kangh dih bantuk in Solomon zong thla a cam i cunglei mei nih khanghthawinak cu a kang dih ve. 11Moses nih, "Sualthawinak cu ei a si lo a kang dih” a ti. 12Solomon zong niriat-puai kha a tuah ve.

NEHEMIAH CARELNAK KHAAN

13A cunglei bia lawng si lo in hi ca hna le Nehemiah tuanbia cauk hna ah aa ṭial mi cu zei tin dah Nehemiah nih caruuk a dirh i cu caruuk ah cun siangpahrang le profet hna he aa pehtlai mi cauk hna, David ṭial mi hna le pekchanhnak kong ah siangpahrang hna i cakuat hna kha a khawmh hna kha an si.14Cu bantuk in Judas nih hnu deuh ral ah aa ṭhekzamh dih mi cauk hna kha tling tein a khawmh hna i cu hna cu kan ngei rih ko. 15 Na herh mi a um ahcun mi pakhat khat nih rak la seh.

Pekchanhnak puai ca sawmnak

16 “Pekchanhnak puai tuah kan i timh caah a ni le a caan te ah nan hman ve naklai ti nawlpah in atu hi  ca kan i kuat hna. 17A mi vialte a rak khamh i kannih kha roram, pennak, tlangbawi cannak le thiannak a kan pek mi Pathian nih, 18Phungbia ah a rak kamh bantuk in le kan ruahchannak cu amah chung ah a um bang in a zaangfahnak cu a kan hmuhsak lai i vanrang toi kan umnakkip in a thiang hmun ah a kan pumh zau ko lai, zei tin tiah kannih kha harsatnak tampi chung in a kan tlanh i a rak kan thianter cang.

II:  A KHAWMTU BIAHMAIŢHI

19Judas Makabi le a unau hna, Biakinnpi le biakṭheng pekchanhnak tuanbia cu 20Antiochus Epifenis le a fapa Eupator i raltauknak hna, 21Judah phung phunṭanh paralṭha hna tha thawhter ding ah a rak lang mi van ṭhawnnak hna, cuti cun an tlawmte nain ram pumpi kha an thluk, lawki ralkapbu kha an ṭhio dih hna, 22vawlei pumpi a thang mi hmunthiang kha an lak  ṭhan khawh, khualipi kha luatnak an pek, kha lio an rak hlawt mi phunglam kha an ser ṭhan, Bawipa nih a veel  bawmhnak in mithmai ṭha a pek hna – 23 hi  vialte hi Sairene Jason cauk panga ah aa ṭial cang nain hi vialte hi cauk pakhat ah khumh dih kan i zuam lai. 24A tam tuk lawmmam caah tuanbia ṭial ah a nunnak phum a duh mi hna an ton tawn mi harnak le retheihnak kha zoh in 25kannih cu pakhatkhat a rel duh mi ca ah rel ding phunphun, a thluak ah a khumh duh mi hna ca ah a fawi deuh ding le pakhat cio le zapi ca ah ṭhathnemnak chuahpi ding in kan timh mi a si. 26Hi vialte a tawifiannak ding in ṭial cu kan i awt, rianfawi cu a si lo, thlanhripi pawt in zankhuadei kan rak ṭuan; 27a ei mi vialte nih an thawtter ding rawldanghnak a timtu pakhat he kan tahchunh khawh. 28 sihmanhsehlaw zapi ca a si ca ah hi rianhar ah lunglawmhnak he tei kan ma rih ko; a neknawi tiang hmaan ding cu tuanbia thiam hna rian ah kan chiah lai i hi fer mi mi cauk ah hin kannih cu a tlangpi kha kan dawi lai. 29Innthar a dirhtu cu inn a ningpi saknak i ṭuanvo a ngeih lio ah sii thuhtu cu sithuh ding a herh mi kong lawng a ruah ding a um, kanmah zong cutin a si ve awk a si tiah ka ruah. 30Tuanbia kha a tuanbia ah ser, a si ning tein hlathlai le a neknawi tiang hmaan dih seh ti in i zuam cu tuanbia a ṭial hmasatu i rian a si; 31Sihmanhsehlaw caan he aa rem in a ṭial ṭhantupa tu cu tawifiannak in ṭialnak nawl le aa thuat tuk mi hna cu nganhtaknak nawl pek a herh.

32Cucaah a cung chimcia mi kha zei hmanh betchap ti lo in kan rian cu a tu thawk cang usih; tuanbia biahmaithi kha sauter i a tuanbia sullam vaivuanh cu zei sullam hmanh a ngei lai lo.