2 Maccabaeus 15

Nikanor i Pathian thangchiatnak

15 Judas le a mi hna cu Samaria kiangkam ah an um ko ti kha Nikanor nih a theih, cucaah amah ca ah zei phan awk hmanh um lo in  annih kha tuk ding ah aa tim. 2 Hramhram in aa zulhter mi Jew hna nih amah kha, “Hi bantuk ni ah anmah tuk cu i tim hlah.  Zeizong vialte a hmu dihtu nih a thiang a ti mi ni cu upat ko,” tiah an ti.  3Cu tikah thuat-thum mi ṭha lopa nih nih Sabbath ni ulh awk nawl a pem mi zei zong tuah khotu cu vancung ah maw a um ti in a hal hna. 4 Annih nih,“A nung mi Bawipa, Zei zong tuah kho hrimhrim nih nisarihnak ni cu ulh ding in nawl a kan pek,” tiah an ti tikah amah nih, 5“Keimah vawlei bawipa nih hriamnam i lak in siangpahrang rianṭuan ding nawl kan pek ve hna,” tiah an bia cu a tan.  Zei tin a si zong ah a khuakhanak ṭha lo cu tlam a tlinter kho lo.

Judas nih a mi hna cu a cawnpiak hna. Amang

       6 Nikanor cu aa uanthlar le a ruamkai tuknak ah Judas le a mi hna sin in a ramh mi hranchaw in ralteinak lung kha phun a timh lio ah, 7Makabi tu cu Bawipa nih a ka dirpi ko lai ti ruahchannak he fek tein a dir ko. 8A mi hna kha ramdangmi hna tuknak ruang ah thinphan tuk lo ding le a liamcia caan ah Vancung in a ra mi bawmhnak hna kha philh lo in, a tu caan zong ah Lianngan bik bawmhnak thawng in teinak cu kanmah ta a si ko lai tiah lung ṭhawng ngai in um awkah tha a pek hna. 9 Phungbia le profet hna bia kha lak in lungthin thar a pek hna, an rak hmuh cang mi teinak hna kha a theihter ṭhan hnanak thawng in an lung a thawhter hna. 10 An ral a ṭhatter ṭhan hna hnu ah a forhfialnak bia cu ramdangmi hna an rawiphiarnak le zei tin dah an biakamnak kha an rak buar ning ti mi in a donghter.

11Pakhat cio kha phaw le fei nih a pek mi himnak nakin bia sunglawi in a chuak mi hriamnam in ruahchannak tha a pek hna hnu ah lung a fehtertu mang – chunmang in thazaang a pek hna. 12 A hmuh mi cu hitin a si: “Tlangbawi Ngan a rak si mi Onias, zohchunh awktlak patling, umtu hoiher aa dawh tuk mi, a ngakchiat tein ziaza ṭhatlei ah rak cawnpiak mi le biachim a thiam ngai mi nih a za hler in Jew miphun pumpaluk ca ah thla a campiak hna.  13Cu hnu ah amah tluk in kumkhua le nunzia ah upat a tlak mi le khuaruahhar in biachim a thiam mi a rak lang ṭhan. 14 Cun Onias nih, “Hihi a unau hna a daw i a mi hna le a thiang khualipi ca ah thla tampi a campiaktu- Pathian profet Jeremiah cu a si,” tiah a ti hna. 15Cu hnu ah Jeremiah nih a orhlei kut kha a samh i Judas kha sui vainam pakhat a pek, cun anih nih, 16"Hi vainam thiang cu Pathian laksawng in i lak; hi vainam in ral cu na saam dih hna lai a ti,” tiah a ti hna.

