1 Maccabaeus 13

V: SIMON, TLANGBAWI NGAN LE PHUN UKTU BAWI

(143-134 BC)

Simon nih ralbawi a ṭuan

13 Traifo nih Judea kha chim i hrawh dih awkah ralkapbu nganpi a pumh cang ti kha Simon nih a theih, 2 cun mi cu amah ṭih ah zei tluk in an lung a tur cang ti kha a hmuh tikah Jerusalem ah khan a va kal, mi kha a pumh hna i annih kha 3hiti hin tha a pek hna: "Keimah le ka unau hna le ka pa chungkhar nih phungbia le hmunthiang ca ah zei tluk in kan cawl ti cu nanmah hrimhrim nih nan hngalh dih ko; zei bantuk ral le harnak hna dah kan tuar ti zong nan hngalh ko. 4 Israel zawnruah in ka unau hna cu an thi dih i keimah lawng ka tang cang. 5Kei cu ka unau hna nakin zei ka si hlei lo caah hremnak zei bantuk a um zong ah ka nunnak zuah ding cu a si kho lo mi a si.  6Atu ramdangmi cu kanmah hrawh awkah an i pum cang i ka miphun, hmunthiang le nan nupi le nan fale hna ca ah ka nunnak tu ka thap ko lai," tiah a ti hna. 7A bia kha an ngaih tikah an lung cu mei bang a alh i amah tu kha,8 “Nangmah hi Judas le na upa Jonathan can ah a kan hruaitu na si. 9Kanmah ca ah ral kan tukpiak law na kan fial mi poh kan tuah ko lai,” ti an auhnawh. 10Cucaah, amah nih raltuk thiam vialte kha a pumh hna, Jerusalem vanpang sak le a pawngkam kulhnak vialte kha khulrang in a dihter hna. 11Ralkap tamnawn kha Absolom fapa Jonathan hruainak in Joppa ah a thlah hna i anih nih khuami kha a ṭhawl dih hna i khaka ah khan khua a sa.

Simon nih Traifo cu Judea ram in a ṭhawl

12 Atu cu Judea tuk awkah Traifo cu ralkap tampi he Ptolemai in a chuak, Jonathan kha a cawngtu he aa kalpi. 13 Simon cu nelrawn ral Adida ah khan riahbuk a khuar. 14Simon nih a upa Jonathan hmun kha a rolh cang ti le amah he i tuk a duh ti a theih tikah Traifo nih palai kha hi bia he a thlah hna: 15 "Na upa Jonathan cu siangpahrang ngunkhuai leiba a ngeih caah kan tlaihmi a si; 16Ngun tangka ṭalen zakhat le a fapa pahnih kha ralsal ah kan kua, cun amah kha kan thlah tikah a kan doh lai lo ti bia naa kam a si ahcun kan thlah ko lai,” tiah a ti. 17 Simon nih mah bia cu lemnak a si ko ti kha a hngalh nain phaisa le ngakchia pa pahnih cu a kuat hna; 18cucu mi nih phaisa le ngakchia a kuat hna lo ruang ah Jonathan a thi an ti lai i huatnak lungthin an ngei sual lai ti a phang. 19 Cu ruang ah phaisa le ngakchia pahnih cu a kuat ko; asinain Traifo cu a biakam a let i Jonathan kha a thlah lo. 20 Cu hnu ah Traifo cu ram kha chim le hrawh awkah aa thawh. Adoralei ah aa mer, sihmanhsehlaw Simon le a ralkap hna nih kal a timhnak poh in an orh. 21 Ralhau khua chung um hna nih Traifo sin ah mi an thlah i amah kha an sin ah ramcar lam in rat in tirawl kuat awkah an nawl peng. Traifo nih a rang ralkapbu ningpi in ralram kal awk a timh nain cu zan ah hawrha tam tuk a tla i an pah khawh lo caah cuka in a chuak i Galeadlei ah aa mer. 23 Baskama a phak deng tikah Jonathan kha a thah i mahka ah cun a vui tak. 24 Traifo cu aa mer i a ram kha a va lak ṭhan.

Jonathan cu Simon nih Modein ah a sak mi Thlaan nganpi ah a vui

25Simon nih a upa Jonathan ruh kha a khawmhter hna i a pupa hna khuapi Modein ah khan an vui. 26Israel mi nih an rampi in an hraam i saupi an an ṭah. 27 Simon nih saih mi lungpher kha zapi hmuh khawh ding in a bunhpiak. 28A nu le a pa le a unau pali hna ca ah khan, pakhat le pakhat hmai aa chit mi pyramit pasarih kha a dirh, 29 tung sang pipi in a kulh hna i cu cung ah cun zungzal philh lonak ca ah ral an teinak hriamnam kha a chiah hna, cu hriamnam pawng ah cun, tilam in khual a tlawng mi hna nih an hmuh khawh ding ah tilawng hmantlak a chiah. 30Cu bantuk lungphun cu Modein ah a serpiak mi a si i nihin tiang a hmun.

