SALM 30:1-12

Tihnung thihlonak hnu lawmhnak

30. 1 Bawipa, nangmah nih na ka cawisan, ka ral cu ka cung ah an di na riamter hna lo caah kan thang`hat. 2 Bawipa ka Pathian, na sin ah bawmh hal in ka au i damnak na ka pek. 3 Bawipa, Mithi khua in na ka chuah cang, leidai tang a `um mi hna sin in na ka chuah i nunnak na ka pek `han. 4 Nannih zumtu hna, Bawipa cu tingtang he thang`hat tuah u; philh khawh lo a thiannak cu thang`hat tuah u. 5 A thinhunnak cu caan khatte lawng a si, a dawtnak cu chan chung ca a si; Zan ah mitthli tlaknak um hmanh sehlaw zingka niceu he lawmhnak authawng a thang`han.

6 Zei tuaktan lo in, ‘Mi zei hmanh nih an ka hninh kho lai lo!’ka rak ti! 7 Bawipa, na dawtnak nih zapi phak khawh lonak tlangpar ah a ka chiah, sihmanhsehlaw na ka mertak tik ah ka thin a phang. 8 Bawipa, nangmah sin ah ka au, ka Pathian, zaangfah nawl in ka au. 9 Ka thih le mithi khua ka `umnak nih zei sulllam an ngeih? Leidip nih an thang`hat kho lai maw, zumhtlak na sinak cu a thanh kho lai maw? 10 Bawipa, ngai law ka zaangfah ko. Bawipa, a ka bawmtu si hram ko! 11 Ka hrumnak cu laamnak ah na thlen cang, ka buri cu na phoih i lawmhnak in na ka thuamh. 12 Cucaah ka lung nih ngol lo in an thang`hat lai. Bawipa ka Pathian, nang cu zungzal in kan thang`hat lai.