SIRACH 14

A hmaan mi lawmhnak

14 Biachimnak in a sual rih lo mi le a sualnak ca ah lung ṭhat lonak a ngei lo mi cu mi lunglawm a si. 2I phuhrun awk a ngei lo mi le ruahchannak a ngei rih mi cu mi lunglawm an si.

Nahchuahnak le hakkauhnak

 3Rumnak cu mikhiar ca ah thil ṭha a si lo i mi  hakkau caah chawva cu zei dah san a tlaih?  4A khiar tuk mi cu midang ca ah a khon a si i mi nih a chawva cu nuamhuar in an toh te lai.  5Amah ca hmanh a khiar mi, amah ca hmanh hman a siang lo mi cu aho ca dah a ṭhathnem lai?

6Amah ca hmanh a khiar mi nakin a khiar deuh mi an um ti lo, hiti hin a chiatnak nih a cham. 7 Ṭhatnak a tuah hmanh ah a tuahsual, a donghnak ah cun a ṭhat lonak kha a langhter te lai. 8 Nahchuah mit a ngei mi cu michia a si, a hmai cu a thlen i mi nunnak zei ah a rel lo.

9Mihakkau cu a ngeih mi ah a hna a ngam lo, hakkauhnak nih a lung a korter. 10A khiar mi cu a changreu kha a nahchuah, a coka ah mangṭam a tlung.

11Ka fa, ṭha tein i zohkhenh law Bawipa cu dotla mi thawinak kha pechan. 12Thihnak cu a hnu lai lo i Mithi khua i harnak cu na hmuh rih bal lo kha philh hlah. 13Na thih hlan ah na hawile cu daw hna, na sian khawh chung in pe hna. 14Nihin na hmuh khawh mi nuamhnak cu al len hlah, a phung ning in na covo cu thlah hlah. 15Na chawva cu midang sin ah chiata, cun na retheih man cu midang nih thimfung thlak in an i phawt a herh maw? 16Pek zong pe ve law co zong co ve ko, mithi khua ah nuamhnak a um ti lo.

17Hnipuan bang mikip cu an ṭet ko lai, chan-hlun phungthluk nih, “Mikip cu an thi lai,” a ti. 18Burbuk kung cu thinghnah bor bang in a cheu cu an ṭil i a cheu cu an ṭhang lai, cu bang in thisa in a nung mi minung cu an si ve, pakhat a thi lai i pakhat a chuak lai.  19Hlawhtlinnakkip cu an uai i an ziam, cu bang in a hmutu zong a si ve.  

Mifim hna i lawmhnak

 20Fimnak kha a ruat i a thluak in a tuaktan len mi, 21a lung in a kong a cawng i a biathli a ruat len mi poh cu mi lunglawm a si. 22 Amah kha ramvai bang a dawi i a lam ah a bawh; 23 a thlalangawng in a bih i a innka hram in a ngaih; 24a inn pawng ah aa ṭhum  a vanpang ah bahnak a bunh i; 25 a pawng ah a thlam a sak, a ṭha tuk mi riahbuk ah aa ṭhum;  26 a fale cu a thladem tang ah a chiah hna i a ṭengnge tang ah a thlam a sak;  27Nilin in a phenh i a sunparnak chung ah a thlam a sak.