Demetrius II nih Simon kha mithmai ṭha a pek

31Trifo nih kumno siangpahrang Antiochus i bochannak kha a rawiphiar i amah kha a thah. 32A bawi ṭhutdan kha a chuh i Asia ram bawiluchin aa chinh, cun  ram chung ah hnahnawhnak tampi a chuahter. 33 Simon cu Judea ralhau kha a sak hna, innsang hna, vanpang chahpi le bawl hrenh mi kutka hna in a kulh i an chung ah khan eidin a khon hna. 34Amah nih siangpahrang Demetrius sin ah palai a thlah i Traifo nih a tuah mi vialte cu ramhnak lawngte a si caah ramṭhen kha ngunkhuai in luatter awkah a nawl. 35Siangpahrang Demetrius nih a ca cu hiti hin a leh:

       36"Siangpahrang Demetrius sin in tlangbawi ngan le siangpahrang Hawikom Simon, cun Judea i upa hna le miphun sin biakchawnhnak:

 37Sui luchin le kuhchuk hnah nan kan kuat cu lungtluang in kan cohlan,  cun nanmah he daihnak ser ding le nangmah kha luatnak pek ding in zungbawi hna sin ca kuat ding timhcia kan si ko. 38 Nanmah kong ah biakhiahnak kan ngeih mi dihlak kha kan fehter hna i ralhau nan sak mi hna zong nanmah kut tang ah um ko seh. 39Timhnak nan ngeih zong ngeih lo zong ah atu tiang nan sualnak vialte cu kan in ngaihthiam dih hna, cun nan kan bat mi luchin ngunkhuai zong kan in ngaihthiam hna; cun Jerusalem ah khollh mi adang ngunkhuai vialte hna zong kholh an si ti lai lo. 40 Kan ralveng ah aa tlak mi nan um ahcun nan ra kho i kan karlak ah remnak um ko seh.

41 Cucaah 170 kum ah Jentailmi hna an khingrihnak cu Israelmi hna sin in lak a rak si. 42Mah kum ah cun kan mi hna nih zungca le biakamnak ca nganpi hna kha ṭialhram an thawk: "Tlangbawi ngan, ralbawi ngan bik le Judea phun bawi Simon i a rianṭuan kum khatnak ah" ti in an thawk.

Simon nih Kezar khua a laknak

43Mah lio hrawng ah cun Simon nih Kezar kha a kharkhumh i a ralkap in a kulh dih. Thawn mi seh kha a ser, khualipi ah a ratpi, ralhau kil ah khan a awng a vih. 44 A awng mi chung in mi cu khualipi ah an ṭum tikah khuapi cu a buai cang. 45Khuami cu an nupile an fale hna he, an hnipuan thlak in ralhau cung ah kai in anmah he remnak ser awkah Simon cu an auhnawh. 46Annih nih, “Kan ṭhat  lonak nih a phut nig si loin na zaangfahnak tluk in kan tuah ko,” tiah an ti. 47Simon cu anmah he remnak a ser i tuk cu a ngol, asinain annih kha khualipi in a ṭhawl hna, siasal in an buar mi an inn kha a thianh hna i thangṭhatnak hla he a lut. 48Thurhnawmhnak vialte kha a thianh i Phungbia a zul mi kha a umter hna; cun ralhau in a kulh hnu ah amah zong cuka ah cun a um.

Jerusalem i Ralhau khua ah Simon a lut

49Jerusalem khualipi Ralhau khua i a um mi hna cu khuatelei ah chuah in thil cawk le thil zuarnak nawl an ngeih lo caah rawl an har tuk cang i cheukhat cu buhrit in an thi cang. 50 Remnak tuah awkah Simon cu an nawl i an i rem, sihmanhsehlaw a ṭhawl hna i Ralhau khua cu a thianh.  51Jew hna cu 171 kum, thlahnihnak thla, nikul le nithumni ah kuhchuk hnah i put in thanglawi, sumsel le tingtang tum thawng he pathian hla le salm hla sak bu in an lut, zei tin tiah, ral nganpi cu an tei i an ṭhawl cang hna. 52Simon nih hi ni cu kum fatin lawmhnak puaini ah a ser. Simon cu Ralhau khua pawng i Biakinn tlang kha a kulh i a mi hna he mahka ah cun an um.  53A fapa Johan cu patling a si ve cang caah Simon nih ralkapbu hruaitu Bawibik rian kha a pek i Kezar khuapi ah a umter.