SALM 20:1-9

Siangpahrang ca thlacamnak

20. 1 Na lungretheih caan ah Bawipa nih in let ko seh, Jacob Pathian min nih in huppheng ko seh! 2 A hmun thiang in bawmhnak in thlahpiak ko seh, Zion in bawmhnak in pe ko seh! 3 Na raithawinak kha philh hna hlah seh law na khanghthawinak nih a lung tawng ko seh! 4 Na saduhthah tlinter sehlaw na khuakhannak vialte tlinter ko seh! 5 Cuticun lawmhnak he na teinak cu kan conglawmh khawh lai i kan Pathian min in kan teinak puanzar cu kan thlir khawh lai. Bawipa nih na hal mi vialte in pe ko seh. 6 Atu Bawipa nih chiti thiang a thuh mi cu teinak a pek ti ka hngalh cang. A thiang mi a van khin, a orhlei kut in teinak nganpi he a leh lai. 7 Micheu nih rangleng an i bochan, a cheu nih rang an i bochan, sihmanhsehlaw kannih cu Bawipa kan Pathian min kan i bochan. 8 Annih cu an pur lai i an tlu lai, cu lio ah, kannih cu fek te le ding tein kan dir lai. 9 Bawipa, siangpahrang cu khamh ko, kan in auh tik ah kan let ko.