SIRACH 33

33    1Bawipa a ṭihmi cu zei chiatnak hmanh nih a tlunh hna lo; harsatnak vialte chung in tlanh a si lai. 2Phungbia a hua mi aho hmanh mifim an si bal lo, Phungbia kong a lung a awṭom mi cu tilet nih a choih mi tilawng bantuk a si. 3Mithluak ṭha cu Phungbia kha aa bochan lai i cu bantuk ca ah cun Phungbia cu profet bia tluk in zumhtlak a si. 4Bia na chim hlan ah ṭha tein i tim, cun na bia cu ṭha tein an ngaih lai; bia na leh hlan ah na rak theih mi kha ruat hmasa. 5Mihrut lung cu cawleng-ke bantuk a si i a ruahnak cu aa hel zungzal. 6Mi nihsawh hmang hawi cu a zia a rawk mi rang bantuk a si, aho nih an i cit zong ah a awnh hnawh hna.

I tluk lonak

7Kumkhat chung ni a chuak mi nih aa khat mi ceunak a pek nain zei ruang ah dah nikhat cu adang ni nakin a ṭhat deuh? 8Cucu khuacaan le puai hna adang tein a rak ser mi Bawipa nih a lung chung in adang tein a rak chiah hna caah a si; 9a cheu ni cu a biapi deuh mi ah a rak ser hna i a thianter hna, a cheu cu ni sawhsawh ah a rak ser hna. 10Minung phun cu vawlei in a ra i Adam cu leidip in ser a si. 11A tling mi a fimnak in Bawipa nih an karlak ah dannak a rak ser i an si ning kha a ṭhen hna.  

12A cheu cu thluachuah a pek, mithiang ah a ser i a pawng ah a umter hna; adang cu chiat a serh hna i an si ning a ṭhumh hna caah an hmai a chiatter hna. 13Um sertu nih a kut chung i tlak cu a duhduh in a sersiam bang in kannih cu a dik a ti ning in thluachuah pek awkah Sertu kut ah kan um ve.  14 Ṭhatnak cu chiatnak he, nunnak cu thihnak he aa ralchanh, cu bantuk in misual zong miding he aa ralchanh ve. 15Cungnung Bik nih a tuah mi thil cu tuaktan hna hmanh, i ralchanh in, a khuah in an um cu na hmuh lai.

16Hmanung bik ah a ra mi ka si nain mitsur lo hna nih an philh mi a chartu bang in ka mit cu ka au.  17Bawipa thluahchuahnak thawng in hmasa ah ka ra i mitsur lotu taktak hna bang ka mitsur nennak cu ka khahter. 18Keimah ca menmen ah si lo in ka cawnpiaknak a duh mi vialte hna ca ah a si kha i cinken tuah u.

19Mipi hruaitu hna, tonpumhnak upa hna, ka bia hi ngai tuah u.

Zalonnak

20Na nun chung cu na fapa, na nupi, na unau le na hawi hmanh, na cung ah chia hna hlah. Cun na chawva cu aho hmanh pe hna hlah, naa ngaihchih ahcun na hal ṭhan hna a herh sual lai. 21 Na nun i na pum chung na thaw a um chung poh cu aho sin hmanh ah na nawlngeihnak pe hlah, 22Nangmah nih na fale sin i na hal hna nakin na fale nih nangmah an i hal a ṭha deuh.  23Na tuah mi poh ah saya si law na minthannak thurter hlah. 24Na thih caan a phanh i na thih lai lawng ah na ro cu phaw hna.

Na sal hna

25Rawl, fung le thilrit cu laa hna ca ah a si i changreu, chimhhrinnak le rian cu sal ca ah a si.  26Na sal cu rianhar ṭuanter law hnangamnak na hmuh lai.  Umhar in chia, zalonnak an hal lai. 27Thilrit le thirphaw nih a kunter lai, zei cah tiah hremnak le fungfek cu salchia ca ah a si. 28 Rian ṭuanter, cu lo ahcun a tha a thu lai, thathutnak nih thil ṭhalo phunzakip a cawnpiak. 29 Amah hmun ah a rian cu ṭuanter ko, na bia an ngaih lo ahcun thir in tu. 30Sihmanhsehlaw aho cung hmanh ah va luan hlah, cun dinnak he aa ralchanh mi zei hmanh tuah hlah.

31Sal pakhat te lawng maw na ngeih? Nangmah bantuk in zoh, zei tin tiah amah cu thi in na rak cawk mi a si. 32Sal pakhat te lawng na ngeih ti? Na unau bang in zoh, zei tin tiah amah cu nangmah le nangmah naa herh bang in na herh ve. 33 Ṭha tein na zohkhenh lo i a zaam a si ahcun khua zei lam in dah na kawl lai?