SIRACH 48

Elijah

48 1Cun profet Elijah cu mei bang a dir, a bia cu meifar bang a alh hluahmah. 2An cung ah mangṭam a tluntertu a si, i Pathian a ṭanh tuknak ah a that dihtu cu amah hi a si. 3Bawipa bia in van hna cu a khar i voithum tiang ruah a surter. 4Maw Elijah, khuaruahharnak na tuah mi ah khan zei tluk in dah na sunlawi! Nangmah tluk in aa uangthlar ding an um ti maw? 5Mithi khua in mithi cu na thawhter i Cungnung Bik min in 6siangpahrang hna cu rawhnak ah na hnuhdawh hna, cun bawi sangsang hna cu an ihkhun in na ṭhumh hna; 7 Sinai tlang in hrocernak le Horeb tlang in dantatnak biachuah cu na theih; 8siangpahrang hna kha teirul chamtu ah le nangmah an changtu ding ah profet hna cu chiti na thuh hna.  9Amah cu phuchim mei le mei rangleng in van ah an kaipi; 10caan donghnak kong chimchungtu ah thiah mi le a puah hlan ah Pathian thinhunnak daihter awk le, pale hna lung kha fale hna sin mer awk le Jacob chungkhar kha an ram chung umter ṭhan awk ah a si. 11Nangmah an hmu mi hna, cun nangmah dawt bu in aa din mi hna cu thluachuak mi an si, zei cah tiah kanmah zong nunnak cu kan hmuh hrimhrim lai.

Elisha

13 Phuchim nih a zual i a kaipi mi cu Elijah bantuk cun Elisha cu amah thlarau in a khat; a nun chung ah aho uktu hmanh nih an hnin kho lo, cun aho hmanh nih an tei kho lo. 14Amah ca ah zei rian hmanh a har tuk lo; cun a thih hnu hmanh ah a ruak nih profet bia a chim rih. A nun chung ah khuaruahharnak a tuah hna i a thih hnu zong ah a tuahsernak hna cu khuaruahhar an si rih ko.

Zumh lonak le dantatnak

  15Hi tluk a tuah zong ah mipi cu an lung an i thleng hlei lo i an sual zong an hlaw hlei lo, cucaah an ram in chuah an tong i khuazakip ah an i ṭhenṭhek dih; 16 annih lak i tlawmpal lawng David Chung i uktu he an taang.  Cheukhat nih Bawipa duhnak an tuah i adang tu cu sualnak kha pakhat cung ah pakhat an chonhchih.  

Hezekiah

17 Hezekiah nih khualipi cu ralhau in a kulh i khua chung ah ti a thlak; lungpang kha tikhor ah a vih i tidil a ser.  18Amah a chan ah Sennacherib nih a hun doh i Rabshakeh kha a thlah; Zion kha a kut a thlirhnawh i puarthau ngai in aa uangthlar. 19Cun thinphang lungtur in an um i nu nganfah bantuk an si, 20Cu tikah an baan cu Bawipa sin ah an samh i zaangfahthiam Bawipa sin ah an au. Van in A Thiang Bawi nih khulrang in a theih hna i Isaiah tlangtlaknak in a khamh hna; 21 Assiaria riahbuk cu a tuk i a Vanmi nih annih cu a hloh dih hna.

Isaiah

22Zei cah tiah Hezekiah cu Pathian lung kha a tluanh i a pa David lamthluan ah fek tein a dir, cucu langhnak a hmuh nakah zumhtlak a si mi profet Isaiah nih a pek mi a si. 23A chan ah Ni cu hnu ah aa thawn; siangpahrang kumkhua kha a sauter. 24A lungthin ṭhawnnak in hmanung bik thil kha a hmuh hna, Zion a ṭah mi hna kha a hnemh hna, 28 25 hmailei a cang ding kha a dong tiang le thilthup hna kha  an can hlan ah a phuan hna.