SIRACH 23

23 Ka nunnak i Bawipa, Pa le saya, an ruahnak chia ah ka hlaw hlah, anmah ruang ah ka tlukter hlah. 2Ka palhnak ah zaangfah lo le ka sualnak kha ka maimilh asi nakhnga lo aho nih dah ka ruahnak ah fungfek a chiah lai i ka lung chung ah fimnak zulhphung a chia lai, 3cucu ka palhnak a karh, ka sualnak an tam i ka ral hna kut ah ka tlak i an lung a awi nakhnga lo a si. 4Maw ka nunnak i Bawipa, Pa le Pathian, porhlawtnak mit ka pe hlah; 5Nahchuahnak lam in ka mer law, 6horduh cuainak nih ka tei hlah seh, ningzah hngal lo duhnak in ka kham ko sawh.

Chiatserh biakamnak

7Fale hna, kan chimh mi hna hi ngai u, ka bia a zul mi aho hmanh nan i awk lai lo. 8Misual cu a bia nih a awh, mi volhpamh hmang le mi porhlaw cu an bia nih a phozar hna. 9Chiatserh nun ngei hlah, a Thiang Bawi min thlir zong i ziak hlah; 10Ngiat zungzal mi sal cu hliamhma in a luat bal lo bang in a Min thlir in bia aa kam zungzal mi cu sualnak in a luat lai lo. 11Chiatserh biakam a hmang mi cu sualnak in a khat, cun a inn cu dantatnak in a luat lo. A palh ahcun a sualnak cu a cung ah a um lai, aho bia hmanh ngai lo in a tuahchih ahcun a lethnih in a sual cang. Lih in biakamnak a tuah ahcun miding ah an ruat lai lo, zei cah tiah a inn cu zatlaknak in a khat zungzal lai.

Hruhbia

12 Patkhat in biachim cu thihnak a si, Jacob roram ah um hlah seh, zei tin tiah Pathianlei ah aa zuam mi hna he pehtlainak zei hmanh a ngei lo, annih cu sualnak chung ah an i hnim lai lo. 13 Biahrang le bia chiahru chim cu na zia ah chia hlah, zei tin tiah sualnak bia an i tel. 14Mi lianngan hna he na ṭhut tikah na nu le na pa cu philh hna hlah, cucu an hmaika ah na um ti kha na philh i mihrut bang na cawl i na rak chuah bal lo kha an duh i na chuah ni kha chiat an serh nakhnga lo a si. 15Biachia chim a hmang mi cu an nun chung an i remh kho ti lai lo.

Horkhutnak

16Sualnak pakhat hnu pakhat a tuah mi minung phunhnih an um i a phunthumnak nih dantatnak a huah –17cucu mei bang a alhmi duhnak, a diriam hlan lo a dai lai lo – cun a chungkhar sin lila ah nu le pa sual duhnak lungthin a ngei mi cu a kangh dih hlan lo a ngol ti lai lo; Awrkhu hna ca ah rawl vialte an thaw i a thih tiang a ngol ti lai lo; 18Cun midang nupi sualpi i amah tein, “Aho nih dah a ka hmuh? Muihnak nih a ka kulh i vanpang nih a ka phenh; aho hmanh nih an ka hmu kho lo, zei dah ka phan lai? Cungnung Bik Pathian nih ka sualnak aa cinken lai lo,’ tiah a ti. 19A ṭihmi cu minung mit a si, Bawipa mit cu ni ceu nakin a let thonghra in a ceu deuh, minung cawlcanghnak vialte a ngiat dih, biathli i biathli kha a theih dih ti a hngal lo. 20Zei zong vialte cu ser an si hlan, ser an si lio, atu ser an si dih hnu zong ah a hngalh dih hna. 21Hi mipa cu aa rin lo bik caan ah tlaih a si lai i khua mi dihlak hmaika ah dantat a si lai.

Chiatnak cu a lung ah a tang zungzal lai i a ningzahnak cu a lo ti lai lo.

Hlawhhlang nu

22Cu bantuk in a vapa cung ah zumtlak lo in a nung, pa dang he a ngeih mi ngakchia a rak chuahpi mi bantuk a si ve lai; 23pakhatnak ah Pathian Phungbia a buar, pahnihnak ah a vapa a hlen cang; cun pathumnak ah hlawhhlang rian a ṭuan cang i pa dang sin in fa a pawi cang. 24Amah cu khuapi tonpumhnak ah an chuahpi lai i a fale hna kong ah biahalnak tuah a si lai.25A fale hna cu an hram an bunh kho lai lo i amah a ṭengnge hna cu thei an tlai kho lai lo. 26 Chiatserh philh lonak kha a chiahtak lai i a ningzahnak cu a lo ti lai lo. 27Cun amah aa cinken mi vialte nih Bawipa ṭih hlei in a ṭha deuh mi a um ti lo ti le Bawipa nawlbia i tlaih hlei in a thlum deuh mi zei hmanh a um ti lo ti cu an hngalh lai.