SIRACH 12

12 Ṭhatnak tuah naa timh ahcun a co ding taktak kha thim, cun ṭhatnak na tuah mi cu a lak a si lai lo. 2Pathian a hngal mi sin ah ṭhatnak tuah law lawmh man na hmu lai, kha nu le kha pa sin in a si lo hmanh ah Cungnung Bik sin in na hmuh hrimhrim lai. 3Chiatnak ah aa ciah mi le mi a pekṭhenh a duh lo mi cung ah zei ṭhatnak hmanh a tlung bal lo. 4Pathian a ṭih mi kha bawm, bawmhnak pek awkah misual sin ah va kal hlah. 5Mitoidor cung ah ṭhatnak tuah law pathian hngal lo cu zei hmanh va pe hlah. Amah cu changreu pe hlah, zei hmanh va pe hlah, nangmah nakin a ṭhawng deuh sual lai, cun a cung ah na tuah mi ṭhatnak cu chiatnak in lethnih an cham sual lai.6 Zei ca ah tiah Cungnung Bik hrimhrim nih misual cu a huat hna i annih kha an i tlak ning in a cham te hna lai.  7Mi ṭha kha pe law bawmhnak pek awkah misual sin va kal hlah.

Hawikom dik le hawikom deu

8Si ṭhat caan ah aho hi dah hawikom ṭha ti mi cu na chim kho lai lo nain chiat caan ah aho hi ral ti cu na palh kho lai lo. 9Zei zongte a tlam a tlin a si ahcun a ral cu a ngaih a chia, zei hmanh a tlam a tlin lo ahcun a hawi hmanh a tlau. 10Ral cu va zum hlah, a chiatnak cu dar cirik nih a kaih bantuk a si. Toi aa dor i lukun le kheuhpah in a rat hmanh ah va naih hlah law vaa ralring. 11Thlalang thianh tluk in va ralring, a thuh mi a zia cu a lang ko lai. 12 Na pawng ah umter hlah, an thawn i na hmun an rolh sual lai. Na orhleikam ah va ṭhutter hlah, na hmun chuh an timh sual lai, cu tikah ka bia cu na lung ah a rak chuak lai i ka bia a hmaan cu ngaihchia ngai in na cohlan sual lai.

13Rul-camhthiam cu rul nih a cuk i sahrang kawl pawl an i hliam tikah aho nih dah a zaangfah bal hna? - 14 cu bantuk in misual a kom i a khuasual aa hrawm mi a si ve.  15 Tlawmpal na sin ah a um lai i caan rem a hmuh cangka in caan ṭha an lak ko lai.  16Ral cu a biaka a thlum kho men ko, nain a lung chung ah cun nangmah kha hnawmkhor chung thlak ding ah khuakhannak ṭha lo a ngei. Ral nih a mithli a thlak khawh men ko, sihmanhsehlaw caan ṭha a hmuh poh ahcun a tam tuk ti a um lo. 17Vanchiat na ton ahcun a rak chuak colh lai, cun nangmah an bawm lai bang, an thlamh dih lai. 18A lu a thin lai i a kut a bengh lai, biathli tampi a chim lai i a hmai aa thleng lai.