SALM 65:1-13

Lawmhnak hla

65. 1 Pathian, nang cu Zion khua chung ah thang`hat na tlak hringhran. 2 Kan thlacamnak na kan leh caah na sin i tuah mi biakamnak cu tlinter hrimhrim an si lai. Minung phun vialte cu an sual `hatlonak he na sin ah an ra te lai. 3 Kan sualpalhnak cu a tam tuk nain na kan hnawhpiak dih hna. 4 Na tual chung um ding na thim i na sawm mi hna cu zei tluk thluachuah dah an si. Kannih cu na inn le na biakinn thiang i thil`ha hna he kan khat lai. 5 Na khamh-dinnak i khuaruahharnak hna he na kan leh, kan Khamhtu Pathian, nang cu vawlei cung dihlak, lamhla tikulh hna tiang, i ruahchannak na si. 6 Huham cu i thuam in, na `hawnnak in tlang hna cu fek`hup in na chiah hna, 7 rili aukhuan thawng, tilet au thawng hna cu na daihter hna.

Miphun hna cu an aukhuan, vawlei deng i a um mi hna cu thlalau in an um, 8 na khuaruahharnak hna nih ni a chuahnak le a tlaknak hna tiang lawmhnak authawng a phorh hna. 9 Vawlei cu na len i theipar an tlai, rumnak he na khahter; Pathian tiva cu ti in a liam; thlairawl cu na chuahter. 10 A leikuang hna cu ti tampi na pek hna, horkuang cu na chilh hna, dapti in na nemter i a tuaino cu thluachuah na pek hna. 11 Kum cu na velngeihnak luchin na chinh, na keneh in rumnak tidor an pawt, 12 thetse phong hna nih dapti an hmuh, fingtlang hna cu lawmhnak in an khat, 13 phong hna cu sa`il in an khat, nelrawn hna cu changvut hna in an khat; annih cu lawmhnak he an au i hla an sa.