Raltutu hna lungput  

17 Ralṭhatnak a chuahter i mino hna kha pasal lungthin a pe kho mi Judas i bia sunglawi nih an tha a thawhter hna caah riahbuk chung i erh ti lo in ralṭha le kutsih in hmainor i ralṭhatnak chuahpi ko seh ti in tuk an i tim, zei cah tiah khualipi, an biaknak thiang le biakinn cu an him ti lo. 18An nupi, an fale, an unau le an sahlawh rualchan hna an siaherhnak cu a biapi lo mi ah an tla cang; an phan bik mi cu an Biakinn thiang ca ah a si. 19Khuapi chung kaltak mi hna zong cutin an si ve, ramlak hmunking ah ral he aa tong ding bang an si ve cang. 20Mikip nih zei dah a cang lai ti lawng kha an hngak ko cang. Ral cu an ralkap kha i funtom in tuk hmasa ding ah an i tlar cang; vui hna cu a biapitnak hmun ah an chiah hna i rang ralkap hna cu kehlei le orhlei ti in an chiah cang hna.  21Makabi cu a rak ra mi ralkap liangluang, an hriam tleu le an vui hna ṭihnung kha a hmuh hna. Cu tikah hriamnam thazaang nih lai a rel lai lo, teinak cu a hmuh ning bang in hmuh aa tlak mi kha a pek ko lai ti  hngalhnak he vancung ah a kut a hler i khuaruahhar a tuah tawn mi Bawipa sin ah bawmhnak a hal.  22Hiti hin thla a cam:  “Judea siangpahrang Hezekiah chan ah khan, Bawipa, nangmah nih na vanmi kha na thlah i Sennacherib ralkap 180,000 nak tlawm lo na rak hrawh dih hna, 23Atu zong  vancung Siangpahrang, kan hmai ah ṭihphannak le thlaraunak vorh awkah na vanmi ṭha cu run thlah hram ko. 24Hi mi hna cu na mi thiang hna tuk awkah thangchiatnak hmurka he an rat caah annih cu na baan ṭhawnak in thluk dih si ko hna seh.” Cun a thlacam a dihter. 

Nikanor thihnak le sunghnak

       25Nikanor le a mi hna cu muko tum thawng le ramhla sak thawng he an hung chuak; 26sihmanhsehlaw Judasmi hna tu cu bawmhnak hal le thlacampah in an ral cu an naih hna.  27 An kut in ral an tu i an lung in Pathian sin ah thla an cam caah an ral cu a tlawm bik 50,000 an saam hna i Pathian aa phuannak nih khan thazaang a pek hna. 28An i tuk a dih i teinak he an kir tikah ralthuam he a ril ko mi Nikanor kha an hmuh.

       29Cu tikah aukhuannak le khuaruahharnak he zeizong tuah  kho Bawipa cu an pupa hna holh in an thangṭhat. 30An hruaitu a si mi, a pum le a thlarau kha a miphun hawi ca a rak pe mi, a no lio in a miphun ca ah a rak ngeih mi dawtnak kha atu tiang a ngeih peng mi nih khan Nikanor lu cu tan awkah a chimh hna, a baan pahnih kha a liang hram tiang tan in Jerusalem khualipi ah an kalpi. 31Cun amah hrimhrim kha khika a phak tikah a ram mi hna kha hmunkhat ah a pumh hna, tlangbawi hna kha biakṭheng hmai ah a dirter hna i ralhau khuapi i a um mi hna kha a auhter hna. 32Annih kha fihnung Nikanor lu le Zeizong tuah kho Innpi thiang kha zei rel lo in a rak thlirhnawh mi a kut kha a hmuhsak hna. 33Cu hnu ah pathian hngal lo Nikanor lei kha a tan, cun dip tein can hnu ah van vate hna fah awkah a chimh hna; cun a hruhnak man caah biakinn hmai ah thlai ding in nawl a pek hna. 34Cu tikah mikp cu vanlei hoih in a sunglawi mi Bawipa cu lawmhnak an pek i, “A hmun thiang kha buar nakin a luatter mi cung ah thluachuah vanluhnak um ko seh,’ tiah an chim.

       35Zei zongte cu Bawipa bawmhnak thawng in a si ti mi a fiang i hmuh khawh mi hmelchunhnak ca ah Nikanor lu cu ralhruang khuapi ah khan a thlai. 36Cu ni philh lonak kha Aramic holh in Adar ti mi thlahleihnihnak thla ni hleithumnak ni ah tuah zungzal ding, mipi hnatlaknak in nawl an chuah, cu ni cu Mordecai Ni i timhlamhnak Ni ti a si.

Cauk a khawmsuatu biacah

       37Hika ah hin Nikanor tuanbia tawi cu a dih, cun cu ni thawk cun khualipi cu Hebru mi hna kut ah a um zungzal. Hika ah hin ka rian zong ka ngol ve lai. 38 Aherhnak zawn tiang ṭha tein ka khawmh khawh ahcun cucu kaa tinh mi a si. Man a ngei lo i kik lo lum lo a si zong ah kha vialte kha ka tuah khawh mi a si ko. 39Mitsur zu cu amah lawng din ah ṭih a nung ti zong a si ve, zu cu ti he cawh tikah a thaw i lawmhnak thil ṭha kha a chuahpi, cu bang in thil si ning pakhat kan chuahpi tikah thiamnak nih a reltu i hngalhnak kha a thlum-alter. Hika ah hin ka donghter.