SIRACH 18

Pathian lianngannak

18 Zungzal a nung mi nih zei zongte a rak ser dih. 2Bawipa pakhat lawng hi a ding mi a si lai. 4A tuah mi a dongh tiang thanh khawhnak nawl aho hmanh a rak pe lo, cun aho dah a tuah mi khuaruahhar cu a hngal kho lai?  5Aho dah a sunpar ṭhawnnak cu a banh khawh lai, cun aho dah hi pin ah a zaangfahnak cu a chim kho ti lai?  6Zei hmanh chap khawh an si lo i zuh khawh zong an si lo; Bawipa khuaruahharnak hna cu hngalh khawh ding an si lo.  7Mi pakhat nih ka dih a ti tikah a thawk lio lawng a si i, cun a ngol tikah a khuaruah a har chinchin.

Minung phun zei si lonak

8Minung phun hi zei dah a si? zei dah a tuah? A ca ah zei dah a ṭha i zei dah a chia?  9A chan cu a tam bik ah kum zakhat.  10Zungzal he tahchunh a si ahcun rili tidor dorkhat le thetse fangkhat bang a si i a tawi tuk.  11Hi ruang ah hin Bawipa cu an cung ah a thin a fual i a zaangfahnak cu a toih hna. 12A nun donghnak cu zei tluk ngaihchia a si kha a hmuh i a hngalh caah a zaangfahnak cu a nganter. 13Minung zawnruahnak cu a innpa tiang a phan, sihmanhsehlaw Bawipa zawnruahnak cu mikip sin ah a phan; 13hropah, remhpah le cawnpiakpah in tuukhal nih a tuu a tlunpi bang in a kirpi hna. 14A chimhhrinnak a cohlang mi le a biaceih lairelnak kha biatak in a kawl mi hna cung ah zawnruahnak a ngei.  

Pek ṭhenh ningcang

  15Ka fa, na dawtnak cu thangchiatnak le na laksawng hna cu biafak nih zorter hlah seh.  16Hawhra nih nikhua a nemter a si lo maw?  Cu bang in bia kaakhat cu laksawng nakin a sunglawi deuh. 17Zei cah tiah bia kaakhat cu laksawng ṭha nakin a sunglawi deuh, sihmanhsehlaw nun a siang mi nih cun a pahnih ca ah timhcia a si ko.  18Mihrut cu zawmhtaihnak hlei in zei hmanh a tuah kho lo, cun sian lo bu in pek mi laksawng nih mit a fimter.   

Khuaruahnak le Hmuhcianak

19Na chim hlan ah cawng hmasa law na zawt hlan ah i ralring.  20Biaceihnak a phanh hlan ah i purhdah hmasa law lennak ni ah cun dantatnak in na luat lai. 21Na zawt hlan ah i toidor law na sual cangka in i ngaihchih. 22Na biakamnak kha caan ṭha na ngeih lio i tlinter awkah zei hmanh nih in kham hlah seh; thihnak nih zei zongte bia a chah kha hngak hlah. 23Biakamnak na tuah hlan ah i timlam hmasa, cun Bawipa a hneksak mi mi zeimaw bantuk i canter hlah. 24Hmanung bik biaceihnak ni le Pathian nih a hmai a mer tik caan kha na lung ah riahter zungzal.  25Tampi ngeih caan ah mangṭam caan kha philh hlah, na rum tikah na si a fah le na bau caan kha philh hlah.

26Caan cu khuadei le khuamui karlak ah a dih ko, Bawipa ca ah cun zei zongte hi khulrang in a liam. 27 Mifim cu zei zongte ah aa ralring lai, sualnak a tam caan hmanh ah sual lo ding aa ralring lai. 28 A lung a fim mi poh nih fimnak cu an hngalh i amah a hmu mi poh kha an upat. 29Pupa hna bia a theithiam mi poh cu fimnak hmuh ding ah fak pi in an ṭuan i a dikciah in an chim kho.

Mah le mah i uknak

 30Pumsa duhnak nih in uk hlah seh, na duhnak cu i sum. 31Na pumsa duhnak kha naa sum lo ahcun na ral hna capo-saihnak men ah an canter lai. 32Thil ṭhaṭha i cawk hlah, cu bantuk hna phu zong ah vaa tel hlah. 33Na zal i zei hmanh a um lo lio ah rawldanghnak puai tuahnak i rawl hal-vak ah i ser hlah.