SALM 38:1-22

Lung sivang caan thlacamnak

38. 1 Bawipa, thinhung in ka chimhrin hlah, thinlinh in nun ka cawnpiak hlah. 2 Zeicahtiah na fei nih ka chungril tiang a hlat cang, na kut nih a ka nenh tuk cang. 3 Na lungtlinlonak ruang ah ka taksa vialte an fak dih cang, ka sual tuk ruang ah ka ruh hna zong an fak dih cang. 4 Ka sualnak cu ka lu cung an phan cang, an rit tuk i tuar khawh an si ti lo. 5 Ka rak hruh ruang ah a thu i a nam mi hma ka ngei, 6 A ka kuaih i vawlei ka tawng cang, ngaihchia in caan ka rel.

7 Ka tai cu a linh in a lin, ka takpum cu an fak dih. 8 Ka `hom i ka maan dih ko cang. ngaihchia lungkuai in ka hrum. 9 Bawipa, ka duh mi cu na hngalh dih ko, ka thawpi lawng ka chuah cu na hngalh ko, 10 Ka lung a tur, ka tha a dih. Khuaceu ka hmu kho ti lo. 11 Ka hawi le ka kawi hna nih hma ka ngeih caah an hrial, ka dawt bik mi hna hmanh nih lamhla ah an tawn cang. 12 Ka nunnak a kawl mi hna nih ka lam ah rap an chiah, ka ca thil`halo a duh mi hna nih zaang-ennak bia lawng an chim i chunnitlak keimah tlaknak ding lawng khua an khang. 13 Sihmansehlaw hnachet bang zei hmanh ka thei lo, holh-aa bang kaa khat hmanh ka chim lo. 14 Keimah cu, zei hmanh a hngal lo mi bang, leh ding bia zei hmanh ka ngei lo.

15 Zeicahtiah, Bawipa, ka ruahchannak cu nangmah na si; Bawipa ka Pathian, nangmah nih na leh hna lai. 16 Keimah nih, ‘Ka cung ah an di riam bal hlah seh, ka rilh sual hmanh ah ka cung ah caan`ha i lak hna hlah seh,’ka ti. 17 Kei ka ca ah cun luatnak ding lam a um lo, ka ngaihchiatnak ah hnemhnak a um lo. 18 Sihmanhsehlaw ka sualnak cu ka thup lo, ka sualnak cu fakpi in ka ruat hna. 19 A ruang um lo piin a ka dohtu cu chim cawk lo an si, zei hmanh ti hmasa lo in a ka huatu hna cu rel cawk lo an si, 20 `hatnak cu chiatnak in an ka cham, an ca ah `hatnak tuah kaa zuam caah an ka thangchiat. 21 Bawipa, ka kaltak hlah, ka Pathian, ka zamtak sawh hlah. 22 Bawipa le ka khamhtu,keimah bawmh awk ah khulrang in ra ko cang.