Fimnak 19

Pasarihnak aa ralkah mi: Rili Sen

19 1Sihmanhsehlaw pathian hngal lo hna cu ṭihnung thinthunnak nih a dongh tiang a den hna, zei cah tiah zei an tuah te lai ti mi le 2 cun, a mi hna kha an thlah hna i khulrang in an chuah hnu ah an lung an i let lai i an dawi te hna lai ti cu a rak hngalhcia cang. 3 Annih cu ngaihchiat ṭhutpinak an tuah i an mithi hna kha thlaan ah an ṭah rih hna lio ah khan, adang khuakhannak ṭha lo an lung ah a hung chuak, an rak ṭhawl i chuah awkah an rak nawl mi hna kha a zaam mi bang an dawi ṭhan hna. 4A phu hrimhrim, vanchiatnak nih hi tluk luan in thil tuah awkah a fial hna i thil a rak cang mi kha a philhter hna; cucu an rak tuar mi hremnak ah khan adang philh khawh lo mi hremnak an i chap nakhnga a si, 5cu lio ah na mi hna cu i ruahchannak he i ralchanh in khuaruahhar khualtlawnak kha an ngei i an ral hna ṭihnung thihnak kha an tong.

6 Zei cah tiah sermi pohpoh hi na nawl kha ngai in, amah tein aa sersiam kho, cucu na fale hna an him naklai a si.  7An riahbuk cu khuadawm tlangpi nih thladem a pek; ti a rak um tawnnak ah leiro an chuak; Rilisen cu kalnak ṭha lam ah a cang, ṭihnung tilet hna cu nelrawn hringpi ah a cang; 8na kut nih a thladem pe in na miphun nih an ningpi in an tan i khuaruahhar ram ṭha ah an tlonglen.

9 Annih cu ramno a ṭam mi rang bantuk an si; tuufa tete hna bang an per i an i hlok, tlanhtu Bawipa, na thangṭhatnak hla cu an sa. 10Zei cah tiah an chuah lio thil si ning, ram chung in zei tin dah saṭil si lo in fikfa an chuah ning, tivapi hna nih nga si lo in utlak a sangsang an chuahpi ning ti mi hna kha an philh lo. 11Nehhnu ahcun vate hna phundang in ser ṭhan an si ning kha an hmuh te lai, hakkauh tuknak nih lem in, a thaw mi pakhatkhat an hal tikah an rawlṭam riamhter awkah 12rili chung in nimte an hung chuak.

Izip cu Sodom nakin a sual deuh

13 Sihmanhsehlaw misual hna cung ah cun ṭihnung khuari in ralrinnak pek hmasa lo in na daantatnak ruah cu a sur i an lainawn sualnak nih a hlawh ning in an intuar ko, zei tin tiah annih nih ramdang mi hna cung ah kha bantuk huatnak chiakha kha an rak langhter cang. 14 Midang an sin i a ra mi khual hna kha an rak cohlang taktak hna lo; sihmanhsehlaw Izip mi hna nih cun an mileng le anmah bawmtu hna kha sal ah an rak zuat hna. 15Cu lawng a si lo misual hna cu hi ruang ah hin danpek ah huah hrimhrim lai; zei tin tiah khual kha huatnak lungthin he an rak don cang hna;

16 Sihmanhsehlaw annih tu cu anmah he aa khat mi covo aa hrawm cang mi miphun kha sunglawi ngai in an cohlan hna, cun hnu ah rianhrang kha an liang ah an khinh hna. 17Cucaah miding kutka hram i misual hna bang mitcaw zawtnak nih a tlunh hna, muihnak ṭihnung nih a khuh hna, an kut in an i dap i leng ah an chuak.

Sermi thil lak ah rualremnak thar

18 Sermi thil hna lak ah rualremnak thar a chuak, tingtang hri vialte cu an aw kel an chuah nain a hlavaih aa thlen tikah a aw aa thleng kho; hi thil hi atu ah a cang mi a si: 19 tlang saram hna cu ti saram hna ah an cang, ti chung i a tlongleng tawn mi cu tlang ah an kai, 20mei nih ti in tha a lak, cun ti nih mei hmihnak thazaang a ngeih kha a philh; 21 khatlei ah mei-alh zong nih a chung ah a rak i paih mi saram no hna sa kha a kang lo; cun cu hlan ah a titter tawn mi hawrha a lo mi vanmi rawl kha a titter ti lo.

Biadonghnak

22 A si Bawipa, nang nih na miphun cu a lamkip in na lianhnganter i sunparnak na pek cang, khua zei caan le hmun hmanh ah anmah kha bawmh lo in na rak chia bal hna lo.