SALM 68:1-35

Israel sunparnak sangbik

68. 1 Pathian cu tho seh, a ral cu i `hek dih hna seh; amah a dohtu hna cu a hmaika in zaamdih hna seh. 2 Annih cu meikhu bang lo viar in na chem dih hna; mei nih a em tik ah khuailul cu a tit bang, mi`halo hna cu Pathian hmai ah cun an si ve. 3 Miding cu Pathian hmaika ah an i nuam, an i lawm i nuamhnak he an au. 4 Pathian sin ah hla sa tuah u, a min cu ringawn dawh he thang`hat u, khuadawm hna aa Cittu cu lam sialpiak tuah u, Bawipa ah i lawm u, a hmai ah laam u.

5 Ngak`ah hna i pa, nuhmei hna dirkamhtu, cu bantuk cu a hmun thiang i a um mi kan Pathian i min a si. 6 Pathian nih mipak kha umnak inn a pek hna, thongtla cu si`hatnak lei ah a hruai hna, sihmanhsehlaw dodal hmang cu ramcar ah khua an sa lai. 7 Pathian, na mi cu hmai na sakpiak hna tik le ramcar cu kar khat in na tanpi hna tik ah, vawlei cu aa hnin, 8 Pathian hmai ah, Pathian hmai, Israel Pathian hmai, ruah run surter awk ah van hna cu an i cheu. 9 Pathian, nangmah nih thluachuah vanruah na surter, na roco hna cu an tha a uai tik ah thazaang na pek hna. 10 Na chungkhar cu inn an ngei, cucu na `hatnak thawng in mitoidor na pek mi hna inn a si. 11 Bawipa nih nawl a pek, relcawklo ralkapbu hna ca ah thawng`ha a si. 12 Ralkapbu bawi hna cu an tli i an zaam, inn um mi`ha nih an hranchaw cu an i cheu. 13 Na tuukawm chung hnangam tein na um tik ah, na ~huro thla hna cu ngun in an par i a hmul cu suihring bang an lek; 14 liannganbik nih an ralbawi hna cu a `hek dih hna tik ah amah thawng in Muihnak Tlang cung ah hawhra a tla. 15 Pathian tlang, Bashan tlang! 16 Ruamkai tlang, Bashan tlang! Tlang ruamkai hna, zeiruangah dah Pathian nih a umnak ca a thim mi tlang cu na nahchuah? Khika ah cun Pathian cu zungzal in a um lai.

17 Pathian rangleng hna cu a thongthong an si; Pathian cu Sinai in a hmun thiang ah a rak ra cang. 18 Saltang hna kha i hruai in tlangpar hna ah na kai cang; mi kha, damiah hna tiang, ngunkhuai ca ah naa hruai hna, cucu Bawipa kan Pathian umnak a ngeih nakhnga caah a si.19 Bawipa cu nikhat hnu nikhat in thang`hat si ko seh, kan Khamhtu Pathian nih a kan kalpi. 20 Hi kan Pathian cu a kan khamhtu Pathian a si; thihnak in luatnak cu Bawipa Pathian sin in

a ra; 21 sihmanhsehlaw Pathian nih a ral hna lu, thilsual tuah in a vak mi sam-sau hna luruh cu a den cang hna. 22 Bawipa nih, ‘Bashan in ka kirpi `han hna lai, rili thukpi in ka chuah hna lai, 23 cuticun thisen ah nan ke nan i `awl lai i nan ui nih nan ral hna cu nuam in an liah hna lai,’ a ti. 24 Pathian, na hmunthiang ah zul thluaimai in na luhnak, kan Pathian, kan siangpahrang, zul thluaimai in a lutnak, cu mizapi nih hmuh khawh a si; 25 hlasa pawl hmai ah, ringawn tum pawl hnu in, a lai ah ngaknu pawl um in an khuangdar an tum hna lai.

26 Israel ram hram an domh ni in Bawipa Pathian cu hlaremh in an rak thang`hat cang. 27 Kha lio ah khan a hniang bik Benjamin cu hmai ah a rak um, Judah bawi, Zebulun bawi le Naftali bawi hna cu angki rang fual he an rak si. 28 Ka Pathian, na huham nih a hlawk mi na nawlngeihnak, Pathian, kanmah ca ah na rak i khon mi, 29 na nawlngeihnak cu Jerusalem cung na biakinnpi in hmang tuah. Siangpahrang hna cu laksawng i put in na sin ah an rak ra lai.

30 Hluang hna Sahrang, kha cawtum run le ngun tampi i thali in Sahrang hmai a kun mi kha sachia minung hna cu chimhrin hna. Raltuk ah aa nuam mi hna cu `hek dih ko hna. Izipt in phunbawi hna cu an ra lai i 31 Ethiopia cu Pathian lei ah a kut a thlir lai. 32 Vawlei pennak hna, Pathian sin ah hla sa tuah u. 33 Van hna, hmasa bik van hna, aa cit mi ca ah ringawn thlah tuah u. Khuka ah cun huham ngei ngai in bia a chim. 34 Pathian `hawnnak cu hngalhtheih in cohlang tuah u. A sunparnak cu Israel cung ah le a `hawnnak cu minmei chung ah khin a um. 35 A hmunthiang i Pathian cu khuaruahhar hringhran a si ko. Amah, Israel Pathian, nih a mi cu `hawnnak le huham a pek hna. Pathian cung ah thluachuah vanluhnak um ko seh.