2 Maccabaeus 10

Biakinn thianternak

10 Makabi le a hawile hna cu Bawipa lamhruainak thawng in Biakinn le khualipi cu an sak ṭhan hna; 2 cun ramdangmi hna nih chawdawr ah an dirh mi biakṭheng le innthiang hna cu an hrawh dih. 3 Hmunthiang kha an thianh i biakṭheng dang kha an sak; cun ṭeklung kha an tuk i mah mei khan kumhnih ah a voikhat raithawinak cu an pekchanh,  rimhmui an khangh,  mei-inn an van i changreu kha an hun ṭhan. 4Hi thil hna an tuah hnu ah vawlei ah an bawk i Bawipa sin ah ral kut ah a chanh ti hna nakhnga lo, an sual ṭhan hmanh ah a tawkzawn in a chimhhrin hna i pathian hngal lo le ramdangmi hna sin ah a chanh hna nakhnga lo an nawl. 5Hi biakinn an pekchanh ni cu ramdangmi hna nih Biakinn kha an rak buar ni, Chislev thla, nikul le ninga ni thengte ah a si. 6 Puai cu niriat chung nuam ngai in, Deu puai bantuk in an tuah, a rauh hlan, Deu puai an rak tuah ah khan saram hna bang tlangcung le lungkua nganpi hna ah an rak um mi kha an ruahchih hna. 7Cu tikah thinghnah bor le tumhnah hna kha i put in a hmun thiang pekchanhnak kha lawmhnak ah a canter mi Pathian cu hla in an thangṭhat. 8 Jew miphun pumpi nih kha puai cu kumfatin tuah ding ti mi nawl cu vote thlaknak in an fehter.

VI: A PAWNGKAM MIPHUN HNA LE ANTIOCHUS MINISTER, LYSIAS RALCHANH IN JUDAS CAWLCANGHNAK

Antiochus panganak pennak: Hmasa kum hna

       9 Hi thil si ning hna hi Epifanes hnuzul Antiochus kha thihnak a hruai mi hna an si. 10Atu kan rian cu pathian hngal lo fapa Antiochus Jupator tuanbia kha phuan in ral nih a chuahpi mi thil ṭha lo hna kha a tawinak in chim kha a si. 11 Siangpahrang dirhmun ah a hung kai tikah, Coele – Siria le Fonisia i ralbawi lu bik Lysias kha ram rian ngan bik a pek, 12 cu lio ah Jew hna ding tein hmasa ah a rak uktu, Macron ti in hngalh mi Ptolomy cu hlan a rak tuahsualnak vialte kha cham in a si khawh chung in daihnak in a uk hna. 13 Cucaah siangpahrang i Pakhatnak Hawile hna nih siangpahrang sin ah a thangchiatnak an va chim. Cun a kalnakkip ah mi nih amah cu rawitu tiah an auhnawh kha a theih, cucu amah nih Filometar nih uk ding ti in a rak pek mi Cyprus kha a kaltak i Antiochus  Epifenes sin ah a kal caah a si, cun a rian a san tluk in upat a ton lo tikah thihsii a din i aa that.

