SALM 48:1-14

Pathian tlang Zion

48. 1 Bawipa cu a lianngan i kan Pathian khualipi ah thang`hat awk aa tlak bik mi a si, 2 a tlang thiang cu a sang i aa dawh hringhran, vawlei pumpaluk kha lawmhnak a pek. Zion Tlang cu chaklei laifang ah a um, siangpahrang ngan umnak a si. 3 Pathian hrimhrim cu a innpi hna chung ah a um i a ralhau a sinak kha a langhter. 4 Cucaah zoh hmanh, siangpahrang hna cu an i pum, hmunkhat in an rak chuak; 5 an hmuh in, voikhat an cuan in, an lau tuk i an zaam dih hna. 6 An hmun ah `ihnak nih a tlaih hna, nganfah in nu bang an si. 7 Tarshish tilawng hna a hrawk dihtu cu nichuahlei thli a si bang in, nangmah nih annih cu na hrawh hna. 8 Kan rak theih mi cu kanmah hrimhrim nih kan Pathian khualipi ahcun kan hmuh, van ralkapbu Bawipa khualipi cu Pathian nih zungzal ca i a rak dirh mi a si.

9 Pathian, na biakinnpi ah a fek mi na dawtnak kong cu kan ruat! 10 Pathian, na min le na thang`hatnak cu vawleicung khuazakip ah a cul. 11 Na orhlei kut cu khamh-dinnak in a khat, Zion Tlang cu aa nuam, Judah fanu cu na khamh-dinnak ah aa lawm. 12 Zion khualipi cu hel in a chung tiang vung lut tuah, a innsang hna cu rel hna, 13 a vanpang hna cu khuaruahhar in cuan hna, a innpi hna cu `ha tein zoh hna. 14 Cucu kan Pathian cu hi bantuk a si ti chimh hna awk ah a si; kan Pathian cu zungzal in a hmun i amah cu kan hruaitu a si.