SALM 39:1-13

Pathian hmai ah minung zei hmanh si lonak

39. 1 Ka lei in ka sual nakhnga lo kaa ralrin lai. Misual ka pawng a um chung poh cu ka hmur kha chak ka banh lai,’ ka ti. 2 Holh-aa bang, zei hmanh chim lo, dai tein ka um, sihmanhsehlaw misual hna hlawhtlinnak nih ka intuarnak cu a karhter. 3 Ka lung cu a rak dai cang ka ti nain hi kong ka ruah ah a tho `han, cun ka kaa in bia cu an hung pawt lulhmalh, 4 ‘Bawipa, ka sining hi hngal ka duh, zei tik tiang dah ka nun rih lai, zei tluk in ka derthawm ti cu ka hmuhsak tuah. 5 ‘A si, Ka nunnak cu zabok, asiloah, zabok hnih can lawng na ka pek, nangmah ca ah cun ka kumkhua cu zei hmanh an si lo. Vawleicung i a dir mi mi kip cu thli voikhat chem men an si, 6 vawleicung i a vak mi kip hi thladem men an si ko; khon mi chawva zong cu thli voikhat chem men an si ―aho nih a `hatnak a co lai ti zong hngalh a si lo.

7 Cucaah atu, Bawipa, zei dah kaa ruahchan lai? Kaa ruahchannak cu nangmah chung ah a um. 8 Ka sualnak vialte in ka khamh ko, mihrut hna nihsawh men ding ah ka chia hlah. 9 Nangmah hrimhrim nih keimah can ah na cawl ko caah dai tein ka um, bia ka chim lo.10 Na ka hremnak cu ka lakpiak ko cang, na ka tukvelhnak in ka `hom dih cang. 11 Sual dantatnak in minung phun cu na chimhhrin, rungrul bang in an duhnak vialte cu na ei dih hna- minung phun cu thli voikhat chem men an si ko. 12 Bawipa, ka thlacamnak ka theihpiak law bawmh hal in kan aunak cu ka ngaihpiak ko sawh; ka `ahnak cu i theihter lo in um hlah. Zeicahtiah kei cu na chungkhar ah khual le ka pupa hna vialte bang mivakvai ka si. 13 Ka thaw a dih i ka loh hlan ah zalong tein ka thaw ka chuah nakhnga ka mertak ko.