Gorgias le Idumaea ralhau hna

       14Atu Gorgias cu peng ralbawi a si; hlawhfa ralkap hna kha aa chiah hna i Jew hna he ral an i tu peng. 15Mah caan ṭhiamṭhiam ah cun ralhau biapi a uktu Idumaeami hna nih Jew hna kha hnahnawhnak an pek hna; Jerusalem i mihrokhrol hna kha an cohlan hna i ral an ser zungzal. 16Makabi le a mi hna cu anmah kha bawmh awkah mipi he Pathian sin ah an nawl hnu ah Idomaea ralhau kha an tuk hna. 17Fak pi in an tuk hna caah hi ralhruang ngan hna cu an lak i ralhau in a rak tu mi hna kha an ṭhio dih hna; an kut ah a phaan mi vialte, thongkul nak tlawm lo cu an saam dih hna. 18A tlawm bik ralkap thongkua cu innsang ngan pipi pahnih chung ah kharkhumhnak in i dirkamh ah a herh hnga mi thilri hna he an i dor.  19Cu tikah Makabi nih kha innsang kharkhumhnak ding ah a herh mi milu nganhtak in Simon le Josep cu Zakhia le a ralkapbu hna he a kaltak hna i anih tu cu amah zohkhenh a herh mi hmun dangdang ah a kal. 20Sihmanhsehlaw Simon minung hna cu tangka an duh tuk caah innsang chung mi cheukhat kha zik an i nawhter, drakma tangka thong sawmsarih kha an cohlan i tamnawn kha an luatter hna. 21 Makabi sin ah thil a cang mi kha an chimh tikah mipi ralbawi hna kha a auh hna i khuasual a tuahtu hna cu anmah a tu hnga ding ral hna kha an thlah hna caah an unau cu tangka ah an zuar cang hna ti in a mawhchiat hna. 22 “Rawitu hna,” ti in a thah hna hnu ah kha ralhau pahnih hna lak awkah aa thawh colh. 23 Hriamnam thazaang thawng in a tuah  mikip ah a hlawh a tling i kha ralhau pahnih chung i minung thongkul leng cu a saam dih hna.

Judas nih Timotheus kha a tei i Gezer kha a lak

       24 Jew mi hna nih voikhat an rak tei cang mi Timotheus nih atu ah hlawhfa ralkapbu tampi kha a pumh, Asia ram in rang ralkap tampi zong kha a lak hna, cun Jew hna kha hriamnam thazaang in tei awkah a hung lang zau.  25 A hun fuh hna tikah Makabi le a mi hna cu Pathian sin ah nawlnak an tuah, an lu ah leidip an i phulh, an tai ah buri an i menh.  26 Biakṭheng hmai hleihlak ah an bawk i Phungbia nih fiang tein a chim bang in anmah kha bawmh awkah le an ral kha amah ral ah le anmah a dohtu hna kha amah a dohtu i ser awkah an nawl.

27Thla an cam hnu ah hriamnam an i lak i khuapi in lamhlat nawn tiang an kal, cun an ral pawng an phak tikah an cawl. 28 Zingka khua a hung ceu ah khin kaphnih ralkap hna cu an i tu, phukhat nih a teinak le a hlawhtlinnak cu an ṭhawnak lawng si lo in Bawipa bawmhnak a si an ti lio ah, adang phu nih cun teinak ca ah an thazaang lawng kha an i rinh. 29Ral an i tuk saling ah khan mi pumrua ṭha panga cu suichak he rang i cit in Vancung in an rung lang i Jew hna hmai in an tuk ve kha an hmuh; 30 Makabi kha an kulh, hliamhma hmu lo ding in an phaw in an kham i him tein an chiah; cu lio ah ral hna cu an mit a caw an lung a mit i ningcang lo in an i ṭhek dih tiang, thal le ṭek in an kah hna. 31 Ke ralkap thongkul le zanga le rang ralkap zaruk hna cu an saam dih hna. 32Timotheus hrimhrim cu fek ngai in an kulh mi Kezar khua ah a zaam, cuka i ralbawi cu Chaerea a si. 33Makabi le a mi hna nih nili chung thatho ngai in ralhau kha an kulh, 34 cu lio ah a vengtu hna cu an ralhau a himnak kha i bochan in annih kha an volhpamh hna i chiat an serh hna. 35A ninganak khua a dei tikah Makabi mi pakul hna cu paduhlo lungthin he vanpang cu an den i an hmai i a hung chuakmi poh kha an saam dih hna. 36A dang hna zong cu bantuk lungthin he ralvengtu hna kha hnulei in an tuk hna, innsang kha mei in an khangh, thingpum kha an duah i a cung ah Pathian a volpamhtu hna cu an nung in an khangh hna.  Mah lio ah cun hmaifong ralkapbu hna nih kutka hna an hun, a tang mi ralkap hna kha an luhter hna i khuapi kha an lak. 37Timotheus cu tikhor chung ah a rak i thup; asinain a naupa Chaerea le Apollofanes he an thah hna. 38Hi vialte a dih tikah hla le lawmhnak he Israel kha mah tluk in a zaangfah i teinak a petu Bawipa kha an thangṭhat.