SIRACH 28

28 Teirul cham a hmang mi cu sualnak cazin fel tein a chia mi Bawipa i teirul chamnak a in ve lai. 2Na innpa i palhnak vialte kha ngaihthiam law thla na cam tikah na sual ngaihthiam na si ve lai. 3Mi pakhat nih adang pakhat cung ah a thin a hun zungzal ahcun Bawipa sin in zawnruahnak a hal ngam lai maw? 4Amah bantuk minung cung ah zaangfahnak a ngeih lo ahcun zei tin dah a sual ngaihthiam awkah a nawl ngam ve lai?  5Minung thisa men a si nain ngaithiamnak a ngeih lo ahcun aho nih dah a sualnak hna cu a ngaihthiam ve hnga?  6Hmanung bik thil hna, thihnak le rawhralnak kha ruat law huatnak kha hrial, cun nawlbia kha zul hna. 7 Nawlbia kha ruat law na innpa cung ah a ṭha lo mi lungthin ngei hlah, Cungnung Bik thisen biakamnak kha ruat law tuah sualnak cu maimilh ko.

Biaalnak

8Bia-al kha hrial law tlawm deuh na sual lai; zei cah tiah mi thintawi nih bia-alnak a chuahter. 9Misual cu hawikom hna karlak ah buainak a tuh, remnak a umnak ah rem lonak a luhpi. 10Zei tin dah mei a kangh ti cu a zinan nih a ngeih, bia-alnak cu entainak a tam zat in a karh ve. Mi pakhat i thinhunnak cu a ṭhawnnak cung ah aa hngat, a thin linhnak cu a chawva ning in a karh ve. 11Ruah lopi in bia i alnak nih mei a kau i ruah lopi in i siknak nih thisen a chuahter. 12Meiṭil kha chem law a alh lai, na cil chak law a mit ko lai; an pahnih in na kaa in an chuak.

Na lei

 13Mi kong ceih hmang le hmursau cu chiatserh si seh, cu bantuk mi nih hnangam tein a um mi mi tampi kha a hrawh cang hna. 14Kha pathumnak lei nih mi tampi i daihnak kha a khuai cang i annih kha ramkhat hnu ramkhat a kuat cang hna. Hruangkulh khualipi tampi kha a thlak i mi lianngan hna inn kha a thluk hna. 15A pathumnak lei nih nupi dingfel tampi kha mak a tonter hna i rianhar an ṭuan man kha a sunghter hna. 16A bia a ngai mi aho hmanh daihnak an hmu bal lai lo, hnangam tein an um bal lai lo. 17Fung tuknak nih hma a umter i lei tuk nak nih ruh kha a khiah dih. 18Mi tampi cu hriamnam in an thi cang, nain cu nak tam cu hmurka in an thi ve. 19Amah in a luat cang mi, amah he aa tawng rih lo mi, a thinhunnak a tep rih lo mi, a taphu a hnuk rih lo mi le a cikcin nih a hren rih lo mi cu mi thluachuak an si, 20 zei cah tiah a taphu cu thir taphu a si, a cikcen cu dar cikcin a si. 21A chuahpi mi thihnak cu zaangfah awk thihnak a si, Mithi khua hmanh i thim deuh a si lai. 22Pathian aa bochan mi cu a tlai kho hna lo, a meizik nih a hlio hna lo. 23Bawipa a mertak mi hna cu a kut chung ah an tla lai; an lak ah khan hmih khawh lo ding in a kang lai, chiandeih kha thlah hnawh an si lai i pawlai bang a thlehbauh dih hna lai. 24I ralring, na chawva cu hling in kulh hna, na sui le ngun hna cu hrenhkhumh dih hna. 25Cun na bia cu cuaithlai in a khing tah hna, cun na ka cu bawl in hrenh. 26Na karhlan na palh nakhnga lo i ralring, an bawh mi kut ah na tla sual lai.