SIRACH 37

Hawikom ṭha lo hna

37 1Hawikomkip nih, “Kei zong na hawi ka si,” an ti nain cheukhat hawi cu min lawng in hawi an si. 2Hawikom, asilole, lenpihawi cu ral i a can tikah zei tluk ngaihchia dah a si? 3Maw minung lungthin, vawlei hi na nalnak in khahter awkah zei ruang ah dah ser na rak si? 4Hawi phunkhat nih a hawi cu a huncho tikah a conglawmh, nain a har caan ah khattelei ah a ṭ ang. 5Cun adang phunkhat nih a hawi caah biatak in a tuar ve nain ral tuk caan a phak tikah hriam a la. 6Hawi ṭha cu philh hlah, na rum tikah amah cu na lung kilne in hlo hlah.   

Ruahnak petu hna

7Ruahnak petu dihlak nih ruahnak an pek, sihmanhsehlaw a cheu cu anmah hmuhnak lawng an kawl. 8Ruahnak petu dihlak kha va zum hna hlah, amah ca ah zei dah a duh ti kha va kawl hmasa; zei tin tiah ruahnak a pek mi cu amah ṭhatnak ca ah a si, 9Nangmah kha an ngiar i hmailei na cung i a tlung ding mi kha a hngalhcia caah nangmah kha, “Na lamthluan a hmaan ko,” an ti mi a si kho men.

10Lunghrinh in an zoh mi sin in ruahnak va hal hlah, an nahchuah mi sin in na khuakhannak cu va thup. 11Nu cu a ral kong, miralchia cu raltuknak kong, chawlet cu thilman kong, a caw mi cu zuarnak kong, a khiar mi cu lawmhnak chim kong, mi hakkau cu pekṭhenhnak kong, mithathu cu zei dang rian kong, mikhulnuar cu rian limnak kong, asilole, thathu sal cu a biapi mi rian kong va hal hlah. Hi hna hi zei ruahnak ca hmanh ah vaa bochan hna hlah.   

12Sihmanhsehlaw nawlbia a zul tiah na hngalh mi, Pathian aa bochan mi cheukhat kha ruahnak va hal zungzal hna.  13A donghnak ah na lung nih an pek mi ruahnak kha biatak in i tlaih, nangmah cung ah aho hmanh nangmah nakin an hmaan kho lo, 14zei tin tiah parthlam cung in a bih mi ralveng pasarih nakin mah lungthin nih a fiang deuh mi ralrinnak a pek deuh. 15Cun hi vialte hna nakin na karhlan kha biatak lam ah a hruai naklai Cungnung Bik kha nawl.

A dik le a dik lo mi fimnak

16Cawlcanghnak kip i a hrampi cu thluak a si awk a si, zei thil hmanh tuah hlan ah tuaktannak hmasa a herh. 17Khuaruahnak cu lungthin ah a hram a bunh, cun hi hna sin in ṭengnge pali an corh: 18 ṭhatnak le chiatnak, nunnak le thihnak, annih vialte i bawinu cu hmurka a si zungzal.  19Mi pakhat cu midang cawnpiak a thiam nain amah ca ah zei hmanh a ṭhahnem lo; 20Adang pakhat cu biachim a thiam ngai nain fih a nung i rawlṭam in a thi, 21zei cah tiah anih cu Bawipa mithmai ṭha a tong lo i zei fimnak hmanh a ngei lo. 22Adang pakhat cu mifim ah aa ruah i amah ruahnak kha a hmaan bik ah a thanh. 23Sihmanhsehlaw a fim taktak mi nih cun mi kha a cawnpiak hna i a ruahnak cu a hmaan ti kha a fiang. 24Mifim cu thluachuahnak he a khat i a hmu mi vialte nih amah cu mi lunglawm ti an auh. 25Minung nunnak hi ni tlawmpal a si, nain Isreal chan cu rel khawh a si lo. 26Mifim cu a mi hna i bochannak kha a hmuh lai, cun a min cu a hmun zungzal lai.

Tawkzawn thiamnak

 27Ka fa, na nunchung ah zei he dah naa tlak ti cu nangmahte in i zoh ko; nangmah he aa tlak lo mi cu i lak hlah, 28zei cah tiah zei zongte hi mikip ca ah a ṭha dih lo, cun mikip nih zei zongte an duh ve lo. 29Rawlthawkip kha ei cim lo in um hlah, na or khu tuk hlah, 30zei cah tiah ei luannak nih zawtnak a chuahter i tam tuk einak nih thinfahnak a chuahter. 31Tam tuk ei ruang ah mi tampi an thi cang; ei le din i sum law na nunnak sauter ko.